తగిన గుర్తింపు లేదు.. నిరాశతో సీఎంకి, కేజ్రీవాల్ కు లేఖ రాసిన భారత చెస్ క్రీడాకారిణి

చదరంగం క్రీడ భారతదేశ ఖ్యాతి ప్రపంచవ్యాప్తంగా విస్తరింపజేస్తోంది. కానీ ఏ ఒక్కరిద్దరు క్రీడాకారులకో గుర్తింపు లభిస్తుంది. వారికి మాత్రమే ప్రపంచ వినివీధుల్లో భారతీయ జెండాను సగౌరవంగా ఎగురవేసే అవకాశం లభిస్తుంది. తగిన పారితోషికాలకు నోచుకుంటారు. కొందరు మాత్రం తగిన గుర్తింపు కోసం తహతహలాడుతుంటారు. ఎంతో కష్టపడి కొంత వరకు వచ్చినా పైకెదిగేందుకు పై అధికారుల ప్రోత్సాహం లభించకపోతే నేర్చుకున్నదంతా వృధాగా మారుతుంది.

కొంతమంది క్రీడాకారులు రాష్ట్ర ప్రభుత్వాల నుండి తమకు గుర్తింపు లేకపోవడంతో సంతోషంగా లేరు. అటువంటి కోవలోకే చెందుతుంది క్రీడాకారిణి తానియా సచ్‌దేవ్ ఢిల్లీ ప్రభుత్వం నుండి పదే పదే తన నిరాశను వ్యక్తం చేయాలని నిర్ణయించుకుంది. తానియా, X లో ఒక ఘాటైన పోస్ట్‌లో, 2008 నుండి భారతదేశం కోసం చెస్ ఆడుతున్నప్పటికీ ఢిల్లీ ప్రభుత్వం నుండి తనకు ఎలాంటి గుర్తింపు లభించలేదని పేర్కొంది. 2022 చెస్ ఒలింపియాడ్‌లో తాను సాధించిన విజయాలను రాజకీయ నేతలకు గుర్తు చేసింది. ఆమె 2024లో చెస్ ఒలింపిక్స్‌లో బంగారు పతకాన్ని కూడా గెలుచుకుంది.

"2008 నుండి భారతదేశం తరపున ఆడుతున్నా, చెస్‌లో సాధించిన విజయాలకు ఢిల్లీ ప్రభుత్వం నుండి గుర్తింపు లేకపోవడం చాలా నిరుత్సాహంగా ఉంది. తమ ఛాంపియన్‌లకు మద్దతు ఇచ్చే రాష్ట్రాలు అనేకం ఉన్నారు. అవి ప్రతిభను ప్రోత్సహిస్తాయి. కానీ ఢిల్లీ ఆ లిస్ట్ లో లేకపోవడం బాధాకరం అని వ్యంగ్యంగా పేర్కొంది.

2022 చెస్ ఒలింపియాడ్‌లో నేను చారిత్రాత్మక జట్టు కాంస్య మరియు వ్యక్తిగత పతకంతో తిరిగి వచ్చాను. రెండు సంవత్సరాల తరువాత 2024, చారిత్రాత్మకమైన చెస్ ఒలింపిక్ స్వర్ణం సాధించాను. కానీ ఇప్పటి వరకు రాష్ట్ర ప్రభుత్వం నుండి ఎటువంటి గుర్తింపు లేదు. ఢిల్లీ మరియు భారతదేశానికి గర్వంగా ప్రాతినిధ్యం వహిస్తున్న వ్యక్తిగా, @AamAadmiParty @AtishiAAP ma'am @ArvindKejriwal sir వారి చెస్ అథ్లెట్లకు మద్దతు ఇస్తారని నేను ఆశిస్తున్నాను" అని తానియా X లో పోస్ట్ చేసింది.

ఈ ఏడాది అక్టోబర్‌లో మీడియాతో మాట్లాడిన సచ్‌దేవ్ గత కొన్నేళ్లుగా దక్షిణాది రాష్ట్రం సాధించిన విధంగా గ్రాండ్‌మాస్టర్‌లను తయారు చేయాలంటే తమిళనాడు మోడల్‌ను అనుసరించాలని ఢిల్లీని కోరారు.

"తమిళనాడు నుండి చాలా మంది గ్రాండ్‌మాస్టర్‌లను మనం చూడడానికి ఒక కారణం ఉంది. ప్రతి అమ్మాయి బ్యాడ్మింటన్ ఆడాలని ఎందుకు కోరుకుంటుంది? ఎందుకంటే ఆమె పివి సింధును చూసింది" అని సచ్‌దేవ్ అన్నారు.

"రాష్ట్ర ప్రభుత్వాలు తమ సొంత ఆటగాళ్ల ప్రయత్నాన్ని గుర్తించకపోతే, మీరు యువతను ఎలా ప్రేరేపించగలరు అని ఆమె తన బాధను వ్యక్తం చేశారు.