FARMERS: వ్యవసాయాభివృద్ధికి రూ.24వేల కోట్లు
కేంద్ర క్యాబినెట్‌ ‘పీఎం ధన్ ధాన్య కృషి యోజన’కు ఆమోదం తెలిపింది. వ్యవసాయ రంగాన్ని స్థిరంగా అభివృద్ధి చేయడం, రైతుల ఆదాయాన్ని పెంచడం లక్ష్యంగా రూపొందించిన ఈ పథకాన్ని దేశవ్యాప్తంగా 100 జిల్లాల్లో అమలు చేయనున్నారు. 2025–26 నుంచి ప్రారంభమయ్యే ఈ ప్రోగ్రామ్‌ను ఆరేళ్ల పాటు కొనసాగించనున్నారు. ప్రతి సంవత్సరం రూ.24వేల కోట్ల వ్యయం అంచనా వేయబడింది. ఈ యోజన ద్వారా పంటల్లో వైవిధ్యీకరణ, స్థిరమైన సాగుపద్ధతులు, నీటిపారుదల సదుపాయాలు, గ్రామీణ గోదాములు, రుణ సౌలభ్యం వంటి అంశాలపై దృష్టి సారించనున్నారు. మొత్తం 11 శాఖల 36 పథకాలను సమన్వయం చేసి, రాష్ట్ర ప్రభుత్వాలు, ప్రైవేటు భాగస్వాములతో కలిసి అమలు చేస్తారు. ఉత్పాదకత తక్కువగా ఉండే జిల్లాలు, పంటల విభిన్నత లేకపోవడం, రుణ ప్రాప్యత తక్కువగా ఉండటాన్ని దృష్టిలో పెట్టుకుని 100 జిల్లాలను ఎంపిక చేస్తారు. ఈ పథకాన్ని విజయవంతంగా అమలు చేయేందుకు జిల్లా, రాష్ట్ర, జాతీయ స్థాయిలో ప్రత్యేక కమిటీలను ఏర్పాటు చేసి, మొత్తం 117 పనితీరు సూచికల ఆధారంగా పర్యవేక్షించనున్నారు. దీని ద్వారా ఏటా 1.7 కోట్ల మంది రైతులకు లాభం చేకూరనుంది.
ఈ పథకం ద్వారా రైతులకు శాస్త్రీయ సాగుపద్ధతులు, మార్కెట్‌కు కనెక్టివిటీ, పంటల బీమా, విత్తనాలు, సేంద్రియ ఎరువుల ప్రోత్సాహం వంటి అంశాల్లో ప్రత్యేక దృష్టి ఉంటుంది. మౌలిక వసతుల మెరుగుదలతో పాటు, డిజిటల్ వ్యవసాయ విధానాలను కూడా ప్రోత్సహించనున్నారు. వ్యవసాయాన్ని లాభదాయకంగా మార్చేందుకు సాంకేతిక పరిజ్ఞానం వినియోగం పెంపొందించనున్నారు. రైతులకు శిక్షణ కార్యక్రమాలు, నూతన పద్ధతులపై అవగాహన కల్పించేందుకు ప్రత్యేక కేంద్రాలను కూడా ఏర్పాటు చేస్తారు. ప్రాంతీయ అవసరాలను బట్టి స్థానిక సంస్థలతో కలిసి కార్యాచరణ రూపొందించనున్నారు. పంట దిగుబడుల నిల్వ, ప్రాసెసింగ్ యూనిట్లు, మార్కెటింగ్ సౌకర్యాల కల్పన కూడా ఈ పథకంలో భాగంగా ఉంటుంది. వ్యవసాయంతో పాటు, డెయిరీ, ఫిషరీస్, హార్టికల్చర్ రంగాల్లో సమన్వయంతో అభివృద్ధి చేస్తారు. రైతు ఆదాయం రెండింతలు చేయాలన్న లక్ష్యంతో కేంద్రం ఈ పథకాన్ని అమలు చేయనుంది. సమగ్ర వ్యవసాయ ప్రణాళిక రూపంలో ఇది పిలవబడుతుంది. దీని అమలుతో గ్రామీణ ఆర్థిక వ్యవస్థపై గణనీయమైన ప్రభావం ఉండే అవకాశం ఉంది.
అమలు ఇలా..
వ్యవసాయ రంగంలో ఉత్పాదకతను పెంచడం, పంటల్లో వైవిధ్యీకరణ, స్థిరమైన వ్యవసాయ పద్ధతులను ప్రోత్సహించడం, పంటకోత తర్వాత గ్రామస్థాయిల్లో దిగుబడులను నిల్వ చేసేందుకు గోదాముల సదుపాయం, నీటిపారుదల సౌకర్యాలను మెరుగుపరచడం, రుణ లభ్యతను సులభతరం చేయడమే లక్ష్యంగా పీఎం ధన్ ధాన్య కృషి యోజనను రూపొందించారు. ఈ కార్యక్రమం కోసం ఏటా రూ.24వేల కోట్లు వ్యయం చేయనున్నారు. మొత్తం 11 శాఖల్లో 36 పథకాలు, రాష్ట్రంలోని ఇతర పథకాలు, ప్రైవేటు రంగంతో స్థానిక భాగస్వామ్యం ద్వారా దీన్ని అమలు చేయనున్నారు. ఉత్పాదకత తక్కువగా ఉండటం, అన్ని రుతువుల్లోనూ పంట సాగుబడి చేయకపోవడం, రుణ లభ్యత అత్యంత తక్కువగా ఉండటం అనే మూడు కీలక సూచికల ఆధారంగా 100 జిల్లాలను గుర్తిస్తారు. ఈ పథకం సమర్థవంతంగా అమలు జరిగేలా పర్యవేక్షించేందుకు జిల్లా, రాష్ట్ర, జాతీయ స్థాయిలో కమిటీలను ఏర్పాటు చేయనున్నారు. ప్రతి ధన్-ధాన్య జిల్లాలో ఈ పథకం పురోగతిని 117 పెర్ఫామెన్స్‌ ఇండికేటర్ల ద్వారా పర్యవేక్షిస్తారు.