తీసుకున్న రుణం చెల్లించలేదని పొలాన్ని వేలం వేస్తున్నట్లు ఓ రైతు పొలంలో బ్యాంకు అధికారులు ఫ్లెక్సీ పెట్టిన ఘటన కామారెడ్డి జిల్లా లింగంపేట మండలంలోని పోల్కంపేట్ లో చోటుచేసుకుంది. పోల్కంపేట్ గ్రామానికి చెందిన రాజశేఖర్ రెడ్డి అనే రైతు 2010లో భూమిని తనఖాపెట్టి డిస్ట్రిక్ కో-ఆపరేటివ్ సెంట్రల్ బ్యాంకు నుంచి ఐదు లక్షల రూపాయలు రుణం తీసుకున్నారు. కొన్ని వాయిదాలు చెల్లించిన తర్వాత వాయిదాలు చెల్లించడం ఆపేశారు. కొన్నాళ్లకు రుణాలు తిరిగి చెల్లించాల్సిందేనని బ్యాంక్ అధికారులు రైతుపై ఒత్తిడి తెచ్చారు. పలుమార్లు నోటీసులు ఇచ్చినా.. ఎటువంటి సమాధానం రాలేదు. ఈ దశలో పొలాన్ని వేలం వేస్తున్నట్లు రైతు పొలంలో బ్యాంకు అధికారులు ప్లెక్సీని ఏర్పాటు చేశారు. అప్పట్లో ఐదు లక్షలు అప్పు తీసుకుంటే వడ్డీతో ఇప్పుడు పదిహేను లక్షలకు దాటిందని, ఇంత పెద్ద మొత్తం చెల్లించడం భారంగా మారిందని రైతు అన్నారు వడ్డీ తగ్గించాలని బ్యాంక్ అధికారులను రైతులు డిమాండ్ చేస్తున్నారు. పొలంలో ఫ్లెక్సీలు, ఎర్రజెండాలను పెట్టడంపై రైతులు ఆగ్రహం వ్యక్తం చేస్తున్నారు.