వరకట్న వేధింపులకు మరో కేరళ యువతి బలి..

శనివారం ఉదయం యునైటెడ్ అరబ్ ఎమిరేట్స్ (యుఎఇ)లోని తన అపార్ట్‌మెంట్‌లో కేరళకు చెందిన 29 ఏళ్ల మహిళ మృతి చెందింది . బాధితురాలు అతుల్యగా గుర్తించబడింది, ఆమె సతీష్ అనే వ్యక్తిని వివాహం చేసుకుంది. జూలై 18 మరియు జూలై 19 మధ్య సతీష్ అతుల్యను గొంతు కోసి, కడుపులో తన్నాడని, ఆమె తలపై కొట్టాడని, ఫలితంగా ఆమె మరణించిందని ఆమె తల్లి ఆరోపించింది.

2014లో వివాహ సమయంలో కట్నం కింద మోటార్ సైకిల్, 43 సవర్ల బంగారం ఇచ్చినప్పటికీ ఆమెను వేధించే వారని అతుల్య కుటుంబం ఆరోపించింది. భారతీయ న్యాయ సంహిత (బిఎన్ఎస్) మరియు వరకట్న నిషేధ చట్టం, 1961లోని వివిధ సెక్షన్ల కింద సతీష్ పై కేసు నమోదు చేయబడింది.

సతీష్ మద్యానికి బానిస అని బాధితురాలి తండ్రి చెప్పారు.

అతుల్య తండ్రి రాజశేఖరన్ పిళ్లై, సతీష్ తాగుబోతు అని, అతను తరచుగా హింసాత్మకంగా మారేవాడని ఆరోపించారు. గతంలో అతుల్యపై శారీరక దాడి జరిగిందని చెప్పారు. "ఒకసారి, ఆమెపై శారీరకంగా దాడి జరిగినప్పుడు, నేను ఆమెను ఇంటికి తీసుకెళ్లాలని అనుకున్నాను. కానీ అతను క్షమాపణలు చెప్పాడు, నా కూతురు కూడా అతడి మాటలు నమ్మి క్షమించింది" అని రాజశేఖరన్ అన్నారు.

భార్య మరణంలో తన ప్రమేయం లేదన్న భర్త

అతుల్య మరణంలో తన ప్రమేయం లేదని సతీష్ చెబుతున్నాడు. ఆమె ఆత్మహత్య చేసుకుంటుందని తాను అనుకోలేదని చెప్పాడు. ఆమెకు ఏమి జరిగిందో కూడా తెలుసుకోవాలనుకుంటున్నానని అంటున్నాడు. అయితే, తన కుమార్తె మరణం వెనుక ఉన్న పరిస్థితులు అనుమానాస్పదంగా ఉన్నాయని రాజశేఖరన్ పట్టుబట్టాడు. "నా కుమార్తె ఆత్మహత్య చేసుకుందంటే నేను నమ్మను" , ఆమె మరణం వెనుక ఏదో జరిగింది. దానిని ఖచ్చితంగా కనుక్కోవాల్సిన అవసరం ఉందని అన్నారు.

యుఎఇలో మరో గృహ హింస కేసు నమోదైన కొన్ని రోజుల తర్వాత ఈ సంఘటన జరిగింది. కేరళకు చెందిన 32 ఏళ్ల మహిళ విపంచిక మణి షార్జాలోని అల్ నహ్దాలో తన ఒకటిన్నర సంవత్సరాల కుమార్తె వైభవిని చంపి ఆత్మహత్య చేసుకుంది. వరకట్నం డిమాండ్ కారణంగా విపంచికను శారీరకంగా మరియు మానసికంగా వేధించారని బాధితురాలి తల్లి తన ఫిర్యాదులో ఆరోపించింది.