ఉత్తరప్రదేశ్‌లో పాశవికం : 50 ఏళ్ల అంగన్వాడీ కార్యకర్తపై మానవమృగాల పంజా
ఉరిశిక్షలు పడుతున్నా కామాంధుల్లో భయం లేదు. నిర్భయ తరహా ఘటన యూపీలోనూ వెలుగు చూడడం వెన్నులో వణుకుపుట్టిస్తోంది. ఉత్తరప్రదేశ్‌లోని బదౌన్ జిల్లాలో మానవ మృగాలు 50 ఏళ్ల మహిళను బలితీసుకున్నాయి. దేవుడి దర్శనానికి వెళ్లిన ఓ అంగన్వాడీ కార్యకర్తపై అత్యంత పాశవికంగా సామూహిక అత్యాచారానికి ఒడిగట్టారు. ఆ తర్వాత కాళ్లు విరగొట్టి, పక్కటెముకలు విరిచి, ప్రైవేట్ పార్ట్స్‌ను ఛిద్రం చేసి, ఊపిరితిత్తుల్లో రాడ్డుతో పొడిచి అత్యంత భయానకంగా ఆమె ప్రాణం తీశారు. ఈ దారుణానికి ఒడిగట్టిన రాక్షసుల్లో ఇద్దరిని పోలీసులు అరెస్ట్ చేసి కటకటాల్లోకి నెట్టారు.
ఈ నెల 3వ తేదీన సాయంత్రం ఆ అంగన్వాడీ కార్యకర్త దైవ దర్శనం కోసం స్థానిక ఆలయానికి వెళ్లింది. ఆమె తిరిగి రాకపోవడంతో కుటుంబసభ్యులు ఊరంతా వెదికారు. అయితే అర్ధరాత్రి వేళ ఆలయ పూజారి, మరో ఇద్దరితో కలిసి అపస్మారక స్థితిలో ఉన్న ఆ మహిళను ఇంటికి తీసుకొచ్చారు. బావిలో పడిపోయిందని, ఆమె అరుపులు విని రక్షించి తీసుకొచ్చామని చెప్పి వాళ్లు వెళ్లిపోయారని కుటుంబసభ్యులు తెలిపారు. అప్పటికీ తీవ్ర రక్తస్రావమైన ఆ మహిళను ఆసుపత్రికి తరలించే లోపే మృతి చెందింది. దీంతో బాధితురాలి కుటుంబసభ్యులు పోలీసులకు ఫిర్యాదు చేశారు.
ఆ మహిళ డెడ్ బాడీకి పోస్టుమార్టం నిర్వహిస్తే షాకింగ్ విషయాలు బయటపడినట్లు పోలీసులు తెలిపారు. మహిళపై సామూహిక అత్యాచారానికి పాల్పడిన రాక్షసులు... ఆ తర్వాత అత్యంత దారుణంగా గాయపర్చారని పోస్ట్ మార్టం నివేదిక వెల్లడించింది. రంగంలోకి దిగిన పోలీసులు పూజారితోపాటు మరో ఇద్దరిపై కేసు నమోదు చేశారు. నిందితుల్లో ఇద్దరిని ఇప్పటికే అరెస్ట్ చేసిన పోలీసులు అసలు సూత్రదారుల కోసం గాలిస్తున్నారు.