'సామూహిక ఆత్మహత్య'.. ముగ్గురు చిన్నారులతో సహా ఏడుగురు కుటుంబ సభ్యులు..
సూరత్‌లోని పాలన్‌పూర్ జకత్నాకలో శనివారం ఫర్నీచర్ వ్యాపారి ఆత్మహత్య చేసుకోవడంతో పాటు ముగ్గురు పిల్లలతో సహా మరో ఏడుగురు విషం తాగి మరణించడంతో ఉద్రిక్తత నెలకొంది. ఆర్థిక ఇబ్బందుల కారణంగానే కుటుంబం సామూహిక ఆత్మహత్యకు పాల్పడినట్లు తెలుస్తోంది. మృతులలో మనీష్ సోలంకిని గుర్తించారు. అతను సీలింగ్ ఫ్యాన్‌కు వేలాడుతూ కనిపించాడు, మరో ఆరుగురిలో భార్య రీటా, తండ్రి కాను, తల్లి శోభ ముగ్గురు పిల్లలు - దిశ, కావ్య,కుశాల్ ఉన్నారు.
సామూహిక ఆత్మహత్య జరిగిన అడాజన్ ప్రాంతంలోని సిద్ధేశ్వర్ అపార్ట్‌మెంట్‌కు కాల్ రావడంతో భారీ పోలీసు బృందం చేరుకుంది. సోలంకి దగ్గర దాదాపు 35 మంది వడ్రంగులు, కార్మికులు పనిచేస్తున్నారని స్థానిక నివేదికలు పేర్కొన్నాయి. ఈ కార్మికులు శనివారం ఉదయం అతనిని సంప్రదించడానికి ప్రయత్నించగా అతను కాల్‌లకు సమాధానం ఇవ్వలేదు. ఇంటికి వచ్చి కాలింగ్ బెల్ కొట్టినా ఇంటి తలుపులు తెరవలేదు.
దీంతో స్థానికులు ఇంటి వెనుక ఉన్న కిటికీ పగులగొట్టి ఇంట్లోకి ప్రవేశించారు. తదుపరి విచారణ నిమిత్తం మృతదేహాలను పోస్టుమార్టంకు తరలించారు. పోలీసులు వారి ఆత్మహత్యకు గల ఖచ్చితమైన వివరాలను పంచుకోలేదు. కానీ వారు ఇంటి నుండి సూసైడ్ నోట్‌ను స్వాధీనం చేసుకున్నారు. దీనిలో సోలంకి ఆర్థిక సంక్షోభం గురించి ప్రస్తావించారు. కానీ ఎవరి పేరు లేఖలో ప్రస్తావించలేదు.
సోలంకి ప్రాంతంలోని నివాసితులు మీడియాతో మాట్లాడుతూ , అతనికి కొన్ని పెద్ద ఒప్పందాలు ఉన్నాయని, చాలా కాలంగా కొన్ని ఆర్థిక సమస్యలను ఎదుర్కొంటున్నారని చెప్పారు. సంఘటనా స్థలానికి చేరుకున్న కుటుంబ బంధువులు కూడా ఎలాంటి వివరాలు తెలియజేయలేదు. ఈ మేరకు కేసు నమోదు చేసుకున్న పోలీసులు కేసు దర్యాప్తు ప్రారంభించారు.