PCOD/PCOS: మహిళలను వేధించే PCOD/PCOS.. ఈ యోగా ఆసనాల ద్వారా..

PCOD/PCOS: పాలిసిస్టిక్ ఓవేరియన్ డిజార్డర్ (PCOD) అనేది 10 మంది మహిళల్లో కనీసం ఒకరిని వేధించే సాధారణ వ్యాధి. ఇది అండాశయంలో అనేక తిత్తులు ఏర్పడే పరిస్థితి. ఈ తిత్తుల వెనుక ప్రధాన కారణం పీరియడ్స్ సక్రమంగా లేకపోవడం. అండాశయం పరిమాణం పెరగడానికి దారితీస్తుంది. ఆండ్రోజెన్, ఈస్ట్రోజెన్ వంటి హార్మోన్ల ఉత్పత్తిని వేగవంతం చేస్తుంది. PCODతో బాధపడుతున్న మహిళలు తరచుగా బరువు పెరగడం, పెల్విక్ నొప్పి, ముఖంపై మొటిమలు, జుట్టు పల్చబడటం, విపరీతమైన అలసటతో పాటు అనేక ఇతర దుష్ప్రభావాలతో బాధపడుతుంటారు.

పాలిసిస్టిక్ ఓవేరియన్ సిండ్రోమ్ (PCOS) అనేది మరో తీవ్రమైన హార్మోన్ల ఎండోక్రైన్ రుగ్మత. ప్రపంచ ఆరోగ్య సంస్థ అంచనా ప్రకారం, PCOS ప్రపంచవ్యాప్తంగా మిలియన్ల మంది మహిళలను ప్రభావితం చేస్తుంది. ఇది ఒకరకమైన మెటబాలిక్ డిజార్డర్. ఇది ఓవలేషన్‌కు దారితీయవచ్చు. ఈ పరిస్థితిలో అండాశయాలు గుడ్లు విడుదల చేయడం ఆగిపోతాయి. ఇంకా, ఇది సంతానోత్పత్తిపై హానికరమైన ప్రభావాన్ని చూపిస్తుంది. PCOS టైప్ 2 డయాబెటిస్, గుండె జబ్బులు, అధిక రక్తపోటు వంటి ఇతర ఆరోగ్య సమస్యలకు కూడా దారితీస్తుంది.

ఈ వ్యాధులను అదుపులో ఉంచుకోవడానికి యోగా ఒక ప్రభావవంతమైన మార్గం. ఒక అధ్యయనం ప్రకారం, మూడు నెలల పాటు వారానికి మూడుసార్లు ఒక గంట యోగా చేసే స్త్రీలలో టెస్టోస్టెరాన్ స్థాయిలు 29% తగ్గినట్లు గుర్తించారు. PCOD/PCOSని అధిగమించడంలో యోగా కచ్చితంగా సహాయపడుతుందని నిపుణులు చెబుతున్నారు. దీనికి సంబంధించిన కొన్ని యోగా ఆసనాలు..

అనులోమ విలోమ ప్రాణాయామం

ఇది చాలా శక్తివంతమైన ప్రాణాయామం. ఇది మనస్సు, శరీరం రెండింటినీ మంచి ఆకృతిలో ఉంచడానికి సహాయపడుతుంది. ఇది రక్త ప్రసరణపై కూడా ప్రభావం చూపిస్తుంది. ఈ ప్రాణాయామం సాధన చేయడానికి - కళ్ళు మూసుకుని, వెనుకకు నిటారుగా కూర్చోండి. కుడి బొటన వేలితో కుడి ముక్కు రంధ్రాన్ని మూసి, ఎడమ ముక్కు రంధ్రం ద్వారా నెమ్మదిగా పీల్చుకోండి. ఇప్పుడు మీ ఉంగరపు వేలు, చిటికెన వేలిని ఉపయోగించి ఎడమ ముక్కు రంధ్రాన్ని మూసివేసి, బొటనవేలును విడుదల చేసి కుడి నాసికా రంధ్రం ద్వారా ఊపిరి పీల్చుకోండి. కుడి బొటన వేలితో కుడి ముక్కు రంధ్రాన్ని మూసివేసి, ఎడమ ముక్కు రంధ్రము ద్వారా శ్వాసను వదలాలి. ఇది ఒక రౌండ్‌ ఇలా ఐదు రౌండ్లు ప్రతి రోజు ప్రాక్టీస్ చేయాలి.

శవాసన

మరొక సులభమైన ఆసనం శవాసనం. శారీరక, మానసిక ఆరోగ్యాన్ని మెరుగుపరచడానికి ఉత్తమమైన వ్యాయామాలలో ఇది ఒకటి. దీన్ని చేయడానికి, మీరు చేయాల్సిందల్లా యోగా మ్యాట్‌పై ఫ్లాట్‌గా పడుకుని, ఆపై మీ రెండు చేతులను పైకి చూస్తున్నట్లు ఉంచాలి. ఈ స్థితిలో ఉన్నప్పుడు, కళ్ళు మూసుకుని ప్రశాంతంగా ఉండాలి. దీర్ఘ శ్వాస తీసువాలి. ఉత్తమ ఫలితాల కోసం, సుమారు 10 నిమిషాల పాటు ఈ స్థితిలో ఉండాలి.

అర్ధ హలాసనం

యోగా మ్యాట్ మీద పడుకుని చేతులు రెండూ థైస్‌కి దగ్గరగా ఉంచాలి. అరచేతులను క్రిందకు ఆన్చాలి. ఇప్పుడు నెమ్మదిగా రెండు కాళ్లను నేల నుండి తొంభై డిగ్రీల వరకు ఎత్తాలి.మోకాళ్లను వంచకూడదు. ఈ విధంగా 30 సెకన్లు ఈ స్థితిలో ఉండేందుకు ప్రయత్నించాలి. ఇది పెల్విక్ ప్రాంతంలో రక్త ప్రవాహాన్ని మెరుగుపరుస్తుంది. ఇది పునరుత్పత్తి అవయవాల ఆరోగ్యాన్ని మెరుగుపరుస్తుంది.

భుజంగాసనం

ఈ ఆసనాన్ని కోబ్రా భంగిమ అని కూడా పిలుస్తారు. ఇది PCOD/PCOSతో బాధపడుతున్న మహిళలకు బాగా సిఫార్సు చేయబడింది. బోర్లా పడుకుని మోచేతులను శరీరానికి దగ్గరగా ఉంచాలి. అరచేతులు క్రిందికి ఉండేలా చూసుకోండి. ఊపిరి తీసుకుంటూ ఛాతీని నేల నుండి నాభి వరకు ఎత్తాలి. కనీసం 15-30 సెకన్ల పాటు భంగిమలో ఉండాలి.

ఇర్రెగ్యులర్ పీరియడ్స్ నుంచి, పీసీఓడీ, పీసీఓస్ ప్రాబ్లమ్స్ నుంచి బయటపడాలంటే యోగా చేయడం అలవాటుగా మార్చుకోవాలి. ఆహారపు అలవాట్లను కూడా మార్చుకోవాలి. జంక్ ఫుడ్‌కి దూరంగా ఉండాలి.. మంచి పోషకాహారాన్ని శరీరానికి అందించాలి. పరిస్థితి తీవ్రతను బట్టి వైద్యులను సంప్రదించడం అవసరం.