విజయ్ తండ్రి కూడా ఆత్మహత్య.. పాత ఇంటర్వ్యూ వైరల్
తమిళ నటుడు విజయ్ ఆంటోని కుమార్తె ఆత్మహత్య తర్వాత, అతడి తండ్రి ఆత్మహత్య గురించి విజయ్ మాట్లాడిన పాత ఇంటర్వ్యూ ఒకటి వైరల్‌గా మారింది. అందులో అతను ఆత్మహత్య నివారణ గురించి మాట్లాడుతున్నాడు...
తన చిన్నతనంలోనే తన తండ్రి కూడా ఆత్మహత్య చేసుకున్నారని వెల్లడించాడు. ఈ దురదృష్టకర సంఘటన మొత్తం కుటుంబాన్ని ఎలా ప్రభావితం చేస్తుందో పేర్కొన్నాడు, , “జీవితం ఎంత బాధాకరమైనది అయినా, ఎలాంటి ఇబ్బందులు ఎదుర్కోవలసి వచ్చినా, ఆత్మహత్య చేసుకోకండి. ఇది పిల్లల మీద విపరీతమైన ప్రభావాన్ని చూపిస్తుంది. నాకు 7 ఏళ్లు, మా చెల్లికి 5 ఏళ్ల వయసున్నప్పుడు మా నాన్న ఆత్మహత్య చేసుకుని తన ప్రాణాలను బలిగొన్నారు. ఆ తర్వాత మా అమ్మ ఎంత కష్టాలు పడిందో మాకు తెలుసు. ఆమె పడిన కష్టాలను మేము కళ్లారా చూశాము.
విద్యార్థుల మానసిక ఆరోగ్యం గురించి కూడా విజయ్ మాట్లాడారు. పిల్లలు పాఠశాలలో అత్యుత్తమంగా ఉండాలని ప్రతి తల్లిదండ్రీ కోరుకుంటారు. అది విద్యార్థి మీద ఎంతటి ప్రభావం చూపిస్తుందో ఒకసారి ఆలోచించండి. అది వారి ఎదుగుదలకు ఆటంకం కలిగిస్తుందని ఆయన అన్నారు. “పిల్లలను స్కూల్ అయిపోయిన వెంటనే ట్యూషన్‌కి పంపిస్తారు. వారికి ఆలోచించడానికి కూడా సమయం ఇవ్వడం లేదు. దయచేసి అలా చేయకండి. వారికి కొంత సమయం ఖాళీగా ఉండనివ్వండి. ఇక పెద్దల విషయానికొస్తే, వారు సంపద మరియు విజయంపై మక్కువతో కాకుండా తమను తాము ప్రేమించుకోవాలని నేను కోరుకుంటున్నాను, ”అని అతను చెప్పాడు.
విజయ్, అతని భార్య ఫాతిమా ఇద్దరూ తమ కుమార్తె మరణంతో కృంగిపోయారు. పరిశ్రమకు చెందిన పలువురు అభిమానులు, శ్రేయోభిలాషులు అమ్మాయికి చివరి నివాళులు అర్పించేందుకు, ఈ కష్ట సమయంలో కుటుంబంతో కలిసి ఉండటానికి చెన్నైలోని వారి నివాసం వెలుపల వేచి ఉన్నారు. పలువురు నటీనటులు సోషల్ మీడియా ద్వారా కుటుంబ సభ్యులకు సంతాపం తెలిపారు. మీరా డిప్రెషన్‌కు చికిత్స పొందుతున్నట్లు సమాచారం.