SC: నెలసరి సెలవుపై సుప్రీంకోర్టు కీలక వ్యాఖ్యలు

మహిళలకు నెలసరి సమయంలో తప్పనిసరి సెలవులు కల్పించాలనే అంశంపై సుప్రీంకోర్టు కీలక వ్యాఖ్యలు చేసింది. అలాంటి సెలవులను చట్టబద్ధంగా తప్పనిసరి చేస్తే మహిళల ఉపాధి అవకాశాలపై ప్రతికూల ప్రభావం పడే ప్రమాదం ఉందని న్యాయస్థానం అభిప్రాయపడింది. ఈ అంశంపై దాఖలైన పిటిషన్‌ను విచారించిన సందర్భంగా చీఫ్ జస్టిస్ సూర్యకాంత్ నేతృత్వంలోని ధర్మాసనం వివిధ కోణాల్లో స్పందిస్తూ, మహిళల హక్కులను కాపాడే ప్రయత్నంలో అనుకోని సమస్యలు తలెత్తే అవకాశాలను కూడా పరిగణనలోకి తీసుకోవాల్సిన అవసరం ఉందని పేర్కొంది. విచారణ సందర్భంగా చీఫ్ జస్టిస్ మాట్లాడుతూ మహిళలకు నెలసరి సెలవులను చట్టంగా తప్పనిసరి చేయడం సరైన పరిష్కారం కాకపోవచ్చని సూచించారు. ఒకవేళ అలాంటి చట్టం అమలులోకి వస్తే యాజమాన్యాలు మహిళలను ఉద్యోగాల్లో నియమించుకోవడంలో వెనుకంజ వేయవచ్చని ఆయన అభిప్రాయపడ్డారు. మహిళలకు ప్రత్యేకంగా తప్పనిసరి సెలవులు ఇవ్వాల్సి వస్తుందని భావించి, ఉద్యోగాల భర్తీలో వారికి అవకాశాలు తగ్గే ప్రమాదం ఉందని చెప్పారు. ఈ పరిస్థితి చివరికి మహిళల ఉపాధి అవకాశాలనే దెబ్బతీయవచ్చని ఆయన హెచ్చరించారు.

అలాగే ఇలాంటి చట్టాలు మహిళల్లో మానసికంగా కూడా ప్రతికూల ప్రభావం చూపే అవకాశం ఉందని ధర్మాసనం వ్యాఖ్యానించింది. పురుషులతో పోలిస్తే తాము బలహీనులమనే భావన మహిళల్లో ఏర్పడే ప్రమాదం ఉందని చీఫ్ జస్టిస్ అన్నారు. నెలసరి ప్రక్రియ సహజమైనదే అయినప్పటికీ దాన్ని బలహీనతగా చూపించే విధంగా చట్టాలు రూపుదిద్దుకుంటే అది సమానత్వ భావనకు విరుద్ధంగా మారుతుందని ఆయన తెలిపారు. అందుకే ఈ అంశంపై చట్టాలు రూపొందించడంపై జాగ్రత్తగా ఆలోచించాల్సిన అవసరం ఉందని పేర్కొన్నారు.అయితే సమాజంలో నెలసరి గురించి సరైన అవగాహన పెంపొందించడం మాత్రం అత్యంత అవసరమని సుప్రీంకోర్టు స్పష్టం చేసింది. మహిళలు ఎదుర్కొనే ఆరోగ్య సమస్యలు, అవసరాలపై సమాజంలో సున్నితమైన దృక్పథం పెరగాలని సూచించింది. ప్రజల్లో అవగాహన పెంచడం, సంస్థల్లో అనుకూల వాతావరణం కల్పించడం వంటి చర్యలు తీసుకోవడం ద్వారా మహిళలకు సహకారం అందించవచ్చని ధర్మాసనం అభిప్రాయపడింది.

ఈ సందర్భంగా సీనియర్ అడ్వకేట్ ఎంఆర్ షంషాద్ వాదనలు వినిపిస్తూ, గతంలో కేరళ ప్రభుత్వం తీసుకున్న నిర్ణయాన్ని కోర్టు దృష్టికి తీసుకొచ్చారు. రాష్ట్రంలోని విశ్వవిద్యాలయాల్లో చదువుతున్న మహిళా విద్యార్థినులకు నెలసరి సెలవులు అనుమతిస్తూ ప్రభుత్వం నిర్ణయం తీసుకుందని తెలిపారు. అలాగే కొన్ని ప్రైవేట్ కంపెనీలు కూడా మహిళలకు ఇలాంటి సడలింపులు ఇస్తున్నాయని ఆయన చెప్పారు. అయితే ఆ నిర్ణయాలు ప్రత్యేక సందర్భాల్లో తీసుకున్నవేనని, వాటిని దేశవ్యాప్తంగా చట్టంగా అమలు చేయడం వేరు విషయమని చీఫ్ జస్టిస్ వ్యాఖ్యానించారు. మహిళలకు నెలసరి సమయంలో తప్పనిసరిగా సెలవులు ఇవ్వాలని రాష్ట్ర ప్రభుత్వాలను ఆదేశించేలా చట్టం చేయాలని న్యాయవాది శైలేంద్ర మణి త్రిపాఠి పిటిషన్ దాఖలు చేశారు. విద్యార్థినులు మరియు ఉద్యోగాల్లో ఉన్న మహిళలకు ఈ సౌకర్యం కల్పించాలని ఆయన కోరారు. అయితే ఇలాంటి చట్టాలు అమలులోకి వస్తే మహిళలకే ఇబ్బందులు తలెత్తే అవకాశముందని సుప్రీంకోర్టు స్పష్టం చేసింది. చివరికి మహిళల ఉపాధి అవకాశాలు తగ్గే పరిస్థితి ఏర్పడవచ్చని పేర్కొంటూ పిటిషనర్‌కు ధర్మాసనం హెచ్చరిక జారీ చేసింది.