Kashmir: అందుబాటులోకి.. దేశంలోనే అతి పొడవైన రైలు సొరంగం

దేశంలోనే అతి పొడవైన రైలు సొరంగం T-50 అందుబాటులోకి వచ్చింది. జమ్మూ-కశ్మీర్‌లో U.S.B.R.L ప్రాజెక్టులో భాగంగా నిర్మించిన బనిహాల్-సంగల్‌దాన్‌ సెక్షన్‌లో ఓ చోట ఈ సొరంగం ఉంది. ఈ టన్నెల్‌ పొడపు 12.77 కిలోమీటర్లు ఉంటుంది. U.S.B.R.L ప్రాజెక్టులో భాగంగా నిర్మించిన 11 సొరంగాల్లో అధికారులకు అత్యంత సవాల్‌గా నిలిచిన సొరంగం ఇది.

దేశంలో అతిపెద్ద రైలు టన్నెల్ T-50 ప్రయాణికులకు అందుబాటులోకి వచ్చింది. జమ్మూకశ్మీర్‌లో U.S.B.R.L ప్రాజెక్టులో భాగంగా నిర్మించిన బనిహాల్- ఖడీ- సుంబడ్‌- సంగల్‌దాన్‌ సెక్షన్‌ను ప్రధాని మోదీ మంగళవారం ప్రారంభించారు. ఈ మార్గంలోనే ఖడీ- సుంబడ్‌ల మధ్య T-50 సొరంగం ఉంటుంది. దీని పొడవు 12.77 కిలోమీటర్లు. UPA ప్రభుత్వ హయాంలో....2010లోనే పనులు ప్రారంభం కాగా దాదాపు 14 ఏళ్లకు ఇది అందుబాటులోకి వచ్చింది. బనిహాల్- సంగల్‌దాన్‌ సెక్షన్‌లోని 11 సొరంగాల్లో ఇదే అత్యంత సవాల్‌గా నిలిచిందని అధికారులు తెలిపారు. సొరంగం లోపల అన్ని భద్రతా చర్యలు తీసుకున్నట్టు చెప్పారు. అత్యవసర పరిస్థితుల్లో ప్రయాణికులను సురక్షితంగా తరలించేందుకు T-50కి సమాంతరంగా ఒక ఎస్కేప్ టన్నెల్ నిర్మించినట్టు పేర్కొన్నారు. ప్రతీ 375 మీటర్ల దూరంలో ఈ రెండింటినీ కలుపుతూ మార్గాలు ఏర్పాటు చేశామని తెలిపారు.

U.S.B.R.L ప్రాజెక్టును 41 వేల కోట్ల రూపాయలతో చేపట్టారు. మొత్తం పొడవు 272 కిలోమీటర్లు కాగా బారాముల్లా- సంగల్‌దాన్‌, ఉధంపుర్‌- కాట్రా సెక్షన్‌ల మధ్య సేవలు అందుబాటులోకి వచ్చాయి. కాట్రా- సంగల్‌దాన్‌ మధ్య 63 కిలోమీటర్ల మేర పనులు సాగుతున్నాయి. ప్రపంచంలోనే ఎత్తైన రైల్వే బ్రిడ్జి చీనాబ్‌ వంతెన, దేశంలో తొలి తీగల రైలు వంతెన "అంజీఖాడ్ " ఈ మార్గంలోనే ఉన్నాయి. తాజాగా బనిహాల్- సంగల్‌దాన్‌ సెక్షన్‌ ప్రారంభం కావడంతో కశ్మీర్ లోయ నుంచి కన్యాకుమారి వరకు రైలు నడపాలనే లక్ష్యానికి మరింత చేరువైనట్లు అధికారులు తెలిపారు.