తెలుగుదేశం అధినేత, మాజీ ముఖ్యమంత్రి నారా చంద్రబాబునాయుడి అరెస్టు అన్యాయమని, అది తనకు ఎంతో బాధ కలిగించిందని తెలంగాణ పశుసంవర్థకశాఖ మంత్రి తలసాని శ్రీనివాస్‌యాదవ్‌ అన్నారు. 40 ఏళ్ల సుదీర్ఘ రాజకీయం అనుభవం ఉన్న వ్యక్తిని అవినీతి జరగని కేసులో అక్రమంగా అరెస్టుచేయడం రాజకీయ కక్షే అని తలసాని అన్నారు. ఏపీలో రాజకీయాలు విచిత్రంగా ఉన్నాయని తలసాని ఎద్దేవా చేశారు. చంద్రబాబు అరెస్టు వెనుక కేంద్ర హస్తం ఉందని, వారికి నచ్చని వారిని అక్రమ కేసుల్లో ఇరికించి అరెస్టులు చేయించి తమాషా చేస్తున్నారని మండిపడ్డారు సనత్‌నగర్‌ డివిజన్‌ పరిధిలో అభివృద్ధి పనులు ప్రారంభించిన అనంతరం ఆయన మాట్లాడారు. అధికారం ఎవరికీ శాశ్వతం కాదని, ఇష్టారాజ్యంగా వ్యవహరిస్తే ఎలా అని ప్రశ్నించారు. విచారణ చేసే పద్ధతి ఇది కాదన్న తలసాని.. ఉమ్మడి రాష్ట్రంలో ఆయన అభివృద్ధికి కృషి చేశారని తెలిపారు.