Hindenburg: అదానీ లెక్క తేలింది.. ఇప్పుడు మరో కంపెనీ చిట్టా విప్పనున్న హిండెన్‌బర్గ్
Hindenburg: US షార్ట్ సెల్లర్ హిండెన్‌బర్గ్ రీసెర్చ్ త్వరలో మరో నివేదికతో ముందుకు రావడానికి సిద్ధంగా ఉంది. జనవరిలో సంస్థ వెల్లడించిన నివేదిక అదానీ గ్రూప్‌ను తీవ్రంగా దెబ్బతీసింది. ఈ మేరకు సోషల్ మీడియాలో పోస్ట్ పెట్టింది హిండెన్‌బర్గ్. "త్వరలో కొత్త నివేదిక-మరో పెద్దది" అని హిండెన్‌బర్గ్ ట్విట్టర్‌లో పేర్కొన్నారు. 2017లో నాథన్ ఆండర్సన్ స్థాపించిన హిండెన్‌బర్గ్ రీసెర్చ్ LLC, దాని వెబ్‌సైట్ ప్రకారం ఫోరెన్సిక్ ఆర్థిక పరిశోధనలో ప్రత్యేకత కలిగి ఉంది. న్యూయార్క్ ఆధారిత పెట్టుబడి పరిశోధన సంస్థ. పోర్ట్-టు-పవర్ సమ్మేళనం అదానీ గ్రూప్‌పై దిమ్మతిరిగే నివేదికను విడుదల చేసిన తర్వాత US షార్ట్ సెల్లర్ భారతదేశంలో ప్రజాదరణ పొందింది. జనవరి 24న విడుదల చేసిన నివేదిక, అదానీ గ్రూప్ వాల్యుయేషన్ నుండి బిలియన్ల కొద్దీ డాలర్లను తుడిచిపెట్టడంతో పాటు, పెట్టుబడిదారులు మరియు వాటాదారులను తీవ్రంగా దెబ్బతీసింది.
అదానీ గ్రూప్ హిండెన్‌బర్గ్ చేసిన ఆరోపణలను ఖండించినప్పటికీ, లిస్టెడ్ కంపెనీల విలువలకు ఇది ఇప్పటికీ భారీ నష్టాన్ని కలిగించింది. అదానీ గ్రూప్‌పై సంస్థ విడుదల చేసిన నివేదిక “అదానీ గ్రూప్: హౌ ది వరల్డ్స్ 3వ రిచెస్ట్ మ్యాన్ ఈజ్ పుల్లింగ్ ది లార్జెస్ట్ కాన్ ఇన్ కార్పోరేట్ హిస్టరీ”. నిజంగానే ఒక సంచలనం సృష్టించింది. ఈ నివేదిక అదానీ గ్రూప్‌కి అక్షరాలా $150 బిలియన్ డాలర్లను నష్టపోయేలా చేసింది. ఫలితంగా గౌతమ్ అదానీ నికర విలువ గణనీయంగా పడిపోయింది. ఈ నివేదిక రాజకీయ చర్చకు దారితీసింది. ప్రతిపక్ష పార్టీలు పార్లమెంటులో JPC విచారణను డిమాండ్ చేశాయి.
అదానీ-హిండెన్‌బర్గ్ గొడవకు సంబంధించి సుప్రీం కోర్టులో పిటిషన్లు కూడా దాఖలయ్యాయి. దాంతో అదానీ గ్రూప్ తన రుణాన్ని తీవ్రంగా తగ్గించుకోవడం, పెట్టుబడిదారుల విశ్వాసాన్ని తిరిగి పొందడం తప్ప వేరే మార్గం లేకుండా పోయింది. ఫలితంగా, వ్యయాన్ని తగ్గించే ప్రయత్నంలో కీలక ప్రాజెక్టులకు విరామం ఇవ్వవలసి వచ్చింది.
హిండెన్‌బర్గ్ ఇతర పెద్ద నివేదికలు
సెప్టెంబర్ 2020లో ఎలక్ట్రిక్ ట్రక్కుల తయారీ సంస్థ నికోలా కార్ప్‌కి వ్యతిరేకంగా హిండెన్‌బర్గ్ గతంలో కూడా ప్రధాన నివేదికలను అందించింది. హిండెన్‌బర్గ్ రీసెర్చ్ తన వెబ్‌సైట్‌లో “నికోలా: హౌ టు పార్లే యాన్ ఓషన్ ఆఫ్” అనే పేరుతో ఒక నివేదికను విడుదల చేసింది. హిండెన్‌బర్గ్ రీసెర్చ్ దాని వెబ్‌సైట్ ప్రకారం కనీసం 17 కంపెనీలపై తన కలాన్ని ఝళిపించింది. ఇప్పుడు మరో కంపెనీపై తన అస్త్రాన్ని సంధించనుంది.
