NCC లీడర్ అతి.. క్యాడెట్లను బురదలో తల పెట్టించి..!
మహారాష్ట్రలో చోటుచేసుకున్న దారుణం వెలుగులోకి వచ్చింది. థానేలో ఓ కాలేజీ లో పనిష్మెంట్ పేరుతో ఎన్సీసీ క్యాడెట్లను ఒక సీనియర్ అత్యంత ఉన్మాదంగా కొడుతున్న వీడియో సోషల్ మీడియాలో చక్కర్లు కొడుతోంది. కుండపోత వర్షంలో జూనియర్ క్యాడెట్లతో వార్మప్‌ చేయించారు, అయితే అది సరిగా చేయలేని వారిని కర్రలతో అత్యంత అమానుషంగా కొట్టారు. ఈ వీడియోను నెట్టింట్లో షేర్ చేస్తూ యూజర్లు తీవ్ర ఆగ్రహం వ్యక్తం చేస్తున్నారు. వీడియో చూసి షాక్ తిన్నామని, నిందితులతో పాటు కళాశాల ప్రిన్సిపాల్‌పై చర్యలు తీసుకోవాలని నెటిజెన్లు డిమాండ్ చేస్తున్నారు.
దాదాపు 8 మంది విద్యార్థులను వరుసగా పుష్-అప్ పొజిషన్‌లో పడుకోబెట్టారు. విద్యార్థులు బురదలో తలలు పెట్టుకున్నారు. ఒక సీనియర్ విద్యార్థి చేతిలో చెక్క కర్రతో నిలబడి ఉన్నాడు. ఏ విద్యార్థి అయినా కొంచెం కదిలితే చెక్క కర్రలతో కనికరం లేకుండా కొట్టడం వీడియోలో క్లియర్‌గా కనిపిస్తోంది..ఈ సీనియర్ విద్యార్థుల బీభత్సం జూనియర్ విద్యార్థులను భయాందోళనకు గురిచేస్తోంది. అయితే దీనిపై ఇప్పటి వరకు ఫిర్యాదు నమోదు కాలేదు. అయితే ఈ విషయం తమ దృష్టికి వచ్చిందని, ఈ రకమైన ప్రవర్తనను తాము సహించలేమని, బాధ్యులైన విద్యార్థులపై చర్యలు తీసుకుంటామని కళాశాల ప్రిన్సిపాల్‌ సుచిత్రానాయక్‌ అన్నారు.