అయ్యారే అధికారి.. వాటర్ అనుకుని పొరపాటున..

టెన్షన్‌లో ఒకటి చేయబోయి మరోటి చేస్తాం.. పొరపాట్లు అందరికీ జరుగుతాయి. అందులో వింతేముంది. అధికారి చేస్తే వింతే మరి.. అదీ వాటర్ బదులు శానిటైజర్ తాగితే.. ఇంకేమన్నా ఉందా.. పాపం ఆయనకు ఏం కాలేదుకదా.. అదృష్టం బావుంది.. గమనించిన సెక్యూరిటీ వెంటనే ఆయన్ని అలర్ట్ చేశారు. దాంతో ఆయన సేవ్ అయ్యారు. అధికారి చేసిన ఆ పని సోషల్ మీడియాలో వైరల్ అయ్యింది. బృహన్ ముంబై మునిసిపల్ కార్పొరేషన్ (బిఎంసి) అసిస్టెంట్ కమిషనర్ రమేష్ పవార్ మంచినీళ్లనుకుని శానిటైజర్ తాగి వార్తల్లో నిలిచారు.

పవార్ బిఎంసి విద్యా బడ్జెట్‌ను సమర్పిస్తున్నప్పుడు ఈ సంఘటన జరిగింది. వైరల్ అవుతున్న ఈ వీడియోలో పవార్ టేబుల్ మీద ఉంచిన బాటిల్‌ను చూసుకోకుండా తాగేస్తున్నారు. అది నీరు కాదని గ్రహించిన మరుక్షణం దాన్ని ఉమ్మివేయడంతో ముగుస్తుంది. ఆయన తాగింది శానిటైజర్. పక్కనే కూర్చున్న అధికారి అతన్ని శానిటైజర్ తాగకుండా ఆపడానికి ప్రయత్నించినప్పటికీ, అప్పటికే ఆలస్యం అవడంతో పవార్ సిప్ చేశారు. తరువాత, అధికారులు పవార్‌కు వాటర్ ‌బాటిల్ ఇచ్చారు.

మహారాష్ట్రలోని యావత్మల్‌లో సోమవారం పోలియో వ్యాక్సిన్‌కు బదులుగా శానిటైజర్ చుక్కలు ఇచ్చిన తరువాత ఐదు సంవత్సరాల కంటే తక్కువ వయస్సు ఉన్న పన్నెండు మంది పిల్లలు ఆసుపత్రిలో చేర్పించిన ఘటన ఇంకా మర్చిపోక ముందే ఇది జరిగింది.

2021-22 సంవత్సరానికి విద్యా బడ్జెట్ కోసం నిధుల కేటాయింపును బృహన్ ముంబై మునిసిపల్ కార్పొరేషన్ (బిఎంసి) బుధవారం ప్రకటించింది. ప్రస్తుత మహమ్మారిని దృష్టిలో ఉంచుకుని బిఎంసి తన బడ్జెట్‌లో విద్యా రంగానికి రూ .2,945.78 కోట్లు కేటాయించింది. ఇది అంతకుముందు సంవత్సరంతో పోలిస్తే స్వల్పంగా ఉంది, బడ్జెట్ అంచనాలు రూ .2944.59 కోట్లు.