కరోనా విజృంభణ నేపథ్యంలో కేంద్రం అప్రమత్తం..

దేశంలో కరోనా మహమ్మారి విజృంభిస్తున్న నేపథ్యంలో కేంద్రం అప్రమత్తమైంది. నియంత్రణ చర్యలపై చర్చించేందుకు కేంద్ర కేబినేట్ భేటీ జరగనుంది. ప్రధాని మోదీ అధ్యక్షతన ఈ సమావేశం జరుగుతోంది. కరోనా నియంత్రణ, వైద్య రంగంలో మౌలిక వసతుల కల్పనపై చర్చించనున్నారు. ఈ సమావేశంలో కొత్తగా ఆక్సిజన్ ప్లాంట్ ఏర్పాటుపై నిర్ణయం తీసుకునే అవకాశం ఉంది. వ్యాక్సినేషన్ పై కూడా ప్రధానంగా చర్చించనున్నారు. ఫేజ్ 3 వ్యాక్సినేషన్ లో భాగంగా మే ఒకటి నుంచి 18 సంవత్సరాలు నిండిన వారికి టీకా వేయాలని నిర్ణయించిన నేపథ్యంలో ఈ భేటీ ప్రాధాన్యత సంతరించకుంది.

ఈ క్రమంలోనే సాయంత్రం 6 గంటలకు టీకా తయారీ సంస్థలతో ప్రధాని మోదీ వీడియో కాన్ఫరెన్స్ నిర్వహించనున్నారు. ఈ సమావేశంలో బయోటెక్నాలజీ విభాగం ప్రజెంటేషన్ ఇవ్వడంతో పాటు కంపెనీలను సమన్వయం చేసుకుంటుందని సంబంధిత వర్గాలు తెలిపాయి. దేశీయ టీకా తయారీదారులతో పాటు విదేశాలకు చెందిన అగ్రశ్రేణి వ్యాక్సిన్ తయారీ ప్రతినిధులు ఈ సమావేశంలో పాల్గొననున్నట్లు తెలుస్తోంది. ఇప్పటికే దేశంలో మూడు టీకాలకు అనుమతి ఇచ్చారు.