Dog Heart Surgery In Delhi : శునకానికి అరుదైన హార్ట్ సర్జరీ
భారత ఉపఖండంలో తొలిసారి ఓ శునకానికి అరుదైన హార్ట్ సర్జరీ నిర్వహించారు ఢిల్లీకి చెందిన ప్రయివేటు వెటర్నరీ వైద్యులు. సంక్లిష్టమైన గుండె సమస్యను ఎదుర్కొంటున్న ఆ శునకానికి కోతలేకుండానే సర్జరీ నిర్వహించడం విశేషం. ఏడేళ్ల వయసున్న జూలియట్ అనే శునకానికి ఈ సర్జరీ చేశారు. గత రెండేళ్లుగా జూలియట్ మైట్రల్‌ కవాటాల్లో సమస్యతో బాధపడుతోంది. వయసు పెరగడంతోపాటు వచ్చే క్షీణతల వల్ల జంతువుల్లో ఈ సమస్య ఉత్పన్నమవుతుంది. శునకాలకు వచ్చే గుండె సమస్యల్లో దీని వాటా 80 శాతం కాగా.. దీనివల్ల గుండె ఎడమ ఎగువ భాగంలో రక్తప్రవాహం వెనక్కి వస్తుంది.
ఈ వ్యాధి తీవ్రమైతే ఊపిరితిత్తుల్లో రక్తం, ద్రవాల పరిమాణం పెరిగి క్రమంగా గుండె వైఫల్యానికి దారితీస్తుంది. ఈ సమస్యతో బాధపడుతోన్న జూలియట్‌కు ఢిల్లీలోని మ్యాక్స్ పెట్జ్ హాస్పిటల్ నిపుణులు విజయవంతంగా సర్జరీ నిర్వహించారు. ట్రాన్స్‌కెథతర్‌ ఎడ్జ్‌-టు-ఎడ్జ్‌ రిపెయిర్‌ (టీఈఈఆర్‌) అనే ప్రక్రియ ద్వారా ఈ చికిత్స చేపట్టారు. ఎటువంటి కోత అవసరం లేకుండా రక్తనాళం ద్వారా ఒక సాధనాన్ని పంపి లోపాన్ని సరిచేశారు. గుండె కొట్టుకుంటుండగానే ఈ ప్రక్రియను పూర్తిచేయడం మరో విశేషం. మే 30న జూలియట్‌కు శస్త్రచికిత్సను నిర్వహించగా.. రెండు రోజుల అనంతరం డిశ్ఛార్జి చేశారు.
కొద్ది రోజుల క్రితమే మనుషుల లాగానే కోతికి క్యాటరాక్ట్ శస్త్ర చికిత్స చేసి కంటి చూపు వచ్చేలా చేశారు హరియాణా పశు వైద్యులు. హిసార్లో ఉన్న యూనివర్సిటీ ఆఫ్ వెటర్నరీ అండ్ యానిమల్ సైన్సెస్(LUWAS) వారు ఈ సర్జరీ నిర్వహించారు. కోతికి ఈ తరహా చికిత్స చేయడం ఇదే మొదటిసారి అని వైద్యులు తెలిపారు.
హిసార్లోని ఓ కోతి కొద్ది రోజుల కిత్రం విద్యుత్ షాక్కు గురైంది. కాలిన గాయాలతో బాధపడుతున్న వానరాన్ని మునీశ్ కుమార్ అనే వ్యక్తి కాపాడి వెటర్నరీ విశ్వవిద్యాలయానికి తరలించాడు. వెటర్నరీ వైద్యులు కోతికి చికిత్స చేశారు. కొద్ది రోజులకు నడవగలిగింది. కానీ, ముందున్న వస్తువును గుర్తించలేకపోయింది. దీంతో మళ్లీ కోతిని పరిశీలించగా కంటి శుక్లాలు ఉన్నట్లు గుర్తించారు. దీంతో వానరానికి క్యాటరాక్ట్ సర్జరీ నిర్వహించారు. ఈ సర్జరీ సక్సెస్ కావడం వల్ల కోతికి కంటిచూపు వచ్చింది.