HD Revenna : పరప్పన జైలు నుంచి రేవణ్ణ విడుదల
మహిళ అపహరణ కేసులో అరెస్టయిన జేడీఎస్ ఎమ్మెల్యే HD రేవణ్ణ... జైలు నుంచి విడుదలయ్యారు. ప్రత్యేక కోర్టు నిన్న ఆయనకు బెయిల్ మంజూరు చేయగా...ఇవాళ బెంగళూరులోని పరప్పన అగ్రహార జైలు నుంచి విడుదలయ్యారు. హసన్‌ ఎంపీ ప్రజ్వల్‌ రేవణ్ణకు సంబంధించిన అశ్లీల వీడియోల కేసుతో సంబంధం ఉన్న ఓ మహిళను అపహరించారనే ఆరోపణలపై ఈనెల 4న ప్రత్యేక దర్యాప్తు బృందం...ఎమ్మెల్యే రేవణ్ణను అరెస్ట్ చేసింది. రేవణ్ణ దాఖలు చేసిన పిటిషన్‌పై సోమవారం విచారణ జరిపిన ప్రత్యేక కోర్టు న్యాయాధికారి ... ఆయనకు షరతులతో కూడిన బెయిల్ మంజూరు చేశారు. 5లక్షల రూపాయల బాండ్‌తోపాటు దేశం విడిచి వెళ్లరాదని, ఆ కేసుకు సంబంధించిన బాధితులను ప్రభావితం చేయరాదంటూ...పలు షరతులు విధించింది.
జైలు నుంచి విడుదలైన రేవణ్ణ బెంగళూరులోని తన ఇంటికి వెళ్లారు. హోలెనర్సీపూర్‌లోని తన ఇంటి నుంచి హోలెనర్సీపూర్‌లోని లక్ష్మీ నరసింహ, హరదనహళ్లిలోని దేవెగౌడ ఇంటి ఆరాధ్యదైవం దేవేశ్వర్, మావినకెరె కొండపై ఉన్న రంగనాథుని ఆలయాల్లో పూజలు చేయనున్నారు. రేవణ్ణ విడుదల సందర్భంగా జేడీఎస్ కార్యకర్తలు పద్మనాభ నగర్‌లోని దేవెగౌడ నివాసం వద్ద రేవణ్ణకు మద్దతుగా ర్యాలీ నిర్వహిస్తున్నట్లు ప్రకటించారు. అదే సమయంలో డీసీఎం డీకే శివకుమార్‌పై కార్యకర్తల్లో ఆగ్రహం వ్యక్తమవుతోంది. జేడీఎస్ కార్యకర్తలు డీసీఎం డీకేపై ఆగ్రహం వ్యక్తం చేస్తూ.. ఇవాళ రేవణ్ణ కంటతడి పెట్టారని, దీనికి ప్రభుత్వమే బాధ్యత వహించాలన్నారు.
జైలు నుంచి విడుదలైన అనంతరం సాయంత్రం మైసూర్‌లోని చాముండి కొండకు వెళ్లి తల్లిచాముండేశ్వరికి ప్రత్యేక పూజలు చేశారు. దీంతో పాటు ఇవాళ స్వక్షేత్రం హోలెనర్సీపూర్‌లోని తన ఇంటికి చేరుకుని ఆలయాలను సందర్శించనున్నారు. బాధిత మహిళలను కిడ్నాప్ చేసిన కేసులో మాజీ మంత్రి హెచ్‌డి రేవణ్ణ మే 14న జైలు నుంచి విడుదలైన సంగతి తెలిసిందే. రేవణ్ణ అరెస్టుపై జేడీఎస్ కార్యకర్తలు ఆందోళనకు దిగారు. ఇప్పుడు రేవణ్ణకు బెయిల్ రావడంతో జేడీఎస్ కార్యకర్తలు, నేతల్లో కొత్త ఉత్సాహం నెలకొంది.
