Irs Officer Gender Change: పురుషుడిగా మారిన మహిళా ఐఆర్ఎస్ అధికారి
సివిల్ సర్వీసెస్ చరిత్రలో తొలిసారి ఒక అధికారి సంచలన నిర్ణయం తీసుకున్నారు. ఇండియన్ రెవెన్యూ సర్వీస్ (ఐఆర్ఎస్)కు చెందిన సీనియర్ అధికారి అన్ని అధికారిక రికార్డుల్లో తన పేరు, లింగాన్ని మార్చుకున్నారు. చరిత్రలో తొలిసారిగా వచ్చిన ఈ తరహా అభ్యర్థనకు కేంద్ర ఆర్థిక మంత్రిత్వ శాఖ ఆమోద ముద్ర వేసింది. హైదరాబాద్లో కస్టమ్స్ ఎక్సైజ్, సర్వీస్ ట్యాక్స్ అప్పిలేట్ ట్రైబ్యునల్ చీఫ్ కమిషనర్ కార్యాలయం జాయింట్ కమిషనర్ (ఆథరైజ్డ్ రిప్రంజటేటివ్)గా పనిచేస్తున్న 35 ఏళ్ల ఎం అనసూయ చేసిన అభ్యర్ధనకు కేంద్రం అంగీకరించింది. దీంతో అనసూయ.. అనుకతిర్ సూర్యగా మారిపోయారు. ఇన్నాళ్లు మహిళగా ఉన్న అనుకతిర్‌ను ఇకపై పురుషుడిగా ప్రభుత్వం పరిగణించనుంది. అన్ని అధికారిక రికార్డుల్లోనూ అనుకతిర్ సూర్యగా గుర్తిస్తారు.
ఇక, లింక్డ్ఇన్‌ ప్రొఫైల్ ప్రకారం.. సివిల్స్‌కు ఎంపికైన అనసూయ అలియాస్ అనుకతిర్ సూర్య డిసెంబర్ 2013లో చెన్నైలో అసిస్టెంట్ కమీషనర్‌గా తన కెరియర్‌ను ప్రారంభించారు. 2018లో డిప్యూటీ కమీషనర్‌గా పదోన్నతి పొందిన సూర్య.. గతేడాది నుంచి హైదరాబాద్లో జాయింట్ కమిషనర్ హోదాలో విధులు నిర్వర్తిస్తున్నారు. విద్యార్హతల విషయానికి వస్తే చెన్నైలోని మద్రాస్ ఇన్‌స్టిట్యూట్ ఆఫ్ టెక్నాలజీలో ఎలక్ట్రానిక్స్ అండ్ కమ్యూనికేషన్‌లో అనుకతిర్ బీటెక్ పూర్తిచేశారు. ఉద్యోగంలో చేరిన తర్వాత భోపాల్‌లో నేషనల్ లా ఇన్‌స్టిట్యూట్ యూనివర్సిటీ నుంచి 2023లో సైబర్ లా అండ్ సైబర్ ఫోరెన్సిక్స్‌లో పీజీ డిప్లొమాను అందుకున్నారు.
జులై 9న కేంద్ర ఆర్ధిక మంత్రిత్వ శాఖ విడుదల చేసిన ఉత్తర్వుల్లో ‘‘ఎం అనుసూయ ఐఆర్ఎస్ (సీఅండ్ ఐటీ 2013.. ఎంప్లాయీ కోడ్ 4623, డీఓబీ (పుట్టిన తేదీ) 20.10.1988) కస్టమ్స్ అండ్ ఎక్సైజ్ సర్వీస్ ట్యాక్స్ అప్పిలేట్ ట్రైబ్యునల్ చీఫ్ కమిషనర్- హైదరాబాద్.. అభ్యర్ధన మేరకు ఆమె పేరు, లింగాన్ని అధికారిక రికార్డుల్లో ఎం అనుకతిర్ సూర్యగా మార్పునకు అమోదించాం’’ అని పేర్కొన్నారు. ఇకపై ఆమెను పురుషుడిగా పరిగణిస్తామని, ఇందుకు సంబంధించిన అధికారిక ప్రకియ పూర్తయ్యిందని తెలిపింది.
