హమ్మయ్య.. బ్యాగ్ బరువు తగ్గుతోంది..

చదువులేమో కానీ అల్మరాలో ఉన్న పుస్తకాలన్నీ బ్యాగులో సర్ధుకుని బస్సెక్కుతున్న పిల్లల్ని చూస్తుంటే అమ్మ, నాన్నలకి చాలా భయమేస్తుంటుంది.. ఎక్కడ పడిపోతారో అని.. పిల్లల బ్యాగు బరువు తగ్గించాలని ప్రభుత్వం తీసుకున్న నిర్ణయం హర్షణీయం. ఇది అన్ని రాష్ట్రాల్లో అమలైతే అంతకంటే పిల్లలకి మరే ఆనందం ఉండదు.

కర్ణాటక ప్రభుత్వం స్కూల్ బ్యాగ్ బరువు తగ్గించాలని నిర్ణయం తీసుకుంది. ఈ మేరకు విద్యాశాఖ అధికారులకు ఉత్తర్వులు జారీ చేసింది.పాఠ్యపుస్తకాలను సగానికి విభజిస్తోంది. అంటే సిలబస్ ను రెండుగా విడగొట్టి ఒక్కొక్కదాంటో 50 శాతం తీసుకుంటుంది. అయితే ఈ ఏడాదికి పాత పద్దతే కొనసాగుతుంది.

2024-25 విద్యా సంవత్సరం నుండి 1 నుండి 10 తరగతుల విద్యార్థుల కోసం ఈ చర్యలు తీసుకోబడ్డాయి. అధికారిక ఉత్తర్వుల ప్రకారం, విద్యార్థులకు ఒక సబ్జెక్టుకు రెండు పుస్తకాలు అందుతాయి. సమ్మేటివ్ అసెస్‌మెంట్ (SA-1 మరియు SA-2) ఆధారంగా సిలబస్ విభజించబడుతుంది.

2019లో ఏర్పడిన కమిటీ సిఫార్సులను స్వీకరించిన తర్వాత రాష్ట్ర ప్రభుత్వం ఈ నిర్ణయం తీసుకుంది. ఈ కమిటీలో విద్యా నిపుణులు, శిశువైద్యులు, వైద్యులు, న్యాయ సలహాదారులు, రాష్ట్ర విద్యా పరిశోధన మరియు శిక్షణ విభాగం (DSERT) అధికారులు ఉన్నారు.

వివిధ తరగతులకు సంబంధించి పాఠశాలల బ్యాగుల బరువును కమిటీ సూచించింది. 1 నుండి 2 తరగతులకు 1.5 నుండి 2 కిలోల బరువు, 3 నుండి 5 తరగతులకు 2 నుండి 3 కిలోలు, 6 నుండి 8 తరగతులకు 3 నుండి 4 కిలోలు, 9,10 తరగతులకు 4 నుండి 5 కిలోల వరకు బరువు ఉండాలని నివేదిక పేర్కొంది.

కర్ణాటక పాఠ్యపుస్తకం నిబంధనలు

ప్రభుత్వం సవరించిన మార్గదర్శకాలను అమలు చేయడానికి, కర్ణాటక టెక్స్ట్‌బుక్స్ సొసైటీ (KTBS) తన ప్రింటింగ్ వ్యూహాన్ని సర్దుబాటు చేయాలని పేర్కొంది. KTBS అంచనా ప్రకారం, 2023-24 విద్యా సంవత్సరంలో, మొత్తం 566 శీర్షికలు మరియు 6,39,83,899 పాఠ్యపుస్తకాలు రూ. 323,31,93,175కి ముద్రించబడ్డాయి. కొత్త సిఫార్సును అనుసరించి, SA-1 మరియు SA-2 కోసం పాఠ్యపుస్తకాలు విడివిడిగా ముద్రించబడతాయి. అదనపు శీర్షికల కోసం రూ. 8,45,72,950 వ్యయం అవుతుందని అంచనా వేశారు.