CWC2023: మహా సంగ్రామానికి సర్వం సిద్ధం
ప్రపంచకప్‌లో మరో ఆసక్తికర సమరం జరగనుంది. ప్రపంచకప్‌లో అసలైన పోరుకు రంగం సిద్ధమైంది. మహా సంగ్రామం పాయింట్ల పట్టికలో తొలి రెండు స్థానాల్లో నిలిచిన జట్లు అగ్రస్థానం కోసం పోటీ పడబోతున్నాయి. దక్షిణాఫ్రికాతో టీమిండియా తలపడబోతుంది. అన్ని రంగాల్లో పటిష్టంగా ఉన్న ఇరు జట్లు ఈ మ్యాచ్‌ను ప్రతిష్టాత్మకంగా తీసుకుంటున్నాయి. ఈ ప్రపంచకప్‌లో హైలెట్‌ మ్యాచ్‌గా భావిస్తున్న ఈ మ్యాచ్‌ కోల్‌కత్తా ఈడెన్‌గార్డెన్స్‌లో జరగనుంది. ఒక్క నెదర్లాండ్స్‌ మినహా భారత్ వేదికగా జరుగుతున్న ప్రపంచకప్‌లో అసలు దక్షిణాఫ్రికాకు ఓటమే లేదు. ప్రత్యర్థి బౌలర్లను ఊచకోత కోస్తూ ప్రోటీస్‌ జట్టు దూసుకుపోతోంది. ఇప్పటివరకూ రోహిత్ సేనకు అసలు పోటీనే లేకుండా పోయింది. ఈ రెండు జట్లు నేడు కొదమసింహాల్లో ఢీ కొట్టబోతున్నాయి.
ఒక్క మ్యాచ్‌ ఓడిపోకుండా ప్రపంచకప్‌ గెలవాలనే పట్టుదలతో ఉన్న రోహిత్ సేన ఈ మ్యాచ్‌లోనూ గెలిచి సెమీస్‌కు ముందు ఆత్మవిశ్వాసాన్ని మరింత పెంచుకోవాలని చూస్తోంది. బ్యాటింగ్‌లో భారత జట్టు చాలా బలంగా ఉంది. రోహిత్ శర్మ, శుభ్‌మన్ గిల్, విరాట్ కోహ్లీ, శ్రేయాస్ అయ్యర్, KL రాహుల్, రవీంద్ర జడేజా, సూర్యకుమార్ యాదవ్‌లతో బ్యాటింగ్ దుర్భేద్యంగా ఉంది. గత మ్యాచ్‌లో త్రుటిలో సెంచరీలు చేజార్చుకున్న కోహ్లీ, గిల్ ఈ మ్యాచ్‌లు కచ్చితంగా శతకాలు సాధించాలని పట్టుదలగా ఉన్నారు. రోహిత్ శర్మ కూడా భారీ స్కోరుపై కన్నేశాడు. గత మ్యాచ్‌లో విధ్వంసకర ఇన్నింగ్స్‌ ఆడిన శ్రేయస్స్‌ అయ్యర్ మరోసారి దానిని పునరావృతం చేయాలని పట్టుదలగా ఉన్నాడు. ఇటు టీమిండియా బౌలింగ్‌ విభాగం పిచ్‌పై నిప్పులు చెరుగుతోంది. మహమ్మద్ షమీ, బుమ్రా, సిరాజ్ కూడా మెరుపులు మెరిపిస్తున్నారు. కుల్దీప్ యాదవ్, రవీంద్ర జడేజా కూడా రాణిస్తుండడంతో టీమిండియా అన్ని విభాగాల్లో పటిష్టంగా ఉంది. పవర్ హిట్టర్లతో నిండిన దక్షిణాఫ్రికా బ్యాటింగ్ లైనప్.. భారత బౌలర్లకు సవాల్‌ విసరనుంది. అయిదు మ్యాచుల్లో ప్రొటీస్‌ 300కుపైగా పరుగులు చేసింది. డి కాక్ ఏడు మ్యాచ్‌ల్లో 545 పరుగులతో ఈ ప్రపంచకప్‌లో టాప్‌ రన్‌ స్కోరర్‌గా ఉన్నాడు.ఈడెన్‌ గార్డెన్స్‌లో రెండోసారి బ్యాటింగ్ తేలిక కాబట్టి టాస్‌ కీలకంగా మారనుంది.
భారత్ జట్టు: రోహిత్ శర్మ ( కెప్టెన్‌), శుభ్‌మన్ గిల్, విరాట్ కోహ్లీ, శ్రేయాస్ అయ్యర్, KL రాహుల్, రవీంద్ర జడేజా, శార్దూల్ ఠాకూర్, జస్ప్రీత్ బుమ్రా, మహ్మద్ సిరాజ్, కుల్దీప్ యాదవ్, మహ్మద్ షమీ, రవిచంద్రన్ అశ్విన్, ఇషాన్ కిషన్, సూర్యకుమార్ యాదవ్, ప్రసిద్ధ్ కృష్ణ
దక్షిణాఫ్రికా జట్టు: టెంబా బావుమా (కెప్టెన్‌), గెరాల్డ్ కోయెట్జీ, క్వింటన్ డి కాక్, రీజా హెండ్రిక్స్, మార్కో జాన్సెన్, హెన్రిచ్ క్లాసెన్, ఆండిల్ ఫెహ్లుక్వాయో, కేశవ్ మహరాజ్, ఐడెన్ మాక్రమ్, డేవిడ్ మిల్లర్, లుంగీ ఎంగిడి, కగిసో రబాడ, షంసీ, రాస్సీ వాన్ డెర్ డస్సెన్, లిజాద్ విలియమ్స్.