Noida: 15 నెలల పసిబిడ్డపై డేకేర్ అటెండర్ దాష్టీకం.. సీసీటీవీలో రికార్డ్..

నోయిడాలోని ఒక డే కేర్ సెంటర్‌లో 15 నెలల చిన్నారిపై ఆయమ్మ దాడి చేసింది. చిన్న బిడ్డని కొట్టడానికి చేతులు ఎలా వచ్చాయో.. మానవత్వం మరిచి ప్రవర్తించింది. ఓర్పు, సహనం లేని వాళ్లు డేకేర్ సెంటర్ లో ఎందుకు పని చేయడం..

చంటి బిడ్డలను డే కేర్ సెంటర్ లో వదలలేక వదులుతూ అమ్మ ఆఫీసుకు వెళుతుంది. బిడ్డలను తమ కన్నబిడ్డల్లా చూడకపోయినా సమయానికి అన్నీ అందిస్తుంటారని అమ్మ ఆశపడుతుంది. కానీ రాక్షసుల్లా ప్రవర్తిస్తారని కలలో కూడా ఊహించదు.

ప్రాథమిక సమాచారం ప్రకారం, ఆగస్టు 4న ఈ సంఘటన జరిగిందని, ఆ చిన్నారి తల్లి చిన్నారిని డే కేర్ నుండి ఇంటికి తీసుకువచ్చినప్పుడు, బిడ్డ ఏడుస్తుండటం గమనించింది. పాప బట్టలు మారుస్తుండగా, తల్లి ఆమె రెండు తొడలపై ఎర్రగా కమిలి ఉన్న గుర్తులను గమనించింది. ఆ తర్వాత, ఆమె బాలికను వైద్యుడి వద్దకు తీసుకెళ్లింది, ఆ గుర్తులు నోటితో కొరికినట్లుగా ఉన్నాయని ఆయన చెప్పారు.

ఆ తర్వాత తల్లిదండ్రులు డే కేర్‌లోని సీసీటీవీ ఫుటేజ్‌ను పరిశీలించారు, అందులో చిన్నారిపై ఆయమ్మ దాడి చేయడం కనిపించింది. ఏడుస్తున్న బాలికను ఎత్తుకుని ఉన్న ఆమె మొదట పాపను శాంతింపజేయడానికి ప్రయత్నిస్తున్నట్లు వీడియోలో ఉంది.

అయితే, బాలిక ఏడుపు ఆపకపోవడంతో, ఆయమ్మ తన సహనాన్ని కోల్పోయి చిన్నారిని నేలపై పడవేసి, అనేకసార్లు చెంపదెబ్బ కొట్టింది. చిన్నారి ఏడుస్తున్నప్పటికీ, అక్కడే ఉన్న డే కేర్ యజమానురాలు కూడా చిన్నారిని ఓదార్చడానికి లేదా రక్షించడానికి ఎటువంటి ప్రయత్నం చేయలేదని తల్లిదండ్రులు ఆరోపించారు.

తల్లిదండ్రుల ఫిర్యాదు మేరకు సెక్టార్-142 పోలీసులు కేసు నమోదు చేసి, చిన్నారికి వైద్య పరీక్షలు నిర్వహించారు. నిందితురాలైన పనిమనిషిని అరెస్టు చేశారు. "ఫిర్యాదు ఆధారంగా సంబంధిత సెక్షన్ల కింద కేసు నమోదు చేయబడింది. చట్టపరమైన చర్యలు కొనసాగుతున్నాయి" అని పోలీసు అధికారి ధృవీకరించారు. డే కేర్‌లో మైనర్ ఉద్యోగంపై పోలీసులు దర్యాప్తు చేస్తున్నారు. డే కేర్ సెంటర్ లైసెన్స్‌పై కూడా దర్యాప్తు జరుగుతోంది.