Irregular Periods: ఇర్రెగ్యులర్ పీరియడ్స్‌కి ఈ ఐదు ఆహారపదార్థాలు.. ప్రతిరోజూ తీసుకుంటే..
Irregular Periods: మహిళలకు నెలసరి వచ్చినా ఇబ్బందే.. రాకపోయినా ఇబ్బందే.. వస్తే ఆ ఐదు రోజులు అనీజీగా ఉంటుంది. రాకపోతే ఎందుకు రాలేదో అని ఆందోళన. ఏది ఏమైనా సహజసిద్ధంగా జరిగే ప్రక్రియలు సమయానికి జరిగిపోవాలి. లేకపోతే అనారోగ్యం, ఆందోళన.
రెండు పీరియడ్‌ల మధ్య సగటు గ్యాప్ 28 రోజులు. పీరియడ్స్ ఒక వారం కంటే ఎక్కువ ఆలస్యం అయితే ఒలిగోమెనోరియాతో బాధపడుతున్నట్లే. వైద్యపరిభాషలో ఇర్రెగ్యులర్ పీరియడ్స్‌కు వాడే పదం. క్రమరహిత పీరియడ్స్‌కు కారణాలు అనేకం కావచ్చు - థైరాయిడ్ రుగ్మతలు, ఒత్తిడి, ప్రయాణం, ఆల్కహాల్ లేదా కెఫిన్ అధికంగా తీసుకోవడం మొదలైనవి. ఇక్కడ కొన్ని ఆహారాలు క్రమరహిత పీరియడ్స్ చికిత్సలో సహాయపడతాయి. అవేంటో చూద్దాం..
అల్లం
జలుబు నుండి ఉపశమనం పొందడం నుండి జీర్ణక్రియను మెరుగుపరచడం వరకు, అల్లం ఆరోగ్యాన్ని మెరుగుపరుస్తుంది. విటమిన్ సి, మెగ్నీషియం అధికంగా ఉన్న అల్లం క్రమరహిత పీరియడ్స్ విషయంలో కూడా ప్రముఖపాత్ర వహిస్తుంది. అల్లం నేరుగా తీసుకోవడం చాలా కష్టమైన పని. అయితే ప్రతిరోజూ ఓ కప్పు అల్లం టీని తీసుకోవచ్చు. లేదంటే ఓ స్పూన్ అల్లం రసానికి తగినంత తేనె జోడించి తీసుకోవచ్చు. ఇది గర్భాశయాన్ని సంకోచించడంలో సహాయపడుతుంది. బెల్లంతో చేసిన అల్లం మురబ్బా ప్రతిరోజు ఓ చిన్న ముక్క తీసుకున్నా సరిపోతుంది.
బొప్పాయి
బొప్పాయిని రోజూ తినడం వల్ల గర్భాశయ కండరాలు సంకోచిస్తాయి. శరీరంలో వేడిని ఉత్పత్తి చేయడమే కాకుండా, పండులో కెరోటిన్ ఉంటుంది. ఈ పదార్ధం శరీరంలో ఈస్ట్రోజెన్ హార్మోన్ స్థాయిలను ప్రేరేపిస్తుంది. సహజంగానే ఇది పీరియడ్స్ రావడానికి సహకరిస్తుంది. అందుకే గర్భధారణ సమయంలో ఈ పండుకి దూరంగా ఉండాలని చెబుతారు వైద్యులు.
అనాస పండు
పైనాపిల్ పండులో బ్రోమెలైన్ అనే ఎంజైమ్ ఉంటుంది. ఇది ఎరుపు మరియు తెల్ల రక్త కణాల ఉత్పత్తికి సహాయపడుతుంది. ఇది మెరుగైన రక్త ప్రసరణను సూచిస్తుంది.
పార్స్లీ
దీని ఆకులు కొత్తిమీరను పోలి ఉంటాయి. కానీ కొన్ని భిన్నమైన లక్షణాలను కలిగి ఉంటుంది. పెల్విక్ ప్రాంతంలో రక్త ప్రసరణను పెంచే మూలిక ఇది. మీ రోజువారీ ఆహారంలో పార్స్లీ ని చేర్చుకోవడం మర్చిపోవద్దు.
వాము
వాము మీ పేగులను శుభ్రపరచడమే కాకుండా, ఇది మీ ఋతు చక్రంతో అద్భుతాలు చేస్తుంది. ఒక గ్లాసు నీళ్లలో ఒక స్పూన్ వాము వేసి మరిగించాలి. ఆ నీటిని గోరువెచ్చగా ఉన్నప్పుడు తాగాలి. ఇది గర్భాశయం సమర్థవంతంగా పనిచేయడానికి తోడ్పడుతుంది. ఇందులోని యాంటీ-స్పాస్మోడిక్ లక్షణాలు ఋతు తిమ్మిరి, నొప్పులను నివారించడంలో కూడా సహాయపడతాయి.
గమనిక: ఈ ప్రభావవంతమైన, సులభమైన గృహ-ఆధారిత పద్ధతులను అవలంబించడంతో పాటు వైద్యుడిని సంప్రదించడం ఎల్లప్పుడూ మంచిది. మీ శరీర స్థితిని బట్టి వైద్యులు చికిత్సను అందిస్తారు. అంతేకాకుండా, సమస్య యొక్క మూల కారణాన్ని నిర్ధారించినప్పుడు మాత్రమే సమస్య సగం పరిష్కరించబడుతుంది. అందుకే పీరియడ్స్ గురించిన ఏ సమస్యలు ఉన్నా గైనకాలజిస్ట్‌ని సందర్శించాలి.
