Supreme Court: వైవాహిక అత్యాచారాలను నేరంగా భావించలేం

వైవాహిక అత్యాచారాన్ని నేరంగా పరిగణించాల్సిన అవసరం లేదని సుప్రీంకోర్టుకు కేంద్ర ప్రభుత్వం తెలిపింది. ఇప్పటికే తగినన్ని శిక్షలు ఉన్నాయని, కానీ ఇది మాత్రం చట్టబద్దమైన అంశానికి మించిన సామాజిక సమస్య అని పేర్కొంది. ఇది సమాజంపై ప్రత్యక్ష ప్రభావం చూపుతుందని వెల్లడించింది. ఈ అంశంపై ఏదైనా నిర్ణయం తీసుకునే ముందు భాగస్వామ్య పక్షాలతో విస్తృతస్థాయిలో సంప్రదింపులు జరపాల్సి ఉందని తెలిపింది. అన్ని రాష్ట్రాల అభిప్రాయాలను పరిగణనలోకి తీసుకోకుండా ఈ సమస్యపై (వైవాహిక అత్యాచారం) నిర్ణయాన్ని వెల్లడించలేమని కోర్టుకు కేంద్రం తెలిపింది. ఈ మేరకు సుప్రీంకోర్టులో కేంద్రం అఫిడవిట్ దాఖలు చేసింది.

వైవాహిక అత్యాచారాన్ని నేరంగా పరిగణించాలని సుప్రీంకోర్టులో పిటిషన్లు దాఖలయ్యాయి. ఈ పిటిషన్లను కేంద్రం వ్యతిరేకించింది. ఈ అంశం సుప్రీంకోర్టు పరిధిలోకి రాదని వెల్లడించింది. కేంద్రం, అన్ని రాష్ట్రాలు, ఇతర భాగస్వామ్య పక్షాల అభిప్రాయాలను పరిగణనలోకి తీసుకోకుండా దీనిపై ఓ నిర్ణయం తీసుకోలేమని వెల్లడించింది.

అయితే, ప్రతీ వివాహం మహిళ సమ్మతితో జరగడం లేదన్న విషయాన్ని మాత్రం కేంద్రం అంగీకరించింది. ఏదైనా ఉల్లంఘనలకు పాల్పడితే చట్టరీత్యా శిక్షలు ఎదుర్కోవాల్సి వస్తుందని.. వివాహంలో జరిగే.. జరిగే ఉల్లంఘనలకు తేడా ఉంటుందని చెప్పింది. దాంపత్య జీవితంలో తమ జీవిత భాగస్వామి నుంచి శారీరక సంబంధాన్ని కోరుకోవడం సహజమేనని.. అయితే, భార్య ఇష్టానికి వ్యతిరేకంగా ఒత్తిడి చేసే హక్కు భర్తకు లేదని పేర్కొంది. అత్యాచార నిరోధక చట్టాల కింద శిక్ష విధించడం ఎక్కువని.. వివాహంలో మహిళ సమ్మతిని రక్షించేందుకు పార్లమెంట్ ఇప్పటికే చర్యలు తీసుకుందని.. ఇందులో వివాహితలపై క్రూరత్వానికి పాల్పడే వారిని శిక్షించే చట్టాలు సైతం ఉన్నాయని తెలిపింది. మహిళల స్వేచ్ఛ, గౌరవం, హక్కులను రక్షించేందుకు ప్రభుత్వం కట్టుబడి ఉందని తెలిపింది.