IAU: అంగారక గ్రహంపై కేరళ పట్టణాల పేర్లు
అంతర్జాతీయ ఆస్ట్రోనామికల్ యూనియన్ (IAU) చారిత్రక నిర్ణయం తీసుకుంది. అంగారక గ్రహం (Mars) పై ఉన్న పురాతన బిలాలకు (Craters) కేరళలోని పలు పట్టణాలు, ప్రముఖుల పేర్లను పెట్టేందుకు ఆమోదం తెలిపింది. ఈ నిర్ణయంతో భారతీయ ఖగోళ పరిశోధనా రంగంలో కొత్త ఉత్సాహం నెలకొంది. అంగారక గ్రహంపై గల క్శాంతే టెర్రా ప్రాంతంలో 3.5 బిలియన్ సంవత్సరాల నాటి బిలాలను కనుగొన్నారు. భారత భూవిజ్ఞాన శాస్త్రవేత్త ఎం.ఎస్. కృష్ణన్ గౌరవార్థం ఆయన పేరును, కేరళకు చెందిన పెరియార్, విలియామల, తుంబ, వర్కల, బెకల్ వంటి పట్టణాల పేర్లను పెట్టాలని కేరళ ఖగోళ పరిశోధకులు ఆసిఫ్ ఇక్బాల్ కక్కస్సేరి, రాజేశ్ వి.జె.లు ఐఏయూకి ప్రతిపాదించారు. వీటి ప్రతిపాదనలకు ఐఏయూ తాజాగా ఆమోద ముద్ర వేసింది. దీని ప్రకారం, బిలాల్లోని నీరు, మంచు జాడలు కన్పించినవాటిని ఇకనుంచి కృష్ణన్ క్రేటర్, కృష్ణన్ పాలస్, పెరియార్ వల్లిస్ అని పిలుస్తారు. మిగిలిన ప్రాంతాలకు... విలియామల (ఐఐఎస్టీ ప్రధాన కార్యాలయం), తుంబ (1960లో ఇస్రో స్థాపించిన స్థలం), వర్కల , బెకల్ (చారిత్రాత్మక కోట), పెరియార్ (కేరళలో అతి పొడవైన నది) పేర్లను ఖరారు చేశారు. ఎం.ఎస్. కృష్ణన్ 1898లో తంజావూరులో జన్మించి, జియోలాజికల్ సర్వే ఆఫ్ ఇండియాకు తొలి డైరెక్టర్‌గా పనిచేశారు. ఇదిలావుండగా, గతేడాది అంగారక గ్రహంపై కనుగొన్న మరో మూడు బిలాలకు కూడా దివంగత భౌతిక శాస్త్రవేత్త దేవేంద్రలాల్ పేరుతో పాటు ఉత్తర్ ప్రదేశ్ లోని ముర్సాన్, బిహార్‌లోని హిల్సా పట్టణాల పేర్లు పెట్టడం జరిగింది. ఈ పరిణామం ప్రపంచ వేదికపై భారత్ ఖ్యాతిని మరింత పెంచుతుంది.