Mahakumbh 2025 : మహా కుంభమేళాకు 13,000 రైళ్లు

ఉత్తరప్రదేశ్‌లోని ప్రయాగ్‌రాజ్‌లో ఈసారి ప్రారంభమయ్యే మహా కుంభమేళాకుభారీగా భక్తులు తరలివస్తారని అధికారులు అంచనా వేస్తున్నారు. ఇదే క్రమంలో రైల్వే శాఖ కూడా అప్రమత్తమైంది. మహా కుంభమేళా 2025ని సందర్శించే యాత్రికుల రద్దీని దృష్టిలో ఉంచుకుని, భారతీయ రైల్వే 50 రోజుల్లో 13,000 రైళ్లను నడపనుంది. ఇందులో ఈ కార్యక్రమానికి ముందు, తర్వాత 2-3 అదనపు రోజుల్లో కూడా ఇవి నడవనున్నాయి. ఈ నేపథ్యంలో 10,000 సాధారణ రైళ్లు, 3,000 ప్రత్యేక రైళ్లను ఏర్పాటు చేస్తున్నారు. కుంభమేళా జరిగే 50 రోజులలో వీటిని సుదూర ప్రాంతాలకు నడపనున్నారు.

రైల్వే శాఖ ప్రత్యేక రైళ్లు

సుదూర ప్రాంతాలకు 700 మేళా ప్రత్యేక రైళ్లు, 200-300 కిలోమీటర్ల ప్రయాణాలకు 1,800 స్వల్ప దూర రైళ్లు నడపబడతాయి. ఇది కాకుండా ప్రయాగ్‌రాజ్, చిత్రకూట్, బనారస్, అయోధ్య వంటి చుట్టుపక్కల నగరాలకు చేరుకోవడానికి రింగ్ రైల్ సేవలు కూడా ఉంటాయి. యాత్రికులు సాఫీగా, సురక్షితంగా ఉండేలా నార్త్ సెంట్రల్ రైల్వే మరో ప్రణాళికను సిద్ధం చేసింది. గందరగోళం, రద్దీని నివారించడానికి ప్రజల కదలికను వన్-వేగా ఉంచుతుంది. తద్వారా రద్దీని నివారించవచ్చు. అలాగే గందరగోళం, రద్దీని తగ్గించడానికి ప్రయాణీకులు తమ ప్లాట్‌ఫారమ్‌లకు వెళ్లే ముందు 'ప్యాసింజర్ సెంటర్'కి మళ్లించబడతారు.

ఆరోగ్యం, అత్యవసర సేవలు

రైల్వేలు అన్ని ప్రధాన స్టేషన్లలో ప్రథమ చికిత్స, ఆరోగ్య సేవల కోసం మెడికల్ బూత్‌లు, చిన్న ఆసుపత్రులను ఏర్పాటు చేశాయి. శిక్షణ పొందిన వైద్య సిబ్బంది 24 గంటలూ అందుబాటులో ఉంటారు. అత్యవసర పరిస్థితుల్లో సహాయం చేయడానికి వ్యూహాత్మక ప్రదేశాలలో అంబులెన్స్‌లు ఉంచబడతాయి. స్థానిక ఆసుపత్రులతో అత్యవసర ప్రణాళికను కూడా సిద్ధం చేశారు.

ఎప్పటి నుంచి.. ఎప్పటి వరకు

ఈసారి ప్రయాగ్‌రాజ్‌లో కుంభమేళా మహోత్సవం జనవరి 13 నుంచి ఫిబ్రవరి 26 వరకు జరగనుంది. ఈసారి మహా జాతరకు దాదాపు 40 కోట్ల మందికిపైగా వస్తారని అంచనా వేశారు. ఇంత పెద్ద సంఖ్యలో ప్రజలు తరలివస్తారని, రద్దీని ఎదుర్కొనేందుకు ప్రత్యేక ప్రణాళికలు రూపొందించామని ఉత్తర మధ్య రైల్వే అధికారులు తెలిపారు. ట్రాఫిక్ జామ్‌ను తగ్గించడానికి అక్కడ స్టీల్ బ్రిడ్జ్ నిర్మాణం చేపడుతున్నారు. బ్రిడ్జి చాలా పటిష్టంగా ఉందని దీని నిర్మాణంలో నిమగ్నమైన వ్యక్తి ఉమేష్ కుమార్ పాండే అన్నారు. దీని నిర్మాణానికి గత 45-50 రోజులుగా కృషి చేస్తున్నామని, దాదాపు పూర్తయిందన్నారు. ట్రాఫిక్ జామ్‌ల నిర్వహణలో ఈ వంతెన ఉపయోగకరంగా ఉంటుంది.

అన్ని విభాగాలు పూర్తి స్థాయిలో

కుంభమేళా ప్రతి సంవత్సరం గంగా, యమునా, సరస్వతి నదుల సంగమం వద్ద నిర్వహించబడుతుంది. ఇది చారిత్రక, సాంస్కృతిక ప్రాముఖ్యతను కలిగి ఉంది. రైల్వేతో పాటు అన్ని శాఖలు కూడా జాతర సన్నాహాల్లో చురుగ్గా ఉన్నాయి. అదనంగా నేషనల్ డిజాస్టర్ రెస్పాన్స్ ఫోర్స్, స్థానిక ఏజెన్సీలు ఈ కార్యక్రమం కోసం మాక్ డ్రిల్‌లను నిర్వహించాయి. తద్వారా ఏదైనా అత్యవసర పరిస్థితిని ఎదుర్కొవచ్చు. ఈ కార్యక్రమం 12 సంవత్సరాలకు ఒక్కోసారి జరగడం వలన, దీనికి సంబంధించి అన్ని ఏర్పాట్లను సిద్ధం చేస్తున్నారు.