ఘోర రోడ్డు ప్రమాదం.. ఒకే కుటుంబానికి చెందిన ఆరుగురు మృతి
రాజస్థాన్‌లోని ఢిల్లీ-ముంబై ఎక్స్‌ప్రెస్‌వేపై రాంగ్ యూటర్న్ తీసుకుంటున్న ట్రక్కును కారు ఢీకొనడంతో ఒకే కుటుంబానికి చెందిన ఆరుగురు వ్యక్తులు మరణించారు. ఈ ప్రమాదంలో ఇద్దరు చిన్నారులు గాయపడగా, ట్రక్కు డ్రైవర్ పరారీలో ఉన్నాడు.
సవాయి మాధోపూర్ జిల్లాలోని బనాస్ నది వంతెన సమీపంలో ఆదివారం జరిగిన ఈ ప్రమాదం ట్రక్ డ్రైవర్ నిర్లక్ష్యాన్ని కళ్లకు కట్టింది. సీసీ కెమెరా ఫుటేజీలో, ట్రక్కు వెనుక కారు ప్రయాణిస్తున్నట్లు కనిపిస్తోంది. అకస్మాత్తుగా, ట్రక్కు యు-టర్న్ తీసుకుంది, ఫలితంగా, అధిక వేగంతో ప్రయాణిస్తున్న కారు దానిలోకి దూసుకుపోయింది. పోలీసులు సంఘటనా స్థలానికి చేరుకుని లారీని స్వాధీనం చేసుకునేలోపే డ్రైవర్ అక్కడి నుంచి పరారయ్యాడు.
బాధితులను మనీష్ శర్మ, అనితా శర్మ, సతీష్ శర్మ, పూనమ్, సంతోష్, కైలాష్‌లుగా గుర్తించారు. వారు సికార్ జిల్లా నుంచి రణతంబోర్‌లోని త్రినేత్ర గణేష్ ఆలయానికి వెళ్తున్నారు.
ఇదిలా ఉండగా, గాయపడిన ఇద్దరు చిన్నారులను జైపూర్‌కు తరలించామని, వారు నిలకడగా ఉన్నారని అడిషనల్ ఎస్పీ దినేష్ కుమార్ తెలిపారని పీటీఐ వార్తా సంస్థ నివేదించింది.
నిందితుడు డ్రైవర్‌ను సీసీటీవీ ఫుటేజీ ద్వారా గుర్తించామని, అతడిని పట్టుకునేందుకు ప్రయత్నిస్తున్నామని చెప్పారు. ముఖ్యమంత్రి భజన్‌లాల్ శర్మ, ఆయన డిప్యూటీ దియా కుమారి సంతాపం తెలిపారు.
"సవాయ్ మాధోపూర్ జిల్లాలోని బౌన్లీ పోలీస్ స్టేషన్ ప్రాంతంలో ఢిల్లీ-ముంబై ఎక్స్‌ప్రెస్‌వేపై జరిగిన ఘోర రోడ్డు ప్రమాదంలో 6 మంది పౌరులు మరణించిన వార్త చాలా బాధాకరమైనది" అని సీఎం ట్వీట్ చేశారు.
బాధిత ప్రజలకు అన్ని విధాలా సహాయం అందించాలని సంబంధిత అధికారులను ఆదేశించారు. దియా కుమారి మాట్లాడుతూ, "సవాయి మాధోపూర్‌లోని బౌన్లీ పోలీస్ స్టేషన్ పరిధిలో జరిగిన ఘోర రోడ్డు ప్రమాదంలో ఆరుగురు వ్యక్తులు మరణించడం గురించి విచారకరమైన వార్తలు వచ్చాయి."
గాయపడిన వారు త్వరగా కోలుకోవాలని కోరుకుంటున్నాను అని ఆమె తెలిపారు.
