BCCI: బీసీసీఐకి కాసుల వర్షం కురిపించిన 2025
భారత క్రికెట్ నియంత్రణ మండలి మరోసారి ప్రపంచంలోనే అత్యంత ధనిక క్రికెట్ బోర్డుగా తన ఆధిపత్యాన్ని చాటుకుంది. 2025 ఆర్థిక సంవత్సరానికి సంబంధించి బీసీసీఐ గణాంకాలు విస్తుగొలిపే నిజాలను బయటపెట్టాయి. ఈ ఒక్క ఏడాదిలోనే బోర్డు ఏకంగా రూ. 3,358 కోట్ల భారీ మిగులు సాధించింది. అయితే, ఒకవైపు కాసుల వర్షం కురుస్తున్నా, మరోవైపు సోషల్ మీడియాలో బీసీసీఐపై అభిమానులు తీవ్ర స్థాయిలో విమర్శలు గుప్పిస్తున్నారు. దీనికి ప్రధాన కారణం టీమిండియా దిగ్గజాలు రోహిత్ శర్మ, విరాట్ కోహ్లీల పట్ల బోర్డు వ్యవహరిస్తున్న తీరు.
బీసీసీఐ కార్యదర్శి జై షా వెల్లడించిన వివరాల ప్రకారం, ఐపీఎల్ హక్కులు, ద్వైపాక్షిక సిరీస్లు, స్పాన్సర్షిప్ ఒప్పందాల ద్వారా బోర్డుకు కళ్లు చెదిరే ఆదాయం లభించింది. 2024-25 సీజన్లో బీసీసీఐ మొత్తం ఆదాయం గత ఏడాదితో పోలిస్తే గణనీయంగా పెరిగింది. రూ. 3,358 కోట్ల నికర లాభం రావడం భారత క్రికెట్ ఆర్థిక బలాన్ని మరోసారి నిరూపించింది. ఈ నిధులను స్టేడియాల అభివృద్ధికి, దేశవాళీ క్రికెటర్ల సంక్షేమానికి ఖర్చు చేస్తామని బోర్డు తెలిపింది. 2025 లో డ్రీమ్ 11 ఒప్పందం వంటి ఒప్పందం విచ్ఛిన్నం కావడంతో భారత బోర్డు ఎదురుదెబ్బ తగిలింది. అయితే ఇది ఉన్నప్పటికీ బీసీసీఐ గణనీయమైన లాభాలను ఆర్జించింది. ఈ ఎదురుదెబ్బను అధిగమించడానికి బీసీసీఐ అపోలో టైర్స్, అడిడాస్ వంటి సంస్థలతో ఒప్పందాలు కుదుర్చుకుంది. అయితే, ఐసీసీ నుంచి బీసీసీఐ ఆదాయం తగ్గింది. బీసీసీఐ, ఐసీసీ మొత్తం ఆదాయంలో 38.5 శాతం పొందుతుంది. ఇది ఇతర క్రికెట్ బోర్డులలో అత్యధికం. ఈ తగ్గుదల ఉన్నప్పటికీ, 2025-26 ఆర్థిక సంవత్సరంలో బీసీసీఐ రూ. 8,963 కోట్లు ఆర్జించగలదని అంచనా.
వడ్డీతో రూ.1500 కోట్లు..
బోర్డు తమ నిధులను సమర్థవంతంగా నిర్వహించడం వల్ల వడ్డీ రూపంలోనే సుమారు రూ.1,500 కోట్లు ఆదాయాన్ని ఆర్జించింది. గతేడాది వడ్డీ ఆదాయం రూ.1,368 కోట్లు మాత్రమే. ఐపీఎల్, అంతర్జాతీయ మ్యాచ్ల మీడియా రైట్స్, ఇతర వాణిజ్య ఒప్పందాల ద్వారా బీసీసీఐ భారీ ఆదాయాన్ని పొందింది. ఐసీసీ నుంచి వచ్చే ఆదాయం వాటాలో తగ్గుదల ఉన్నప్పటికీ.. బోర్డు స్వయం సమృద్ధి, సమర్థవంతమైన ఆర్థిక ప్రణాళికతో ప్రపంచంలోనే ధనిక స్పోర్ట్స్ బోర్డుగా తన స్థానాన్ని మరింత సుస్థిరం చేసుకుంది. ప్రస్తుతం ఐసీసీ నుంచి బీసీసీఐ అత్యధికంగా 38.5 శాతం వాటాను పొందుతుంది.
భారీగా కేటాయింపులు..
భారీ లాభాలను పొందిన బీసీసీఐ.. భవిష్యత్తు అవసరాల కోసం భారీ మొత్తంలో నిధులను కేటాయించింది. మౌలిక సదుపాయల కోసం రాష్ట్ర క్రికెట్ అసోసియేషన్ల స్టేడియాల అభివృద్ధి, సబ్సిడీల కోసం రూ. 500 కోట్లు పక్కనపెట్టింది. ఆదాయపన్ను చెల్లింపుల కోసం రూ.3,320 కోట్లు, అత్యవసర నిధిగా రూ.1,000 కోట్లు, కోర్టు కేసులు, ఇతర ఖర్చుల కోసం రూ.160 కోట్లు కేటాయించింది. ఇంతటి భారీ లాభాలు ఉన్నప్పటికీ, అభిమానులు మాత్రం బోర్డుపై సంతోషంగా లేరు. ఇటీవల సోషల్ మీడియాలో వైరల్ అయిన ఒక వీడియో బీసీసీఐపై వ్యతిరేకతకు కారణమైంది. ఆ వీడియోలో రోహిత్ శర్మ, విరాట్ కోహ్లీ వంటి సీనియర్ ఆటగాళ్లను తక్కువ చేసి చూపేలా కొన్ని పరిణామాలు ఉండటం అభిమానులను కలిచివేసింది. బీసీసీఐ ఆదాయాల వార్త వెలువడిన వెంటనే, అభిమానులు సోషల్ మీడియాలో దానిపై విమర్శలు ప్రారంభించారు.