THEFT: నటుడు విశ్వక్సేన్ ఇంట్లో భారీ చోరీ
టాలీవుడ్ యంగ్ హీరో విశ్వక్ సేన్ ఇంట్లో భారీ చోరీ జరిగింది. హైదరాబాద్ ఫిలింనగర్‌ రోడ్డు నెంబర్‌-8లోని విశ్వక్ సేన్ ఇంట్లోకి చొరబడిన ఓ దుండగుడు.. బంగారు ఆభరణాలు తీసుకుని పరారయ్యాడు. విశ్వక్ సేన్ సోదరి వన్మయి రూమ్‌లోని ఆల్మారాలో బంగారు ఆభరణాలు మాయమైనట్లు గుర్తించారు. విశ్వక్ సేన్ తండ్రి కరాటే రాజు ఫిర్యాదు మేరకు కేసు నమోదు చేసిన పోలీసులు దర్యాప్తు చేపట్టారు. విశ్వక్ కుటుంబమంతా ఒకే ఇంట్లో నివాసముంటుండగా.. విశ్వక్సేన్ సోదరి వన్మయి గది మూడో అంతస్తులో ఉంది. ఆదివారం తెల్లవారుజామున తన గదిలో వస్తువులన్ని చిందరవందరగా పడి ఉండడం గమనించిన వన్మయి.. అనుమానం వచ్చి, అల్మారాలను తనిఖీ చేయగా అందులో ఉన్న బంగారం చోరీకి గుర‌యిన‌ట్లు గుర్తించింది. వెంట‌నే ఈ విషయాన్ని తన తండ్రికి చెప్పగా, ఆయన పోలీసులకు సమాచారం అందించారు. ఇంటి చుట్టుపక్కల ఉన్న సీసీటీవీ కెమెరాలను పోలీసులు పరిశీలించారు. తెల్లవారుజామున 5:50 గంటల సమయంలో ఒక గుర్తు తెలియని వ్యక్తి బైక్‌పై వచ్చినట్టు కెమెరాల్లో రికార్డు అయింది. ఆ వ్యక్తి గేటు తెరిచి, నేరుగా మూడో అంతస్తుకు చేరుకుని, వెనుక ద్వారం గుండా బెడ్‌రూంలోకి ప్రవేశించినట్టు పోలీసులు గుర్తించారు. అక్కడ అల్మారాలో నుంచి బంగారు ఆభరణాలను దొంగిలించినట్టు తెలుస్తోంది.
డైమండ్ రింగులు కూడా చోరీ
చోరీ చేసిన దొంగ కేవలం 20 నిమిషాల్లోనే చోరీ పూర్తి చేసి, అక్కడి నుంచి పరారైనట్టు పోలీసులు నిర్ధారించారు. చోరీలో రెండు డైమండ్ రింగులు సహా రూ.2.20 లక్షల విలువైన ఆభరణాలు మాయమైనట్టు ఫిర్యాదులో పేర్కొన్నారు. సీసీటీవీ ఆధారంగా నిందితుడి కోసం గాలింపు చర్యలు మొదలుపెట్టారు. ఇంటి గురించి బాగా తెలిసిన వ్యక్తి పని కావచ్చని పోలీసులు భావిస్తున్నారు. దీంతో, అనుమానితులపై ప్రత్యేక దృష్టి సారించి దర్యాప్తు కొనసాగిస్తున్నారు.