బ్యాంకులు కొత్తరకం బాదుడు.. నగదు వేసినా తీసినా..

కరోనా తెచ్చిన కష్టం నుంచి ఇంకా బయటపడనేలేదు. బ్యాంకులు మరో కొత్త తరహా బాదుడుతో కస్టమర్లను ఇబ్బందికి గురి చేస్తున్నాయి. బ్యాంకులో నగదు డిపాజిట్ చేసినా, డ్రా చేసినా ఛార్జీల రూపంలో భారం వేస్తున్నాయి. కోవిడ్ నేపథ్యంలో నగదు నిర్వహణ భారం పెరిగిందని బ్యాంకులు చెబుతున్నాయి. నవంబరు 1 నుంచి ప్రైవేటు, కొన్ని ప్రభుత్వ రంగ బ్యాంకులు ఈ విధానాన్ని ఇప్పటికే అనుసరిస్తున్నాయి. ఏటీఎం నగదు ఉపసంహరణ, క్యాష్ డిపాజిట్ మిషన్లలో నగదు వేసినా జేబుకు చిల్లు పడుతోంది. కొన్ని ప్రభుత్వ రంగ బ్యాంకుల్లో నెలకు ఐదు లావాదేవీలు ఉచితంగా నిర్వహించుకునే వీలుండేది. ఇప్పుడు వెసులుబాటును మూడింటికి తగ్గించారు.

రూ.వెయ్యికి రూ.2 నుంచి రూ.5

బ్యాంకుల్లో పొదుపు ఖాతాలపై ప్రస్తుతం 2 శాతం వడ్డీ లభిస్తోంది. ఫిక్స్‌డ్ డిపాజిట్‌లపై స్వల్ప కాలానికి 3 శాతానికి మించి రావడం లేదు. బ్యాంకులు నగదు డిపాజిట్లపై వసూలు చేస్తున్న ఛార్జీలు అంతకు మూడు రెట్లు ఉంటున్నాయి. ప్రభుత్వ బ్యాంకులు పరిమితి దాటిన తరువాత ప్రతి వెయ్యికి రూ.2 చొప్పున తీసుకుంటున్నాయి. ప్రైవేటు బ్యాంకులు రూ.2 నుంచి రూ.5ల వరకు ఛార్జీలు వసూలు చేస్తున్నాయి. దీనిపై జీఎస్టీ అదనం. '' మా బ్యాంకులో 75 శాత లావాదేవీలు నగదుతో జరుగుతున్నాయి. నగదు రహిత లావాదేవీలను ప్రోత్సహించేందుకు ఈ ఛార్జీలు వసూలు చేస్తున్నాయి. దీనిపై జీఎస్టీ అదనం. మా బ్యాంకులో 75 శాతం లావాదేవీలు నగదుతో జరుగుతున్నాయి.

నగదు రహిత లావాదేవీలను ప్రోత్సహించేందుకు ఈ ఛార్జీలు వసూలు చేస్తున్నాం. ఏటీఎం, నేరుగా ఉపసంహరణలు, నగదు డిపాజిట్లు నెలకు రూ.2 లక్షలు దాటితే ఛార్జీలు వేస్తున్నాం అని దిల్‌సుఖ్‌నగర్‌లోని ఓ బ్యాంకు ఉద్యోగి తెలిపారు. ఛార్జీలు వసూలు చేస్తున్న విషయం ఖాతాదారులకు తెలియడం లేదు. నగదు డిపాజిట్ చేసేవారికి బ్యాంకు సిబ్బంది వివరాలు చెప్పాలి. ఈ విషయమై ఇప్పటికే బ్యాంకు ఉద్యోగ సంఘాలు విజ్ఞప్తి చేశాయి అని ఏపీ, తెలంగాణ బ్యాంకు ఉద్యోగుల సమాఖ్య కార్యదర్శి ఎం.ఎస్. కుమార్ తెలిపారు.

నగదు నిర్వహణ భారం పెరగడంతో బ్యాంకులు తప్పనిసరి పరిస్థితుల్లో అమలు చేస్తున్నట్లు కొందరు బ్యాంకర్లు తెలిపారు. రూ.20 లక్షల నగదు నిర్వహణ పరిమితి ఉన్న బ్యాంకులో రూ. 30 లక్షల నగదు డిపాజిట్లు వస్తే మిగతా రూ.10 లక్షల డిపాజిట్లను క్యాష్ చెస్ట్‌ల్లోకి తరలించాలి. కరెన్సీ తనిఖీ చేసి చినిగిన నోట్లను ఉపసంహరించాలి. ఇలా ఖర్చులు పెరగడంతో బ్యాంకులు ఛార్జీలు వసూలు చేయాల్సి వస్తోందని వివరించారు.