Shashi Tharoor: శశిథరూర్‌ పై కాంగ్రెస్ హైకమాండ్ అసహనం!
భారత్-పాకిస్థాన్ వివాదంపై కాంగ్రెస్ పార్టీ సీనియర్ నేత, తిరువనంతపురం ఎంపీ శశి థరూర్ తరచుగా చేస్తున్న వ్యాఖ్యలపై సొంత పార్టీ నుంచే తీవ్ర అభ్యంతరాలు వ్యక్తమవుతున్నాయి. ఈసారి ఆయన వ్యాఖ్యలు 'లక్ష్మణరేఖ'ను దాటాయని పార్టీ అంతర్గత వర్గాలు అభిప్రాయపడినట్లు సమాచారం. ఈ పరిణామం కాంగ్రెస్ పార్టీలో చర్చనీయాంశంగా మారింది.
ఢిల్లీలోని 24, అక్బర్ రోడ్‌లో గల కాంగ్రెస్ పార్టీ కేంద్ర కార్యాలయంలో నేడు కీలక సమావేశం జరిగింది. ఈ సమావేశానికి పార్టీ మాజీ అధ్యక్షుడు రాహుల్ గాంధీ, ప్రధాన కార్యదర్శులు కేసీ వేణుగోపాల్, జైరాం రమేష్, ప్రియాంక గాంధీ వాద్రాతో పాటు సీనియర్ నేతలు సచిన్ పైలట్, శశి థరూర్ తదితరులు హాజరయ్యారు. ఈ భేటీ అనంతరం థరూర్ వ్యాఖ్యలపై పార్టీ వర్గాల నుంచి అసంతృప్తి వ్యక్తమైనట్లు తెలిసింది.
"మాది ప్రజాస్వామ్యబద్ధమైన పార్టీ. నాయకులు తమ అభిప్రాయాలను స్వేచ్ఛగా వెల్లడించే అవకాశం ఇక్కడ ఉంటుంది. అయితే, ఈసారి శశి థరూర్ మాత్రం తన వ్యాఖ్యలతో హద్దులు మీరారు. ఆయన లక్ష్మణరేఖను దాటారు" అని ఓ పార్టీ ప్రతినిధి పేర్కొన్నట్లు విశ్వసనీయ వర్గాలు తెలిపాయి. వ్యక్తిగత అభిప్రాయాల వెల్లడికి ఇది సమయం కాదని, పార్టీ వైఖరికి కట్టుబడి ఉండాలని తాజా సమావేశంలో అధిష్ఠానం సూచించినట్లు తెలుస్తోంది.