Uttarpradesh : ఏడు సార్లు కాదు ఒక్కసారే పాము కరిచింది. కానీ అతను అబద్దం చెప్పలేదు.. విషయం ఏంటంటే..
ఉత్తరప్రదేశ్‌లోని ఫతేపూర్‌లో ఓ యువకుడిని 7 సార్లు పాము కాటు వేసింది అన్న వార్త వైరల్ అయిన విషయం తెలిసిందే అయితే ఇప్పుడు ఓ షాకింగ్ విషయం వెలుగులోకి వచ్చింది. ఆ యువకుడిని ఒక్కసారి మాత్రమే పాము కాటు వేసినట్లు విచారణలో తేలింది. అయితే అనారోగ్యం కారణంగా ఆ యువకుడు పాము తనను పదే పదే కాటేస్తోందని అనుకుంటూనే ఉన్నాడు. ఇందుకోసం ఆసుపత్రికి కూడా వెళ్తూనే ఉన్నాడు. వైద్యులు కూడా చికిత్స కొనసాగించారు. ఇందుకు సంబంధించిన నివేదికను ఆరోగ్య శాఖ జిల్లా మేజిస్ట్రేట్‌కు సమర్పించడంతో అందరూ ఆశ్చర్యపోయారు. యువకుడికి స్నేక్ ఫోబియా ఉన్నట్లు తేలింది. దీనిపై విచారణకు జిల్లా ముఖ్య ఆరోగ్య అధికారి ముగ్గురు సభ్యుల బృందాన్ని ఏర్పాటు చేశారు. ప్రయివేటు ఆసుపత్రిలో చికిత్సపై అనుమానాలు వ్యక్తమవుతున్నాయి. ఫతేపూర్‌లోని సౌరా గ్రామానికి చెందిన వికాస్ దూబే 40 రోజుల్లో ఏడుసార్లు పాము కాటుకు గురయ్యాడని పేర్కొన్నాడు. ఈ ఘటన స్థానిక ప్రజలను దిగ్భ్రాంతికి గురిచేయడమే కాకుండా శాస్త్రవేత్తలు, వైద్యుల్లో చర్చనీయాంశంగా మారింది.
వికాస్ తన పొలంలో పని చేస్తుండగా మొదటిసారి పాము కాటు వేసిందని చెప్పాడు. ఇది సాధారణ సంఘటనగా పరిగణించబడింది. అయితే దీని తర్వాత పాము ప్రతి వారం అతన్ని కాటేస్తూనే ఉంది. పలుమార్లు ఫతేపూర్‌లోని ఓ ప్రైవేట్‌ ఆస్పత్రికి వెళ్లి వైద్యం చేయించుకున్నాడు. అక్కడ అతనికి యాంటీ-వెనమ్ ఇంజెక్షన్ఇచ్చారు. అతనికి తీవ్రమైన చికిత్స అందించారు. అదే హుడ్ ఉన్న పాము తనను చాలాసార్లు కాటేసిందని వికాస్ పేర్కొన్నాడు. తన కలలో కూడా పాము వచ్చిందని వికాస్ చెప్పాడు. పాము కలలో నేను నిన్ను 9 సార్లు కాటేస్తాను. 8 సార్లు మీరు సేవ్ చేయబడతారు. అయితే 9వ సారి నిన్ను వెంట తీసుకెళ్తాను అని చెప్పినట్లు కుటుంబసభ్యుల వద్ద వాపోయాడు.
అనంతరం ఈ ఘటనపై అధికార యంత్రాంగం విచారణ చేపట్టింది. రిపోర్టు బయటకు రాగానే అందరూ షాక్ అయ్యారు. స్నేక్ ఫోబియా కారణంగా వికాస్ మళ్లీ మళ్లీ పాము కాటుకు గురవుతున్నట్లు భావించాడు. వికాస్‌కు పదేపదే వైద్యం అందించిన వైద్యుల తప్పు కూడా ఉందని జిల్లా ముఖ్య ఆరోగ్య అధికారి తెలిపారు.