AMIT SH A: "కాంగ్రెస్ పాపం నుంచి అస్సాంకు విముక్తి కలిగిస్తాం"
కేంద్ర హోం మంత్రి అమిత్ షా అస్సాం పర్యటనలో భాగంగా చొరబాటుదారుల అంశంపై అత్యంత కీలక వ్యాఖ్యలు చేశారు. దేశం నుండి నక్సలిజాన్ని ఏ విధంగానైతే తుడిచిపెడుతున్నామో, అదే రీతిలో త్వరలోనే అక్రమ చొరబాటుదారులను కూడా పూర్తిగా ఏరివేస్తామని ఆయన స్పష్టం చేశారు. రాబోయే ఐదేళ్ల కాలంలో అక్రమ వలసదారుల పేర్లను కేవలం ఓటర్ల జాబితా నుండి తొలగించడమే కాకుండా, వారిని దేశం సరిహద్దుల వెలుపలికి పంపిస్తామని అమిత్ షా ధీమా వ్యక్తం చేశారు. కామ్రూప్లో పోలీస్ 10వ బెటాలియన్ కొత్త క్యాంపస్కు శంకుస్థాపన చేసిన అనంతరం నిర్వహించిన భారీ బహిరంగ సభలో ఆయన ఈ గంభీర ప్రకటన చేశారు. చొరబాటుదారులు అక్రమంగా ఆక్రమించుకున్న స్థలాలను వారి చెర నుండి విడిపించి, ఇప్పుడు అదే ప్రదేశంలో కొత్త పోలీస్ క్యాంపస్ను నిర్మిస్తుండటం గమనార్హం. గతంలో కాంగ్రెస్ నాయకుడు రాహుల్ గాంధీ చొరబాటుదారులను తొలగిస్తామని అస్సాం ప్రజలకు హామీ ఇచ్చి మాట తప్పారని అమిత్ షా విమర్శించారు. అక్రమ వలసదారులే కాంగ్రెస్ పార్టీకి ప్రధాన ఓటు బ్యాంకుగా మారడం వల్లే ఆ పార్టీ ఈ విషయంలో వెనకడుగు వేస్తోందని ఆయన ఎద్దేవా చేశారు. ప్రస్తుతం ఎన్నికల సంఘం చేపట్టిన స్పెషల్ ఇంటెన్సివ్ రివిజన్ ప్రక్రియ ద్వారా అక్రమ వలసదారులను గుర్తించే పని వేగంగా జరుగుతోందని వివరించారు.
ఓటర్ల జాబితా ప్రక్షాళనను రాహుల్ గాంధీ వ్యతిరేకిస్తూ నిరసనలు తెలుపుతున్నప్పటికీ, అస్సాంలో ఈ ప్రక్రియ నిరంతరాయంగా కొనసాగుతుందని కేంద్ర మంత్రి వెల్లడించారు. కాంగ్రెస్ అవలంబిస్తున్న ఓటు బ్యాంకు రాజకీయాల వల్ల అస్సాం ప్రజల మనుగడకు, భూమికి, రాష్ట్ర పునాదులకు పెను ముప్పు ఏర్పడిందని ఆందోళన వ్యక్తం చేశారు. నిజంగా దేశం నుండి చొరబాటుదారులను తరిమేయాలనే సంకల్పం కాంగ్రెస్ పార్టీకి ఉంటే, రాబోయే అస్సాం అసెంబ్లీ ఎన్నికల మేనిఫెస్టోలో ఆ అంశాన్ని చేర్చాలని అమిత్ షా బహిరంగ సవాల్ విసిరారు. చొరబాటుదారుల విషయంలో కాంగ్రెస్ వైఖరిని ప్రజలు గమనిస్తున్నారని ఆయన గుర్తు చేశారు. కాంగ్రెస్ పార్టీ అనుసరించిన విధానాల వల్లే ధుబ్రి, బర్పేటా, డర్రాంగ్, మొరిగావ్, బొంగైగావ్, నగావ్, గోల్పారా వంటి కీలక జిల్లాలు ముస్లిం ఆధిపత్యంలోకి వెళ్లాయని అమిత్ షా గణాంకాలతో సహా వివరించారు. కాంగ్రెస్ చేసిన ఈ చారిత్రక తప్పిదం వల్ల అస్సాం ప్రజలు అనుభవిస్తున్న బాధల నుండి భారతీయ జనతా పార్టీ మాత్రమే విముక్తి కలిగిస్తుందని భరోసా ఇచ్చారు. రాష్ట్రంలో మళ్ళీ బీజేపీ అధికారంలోకి వస్తేనే చొరబాటుదారుల సమస్యకు శాశ్వత పరిష్కారం దొరుకుతుందని, సరిహద్దుల భద్రత మరింత పటిష్టమవుతుందని ఆయన ఈ సందర్భంగా ప్రజలకు పిలుపునిచ్చారు.
గత పదేళ్ల బీజేపీ పాలనలో అస్సాం రాష్ట్రంలో శాంతిభద్రతలు గణనీయంగా మెరుగుపడ్డాయని కేంద్ర హోం మంత్రి ప్రశంసించారు. ముఖ్యమంత్రి హిమంత బిశ్వ శర్మ నాయకత్వంలోని ప్రభుత్వం రాష్ట్ర అభివృద్ధికి అంకితభావంతో పనిచేస్తోందని కొనియాడారు. పేదరికం నిర్మూలన, నిరుద్యోగ సమస్య పరిష్కారం, ప్రతి ఏటా సంభవించే వరదల నుండి విముక్తి కల్పించే దిశగా ప్రభుత్వం వేగంగా అడుగులు వేస్తోందని తెలిపారు. డబుల్ ఇంజిన్ సర్కార్ వల్ల అస్సాం రాష్ట్రం ఈరోజు ఈశాన్య భారత దేశంలోనే అభివృద్ధికి కేరాఫ్ అడ్రస్గా నిలుస్తోందని అమిత్ షా ధీమా వ్యక్తం చేశారు. అస్సాం సంస్కృతిని, సంప్రదాయాలను కాపాడుకోవడానికి ప్రధాని నరేంద్ర మోదీ నాయకత్వంలోని కేంద్ర ప్రభుత్వం కట్టుబడి ఉందని ఆయన స్పష్టం చేశారు. అక్రమ వలసల వల్ల స్థానిక ప్రజల హక్కులకు భంగం కలగకుండా చూస్తామని, చొరబాటుదారులకు ఇక్కడ స్థానం లేదని కుండబద్దలు కొట్టారు. అస్సాం ఉజ్వల భవిష్యత్తు కోసం ప్రజలంతా ఏకతాటిపైకి వచ్చి చొరబాటు రహిత రాష్ట్రంగా మార్చుకోవడానికి సహకరించాలని కోరారు. అభివృద్ధి పథంలో దూసుకుపోతున్న అస్సాంకు అక్రమ వలసదారుల సమస్య పెద్ద ఆటంకమని, దానిని త్వరలోనే పరిష్కరిస్తామని హామీ ఇస్తూ తన ప్రసంగాన్ని ముగించారు.