Delhi blast case: ఢిల్లీ నిందితులకు 10 రోజుల జ్యుడీషియల్‌ కస్టడీ
దేశ రాజధాని ఢిల్లీలోని ఎర్రకోట సమీపంలో జరిగిన ఆత్మాహుతి దాడి కేసులో నిందితులుగా ఉన్న ముగ్గురు వైద్యులు, ఒక మత ప్రచారకుడికి ఢిల్లీ హైకోర్టు 10 రోజుల జ్యుడీషియల్‌ కస్టడీ విధించింది. వైద్యులు ముజమ్మిల్‌ గనయీ, ఆదిల్‌ రాథర్, షాహీనా సయీద్, మత ప్రచారకుడు మౌల్వీ ఇఫ్రాన్‌ అహ్మద్‌లను శనివారం జాతీయ దర్యాప్తు సంస్థ (NIA) కోర్టులో ప్రవేశపెట్టగా.. కస్టడీ విధించారు.
ఈ కేసులో ఎన్‌ఐఏ ఇప్పటివరకు ఏడుగురిని అదుపులోకి తీసుకుని విచారిస్తున్నది. మరోవైపు ఈ కేసులో కీలక కేంద్రంగా ఉన్న అల్‌ ఫలా యూనివర్సిటీలో తాజాగా అధికారులు సోదాలు చేశారు. కీలక నిందితురాలైన షాహీనా సయీద్ ఉన్న గదిలో రూ.18 లక్షల నగదు దొరికినట్లు పలు జాతీయ మీడియా కథనాలు ప్రచురితమయ్యాయి. ఈ నగదు మొత్తాన్ని ‘వైట్‌ కాలర్‌ టెర్రర్‌ మాడ్యూల్‌’ కార్యకలాపాల కోసం ఉపయోగించేందుకే దాచినట్లు తెలుస్తోంది.
కాగా ఎర్రకోట సమీపంలో ఓ ఉగ్రవాది కారులో పేలుడు పదార్థాలతో వచ్చి ఆత్మాహుతి దాడికి పాల్పడ్డాడు. ఈ దాడిలో 13 మంది ప్రాణాలు కోల్పోయారు. మరికొందరికి గాయాలయ్యాయి.