ఝార్ఖండ్‌ మాజీ ముఖ్యమంత్రి చంపయీ సోరెన్‌ శుక్రవారం భాజపాలో చేరారు. రెండు రోజుల క్రితమే జేఎంఎం పార్టీకి రాజీనామా చేసిన ఆయన కేంద్రమంత్రి శివరాజ్‌సింగ్‌ చౌహాన్, అస్సాం సీఎం హిమంత బిశ్వశర్మ, ఝార్ఖండ్‌ భాజపా అధ్యక్షుడు బాబూలాల్‌ మరాండీ సమక్షంలో చంపయీ సోరెన్‌ తన మద్దతుదారులతో కలిసి పార్టీలో చేరారు. జేఎంఎం అధినేత శిబు సోరెన్‌కు అత్యంత సన్నిహితుడిగా పేరున్న చంపయీ.. కొంతకాలంగా ఆ పార్టీ తీరుపై తీవ్ర అసంతృప్తి వ్యక్తం చేస్తున్నారు. అయితే, హేమంత్‌ సోరెన్‌ జైలు నుంచి విడుదలైన తర్వాత ముఖ్యమంత్రి బాధ్యతల నుంచి చంపయీ వైదొలగారు. సీఎం పగ్గాలు మళ్లీ హేమంత్‌ సోరెన్‌ చేతికి వెళ్లిపోయాయి. ఈ క్రమంలో సొంత పార్టీ అధినాయకత్వంపై చంపయీ బహిరంగంగానే విమర్శలు గుప్పించారు.