ఛత్తీస్‌గఢ్‌లో భారీ ఎన్‌కౌంటర్
ఛత్తీస్‌గఢ్ అడవుల్లో మరోసారి కాల్పుల మోతలతో దద్దరిల్లింది. బీజాపూర్ జిల్లాలో భీకర ఎన్‌కౌంటర్ జరిగింది. మావోయిస్టులు, భద్రతా దళాల మధ్య ఎదురుకాల్పులు జరిగాయి. ఈ ఎన్‌కౌంటర్‌లో ఐదుగురు భద్రతా సిబ్బంది మరణించగా... ఇద్దరు మావోయిస్టులు హతమైయ్యారు. మరికొంత మంది జవాన్లకు గాయాలయినట్లు ఛత్తీస్‌గఢ్ డీజీపీ డీఎం అవస్థి తెలిపారు. బీజాపూర్ జిల్లాలోని తార్రెమ్ అటవీ ప్రాంతంలో ఈ ఘటన జరిగినట్లు వెల్లడించారు. గాయపడ్డ జవాన్లలో పలువురి పరిస్థితి విషమంగా ఉన్నట్లు తెలుస్తోంది.
సుక్మా, బీజాపూర్ సరిహద్దు వెంబడి ఉన్న అటవీ ప్రాంతంలో భద్రతా సిబ్బంది.. నక్సల్స్‌ వ్యతిరేక ఆపరేషన్ చేపట్టారు. ఈ క్రమంలో నక్సల్స్‌ కాల్పులు జరపగా.. భద్రతా సిబ్బంది ఎదురుకాల్పులు చేపట్టారు. ఈ ఎన్ కౌంటర్‌లో ఐదురుగు జవాన్లు ప్రాణాలు కోల్పోయారు. గత కొద్ది రోజులుగా మావోయిస్టులు రెచ్చిపోతున్నారు. గత నెల 23న నారాయణ పూర్ జిల్లాలో మావోయిస్టులు భద్రతా సిబ్బంది ప్రయాణిస్తున్న వాహనాన్ని పేల్చేశారు. ఆ ఘటనలో ఐదుగురు జవాన్లు ప్రాణాలు కోల్పోయారు.
