'విషాదానికి యోగి ఆదిత్యనాథ్దే బాధ్యత'.. కాంగ్రెస్ ఆరోపణ
శుక్రవారం నాడు 10 మంది చిన్నారుల ప్రాణాలను బలిగొన్న ఝాన్సీ ఆస్పత్రి అగ్నిప్రమాదంపై ఇప్పుడు రాజకీయ యుద్ధం మొదలైంది. యోగి ఆదిత్యనాథ్ ప్రభుత్వం ప్రజా సంక్షేమం కంటే ‘ద్వేషం’పైనే ఎక్కువ దృష్టి సారిస్తోందని కాంగ్రెస్ ఆరోపించింది.
ఉత్తరప్రదేశ్ కాంగ్రెస్ చీఫ్ అజయ్ రాయ్ శనివారం మాట్లాడుతూ, "బాధిత కుటుంబాలకు నా ప్రగాఢ సానుభూతి తెలియజేస్తున్నాను. ఉత్తరప్రదేశ్లో ఇటువంటి అనేక సంఘటనలు జరిగాయి. వారణాసిలో కూడా ఇది జరిగింది. ఈ ప్రభుత్వం దర్యాప్తుకు మాత్రమే ఆదేశిస్తోంది. యోగి ఆదిత్యనాథ్ దేశవ్యాప్తంగా తిరుగుతూ ద్వేషపూరిత రాజకీయాలలో పాల్గొంటున్నారు."
"ఉత్తరప్రదేశ్ ప్రజలు తమను ఆదుకుంటారని అతనికి పదవిని కట్టబెట్టారు. ఈ ప్రభుత్వాన్ని అధికారులు మాత్రమే నడుపుతున్నారు. ఈ ఘటనకు ఉత్తరప్రదేశ్ ప్రభుత్వం, సీఎం యోగి ఆదిత్యనాథ్ బాధ్యత వహించాలన్నారు.
మృతుల కుటుంబాలకు రూ. 5 లక్షల పరిహారం ఇవ్వాలని రాష్ట్ర ప్రభుత్వం తీసుకున్న నిర్ణయంపై అజయ్ రాయ్ స్పందిస్తూ, ప్రాణాలు కోల్పోయినప్పుడు డబ్బుకు ఎలాంటి విలువ ఉండదు. ఆరోగ్య భద్రత కోసమే ప్రజలు ఆసుపత్రులకు వెళతారని.. కానీ ఆసుపత్రుల్లో భద్రత లేదని అన్నారు.
నియోనాటల్ ఇంటెన్సివ్ కేర్ యూనిట్ (ఎన్ఐసియు)లో శుక్రవారం రాత్రి భారీ అగ్నిప్రమాదం సంభవించిన ఝాన్సీ మెడికల్ కాలేజీలో 10 మంది నవజాత శిశువులు మరణించారు. అగ్నిప్రమాదానికి గల కారణాలపై ఆరా తీస్తున్నారు. అయితే షార్ట్సర్క్యూట్ వల్ల మంటలు చెలరేగినట్లు అనుమానిస్తున్నారు. మంటలు చాలా త్వరగా వ్యాపించాయని, NICU వార్డును పూర్తిగా ఖాళీ చేయలేదని ఆసుపత్రి అధికారులు తెలిపారు. అయితే, వారు 47 మంది పిల్లలను రక్షించగలిగారు.
మరోవైపు ఈ ఘటనపై యూపీ ప్రభుత్వం విచారణ చేపట్టింది. నిర్లక్ష్యానికి పాల్పడిన వారిని విడిచిపెట్టబోమని ఉత్తరప్రదేశ్ డిప్యూటీ సీఎం బ్రజేష్ పాఠక్ అన్నారు.