నియోజకవర్గంపై కాకుండా దేశంపై దృష్టి పెట్టాలనుకుంటున్న ఖర్గే.. అందుకే ఎన్నికల్లో..

మరి కొద్ది రోజుల్లో జరగనున్న లోక్‌సభ ఎన్నికలకు ముందు, కాంగ్రెస్ అధ్యక్షుడు మల్లికార్జున్ ఖర్గే ఒకే నియోజకవర్గానికి పరిమితం కాకూడదని భావిస్తున్నట్లు నివేదికలు చెబుతున్నాయి. దేశంపై దృష్టి పెట్టాలని ఆయన భావిస్తున్నట్లు తెలిసింది.

మరికొన్ని వారాల్లో జరగనున్న 2024 లోక్‌సభ ఎన్నికలకు భారతదేశం సిద్ధమవుతోంది. ఎన్నికల తేదీలు ఇంకా ప్రకటించలేదు. మరి కొద్ది రోజుల్లో ఎన్నికలకు సంబంధించిన ప్రకటన వెలువడవచ్చు. సార్వత్రిక ఎన్నికలకు ముందు, భారతదేశంలోని వివిధ రాజకీయ పార్టీలు తమ సన్నాహాలను ప్రారంభించాయి. ఎన్నికల ప్రచారాలు,మేనిఫెస్టోలు సిద్ధమవుతున్నాయి. పార్టీలు కూడా నియోజకవర్గాల వారీగా అభ్యర్థుల జాబితాను విడుదల చేయడం ప్రారంభించాయి. ఈ సన్నాహాల మధ్య, కాంగ్రెస్ అధ్యక్షుడు మల్లికార్జున్ ఖర్గే ఈ ఏడాది లోక్‌సభ ఎన్నికలకు దూరంగా ఉండవచ్చని సమాచారం. ఆయన కేవలం ఒక నియోజకవర్గంపై మాత్రమే కాకుండా దేశంపై దృష్టి పెట్టాలనుకుంటున్నారని పార్టీ వర్గాల నుంచి సమాచారం అందుతోంది.

భారత జాతీయ కాంగ్రెస్ (INC) అధ్యక్షుడు మల్లికార్జున్ ఖర్గే రాబోయే లోక్‌సభ ఎన్నికల 2024 నుండి పోటీ చేయరని తాజా నివేదికలు సూచిస్తున్నాయి. అయితే చాలా మంది పార్టీ విధేయులు ఖర్గే పార్టీకి నాయకత్వం వహిస్తారని, ఎన్నికల్లో నిలబడతారని నమ్ముతున్నారు. కర్నాటకలోని గుల్బర్గా నియోజకవర్గం నుంచి పోటీ చేస్తారని పార్టీ విధేయులు భావిస్తున్నారు. కానీ పార్టీ అనుభవజ్ఞుడు, సీనియర్ నేత మనసులో ఏం ఉందో తెలియాల్సి ఉంది.

ఖర్గే స్థానంలో ఆయన అల్లుడు?

జాతీయ మీడియా నివేదిక ప్రకారం, గత వారం పార్టీ చర్చల ప్రకారం, కర్ణాటకలోని గుల్బర్గా నియోజకవర్గానికి అభ్యర్థుల జాబితాలో మల్లికార్జున్ ఖర్గే అగ్రస్థానంలో ఉన్నారని మీడియా వర్గాలు తెలిపాయి. అయితే ఖర్గే స్థానంలో తన అల్లుడు రాధాకృష్ణన్ దొడ్డమణిని నామినేట్ చేసే అవకాశం ఉందని కూడా వినిపిస్తోంది. ఈ నియోజకవర్గం నుంచి రెండుసార్లు గెలిచిన ఖర్గే 2019లో ఓడిపోయారు. ఆయన కుమారుడు ప్రియాంక్ ఖర్గే కర్ణాటక సీఎం సిద్ధరామయ్య కేబినెట్‌లో మంత్రిగా ఉన్నందున వచ్చే ఎన్నికల్లో పోటీ చేసేందుకు ఆసక్తి చూపడం లేదు. అందుకే ఖర్గే తన అల్లుడిని నామినేట్ చేసే అవకాశాలు ఉన్నాయి.