ఎన్నికలు సమీపిస్తున్న వేళ.. బీజేపీలోకి మరో కాంగ్రెస్ మాజీ!!

వచ్చే లోక్‌సభ ఎన్నికల ప్రకటనకు మరికొద్ది రోజులు మాత్రమే సమయం ఉంది. అయితే అంతకుముందే ఉత్తరప్రదేశ్‌లో కాంగ్రెస్‌కు మరో ఎదురుదెబ్బ తగిలింది.

ఉత్తరప్రదేశ్‌లో కాంగ్రెస్ మాజీ నాయకుడు అజయ్ కపూర్ బీజేపీలో చేరే అవకాశాలు మెండుగా కనిపిస్తున్నాయి.అజయ్ కపూర్ బుధవారం బీజేపీలో చేరడానికి అన్నీ సెట్ చేసుకున్నారని సమాచారం. మూడుసార్లు ఎమ్మెల్యేగా, కాంగ్రెస్ జాతీయ కార్యదర్శిగా కూడా పనిచేసిన అజయ్ బీహార్‌లో పార్టీ ఇన్‌ఛార్జ్‌గా కూడా ఉన్నారు. కాన్పూర్‌లోని పెద్ద నాయకులలో ఒకరిగా పరిగణింపబడుతున్నారు.

కాంగ్రెస్ మాజీ నేత అజయ్ కపూర్ 2002లో తొలిసారి ఎమ్మెల్యే అయ్యారు. ఆ తర్వాత వరుసగా మూడుసార్లు ఎన్నికల్లో విజయం సాధించారు. 2002 నుంచి 2017 వరకు ఎమ్మెల్యేగా ఉన్నారు. అజయ్ కపూర్ కాన్పూర్‌లోని గోవింద్ నగర్, కిద్వాయ్ నగర్ స్థానాల నుండి ఎమ్మెల్యేగా ఉన్నారు. కాన్పూర్ నుంచి బీజేపీ అభ్యర్థుల రేసులో ఆయన పేరు ఉన్నట్లు సమాచారం. వచ్చే ఎన్నికల్లో ఆయనను పార్టీ అభ్యర్థిగా నిలబెట్టవచ్చు.

56 ఏళ్ల అజయ్ కపూర్ ప్రస్తుతం కాన్పూర్‌లోని కిద్వాయ్ నగర్ అసెంబ్లీకి ఓటరుగా ఉన్నారు. గత 2022 అసెంబ్లీ ఎన్నికలలో, కాంగ్రెస్ ఈ స్థానం నుండి అజయ్ కపూర్‌ను అభ్యర్థిగా నిలబెట్టింది. అయితే ఎన్నికల్లో ఓటమి చవిచూడాల్సి వచ్చింది. అప్పుడు బీజేపీ అభ్యర్థి మహేష్ త్రివేది దాదాపు 38 వేల ఓట్ల తేడాతో గెలుపొందగా, అజయ్ కపూర్‌కు దాదాపు 76 వేల ఓట్లు వచ్చాయి.

మరోవైపు, మాజీ ఎమ్మెల్యే ఆస్తుల గురించి మాట్లాడితే, గత ఎన్నికల్లో నామినేషన్ సందర్భంగా ఇచ్చిన సమాచారం ప్రకారం, అతని మొత్తం ఆస్తులు రూ.69 కోట్లు. అయితే గత 15 ఏళ్లలో ఆయన సంపద దాదాపు 14 రెట్లు పెరిగింది. అజయ్ కపూర్ కంటే ముందు, వారణాసి మాజీ ఎంపీ రాజేష్ మిశ్రా కూడా బీజేపీలో చేరారు.