Kochi Airport: బ్యాగులో బాంబ్ ఉందని జోకేస్తే జైల్లో వేసిన పోలీసులు!
నోటి దూళ ఉన్న వాళ్లను మనం చాలా సార్లే చూస్తూ ఉంటాం. కొందరు అనవసరంగా వాగుతూ అందరి ముందు పరువు తీసుకుంటారు. పక్క వాళ్లపై పిచ్చి పిచ్చి జోకులు వేస్తూ.. వాళ్లతో తిట్లు పడుతుంటారు. ఇలాంటి వారిక ఎన్నిసార్లు బుద్ధి మార్చుకోమని చెప్పిన వినరు. మార్చుకోరు. ఈ కోవకు చెందిన ఓ వ్యక్తే.. తాజాగా పోలీసులతో జోక్ చేశాడు. దీంతో అదే నిజమనుకున్న పోలీసులు అతడిని తీసుకెళ్లి జైల్లో వేశారు. ప్రస్తుస్తుం ఈ వార్త నెట్టింట తెగ వైరల్ అవుతోంది. ఆ పూర్తి వివరాలు మీకోసం.
కేరళలోని కోజికోడ్‌కు చెందిన రషీద్.. మలేసియాలోని కౌలాలంపూర్‌కు వెళ్లాలనుకున్నాడు. ఈక్రమంలోనే విమాన టికెట్ బుక్ చేసుకుని సమయానికి కొచ్చిన్ విమానాశ్రయానికి చేరుకున్నాడు. బుధవారం రోజు రాత్రి 11 గంటల సమయంలో.. ఎయిర్ పోర్టు భద్రతా సిబ్బంది రషీద్‌ను తనిఖీ చేశారు. అయితే అతడి బ్యాగు కాస్త బరువుగా ఉండడంతో.. అందులో ఏముంది, ఎందకంత బరువుందని అధికారులు అడిగారు. అయితే సూటిగా అందులో ఏముందో చెప్పకుండా.. వెటకారంగా మాట్లాడాడు రషీద్.
నా బ్యాగులో బాంబ్ ఉంది, అందుకే అంత బరువుందంటూ చెప్పి నవ్వేశాడు. కానీ విమానాశ్రయ సిబ్బంది మాత్రం అతడి మాటలను చాలా సీరియస్‌గా తీసుకున్నారు. వెంటనే పోలీసులకు ఫిర్యాదు చేసి అక్కడకు రప్పించారు. ఆపై రషీద్‌ను వారికి అప్పగించారు. ఈక్రమంలోనే పోలీసులు అతడిని అరెస్ట్ చేసి పోలీస్ స్టేషన్‌కు తీసుకెళ్లారు. అయితే రషీద్ మాత్రం తానేమీ చేయలేదని.. జోక్ చేశానంటూ చెబుతున్నా పోలీసులు పట్టించుకోలేదు. కానీ పోలీస్ స్టేషన్‌కు వెళ్లాకా.. తమదైన స్టైల్లో ఇంటరాగేషన్ మొదలు పెట్టారు.
దీంతో భయపడిన రషీద్ నిజంగానే తాను జోక్ చేశానని.. కావాలంటే బ్యాగ్ చెక్ చేసుకోండని చెప్పాడు. అందులో ఏమేమున్నాయో పూసగుచ్చినట్లు వివరించాడు. దీంతో అతడి బ్యాగు తనిఖీ చేసిన అధికారులు.. అందులో అతడు చెప్పినవి మాత్రమే ఉండడం, ఎలాంటి బాంబు లేకపోవడంతో ఊపిరి పీల్చుకున్నారు. మరోసారి ఇలాంటి జోకులు వేయొద్దని హెచ్చరించి ఆపై వదిలేశారు. ప్రస్తుతం ఈ వార్త నెట్టింట వైరల్ అవుతోంది.