MCC: క్రికెట్ చరిత్రలో కనీ వినీ ఎరుగని ఘట్టం
ఐసీసీ టీ20 ప్రపంచకప్ 2026 క్రికెట్ చరిత్రలోనే అరుదైన ఘట్టానికి వేదిక కానుంది. ఇప్పటివరకు అంతర్జాతీయ క్రీడల్లో పెద్దగా చూడని ఒక ప్రత్యేక సంఘటన ఈ టోర్నీలో చోటు చేసుకోబోతోంది. ఒకే ఆటగాడు రెండు దేశాల తరఫున క్రికెట్ ఆడిన ఉదాహరణలు గతంలో ఉన్నప్పటికీ, రెండు వేర్వేరు క్రీడల్లో రెండు దేశాల తరఫున వరల్డ్కప్ల్లో పాల్గొనడం మాత్రం ఇదే తొలిసారి కావడం విశేషం. ఈ అరుదైన ఘట్టానికి కేంద్రబిందువుగా నిలవబోతున్నాడు ఇటలీ క్రికెట్ జట్టు కెప్టెన్ వేన్ మ్యాడ్ సెన్. దక్షిణాఫ్రికా జన్మస్థానమైన మాడ్సన్, 2006లో సౌతాఫ్రికా తరఫున హాకీ వరల్డ్కప్లో పాల్గొన్నాడు. అప్పట్లో హాకీ క్రీడలో అంతర్జాతీయ వేదికపై దేశాన్ని ప్రాతినిధ్యం వహించిన అతడు, ఇరవై సంవత్సరాల తర్వాత మరో క్రీడలో, మరో దేశం తరఫున వరల్డ్కప్ బరిలోకి దిగడం క్రీడా ప్రపంచాన్ని ఆశ్చర్యానికి గురిచేస్తోంది.
తొలిసారి బరిలోకి ఇటలీ
ఇటలీ క్రికెట్ చరిత్రలోనే తొలిసారి టీ20 ప్రపంచకప్కు అర్హత సాధించగా, ఆ జట్టుకు సారథ్య బాధ్యతలు మాడ్సన్ భుజాన పడటం మరింత విశేషం. అనుభవజ్ఞుడైన ఆటగాడిగా, అంతర్జాతీయ లీగ్లలో సుదీర్ఘ అనుభవం కలిగిన వ్యక్తిగా అతనిపై ఇటలీ క్రికెట్ బోర్డు పూర్తి నమ్మకం ఉంచింది. ఇటలీ తరఫున 2023లో అంతర్జాతీయ క్రికెట్లో అడుగుపెట్టిన మాడ్సన్, తక్కువ కాలంలోనే జట్టుకు కీలక ఆటగాడిగా మారాడు. టీ20 అంతర్జాతీయ క్రికెట్లో ఇప్పటివరకు ఏడు మ్యాచ్లు ఆడిన మాడ్సన్, నిలకడైన బ్యాటింగ్తో మంచి గుర్తింపు తెచ్చుకున్నాడు. మిడిల్ ఆర్డర్లో ఆడుతూ జట్టును ఆదుకునే పాత్రను సమర్థంగా పోషిస్తున్నాడు. అతని సగటు, స్ట్రైక్రేట్ అతడి అనుభవాన్ని స్పష్టంగా చూపిస్తాయి. కీలక సందర్భాల్లో హాఫ్ సెంచరీలు నమోదు చేసి, ఇటలీ జట్టు పోటీ పడగల స్థాయికి చేరుకోవడంలో తన వంతు పాత్ర పోషించాడు. దేశవాళీ క్రికెట్లో ఇంగ్లాండ్ కౌంటీ క్రికెట్లో అతడు సుదీర్ఘకాలం ఆడాడు. ముఖ్యంగా డర్బీషైర్ జట్టుకు కీలక బ్యాటర్గా కొనసాగుతూ వేలాది పరుగులు చేశాడు. టీ20 ఫార్మాట్లో సెంచరీ నమోదు చేయడం ద్వారా తన దూకుడు బ్యాటింగ్కు నిదర్శనం ఇచ్చాడు. డర్బీషైర్ తరఫున అత్యధిక పరుగులు చేసిన ఆటగాళ్లలో ఒకడిగా అతడి పేరు నమోదైంది. అంతేకాదు, ప్రపంచవ్యాప్తంగా జరిగే ప్రఖ్యాత లీగ్లలో కూడా మాడ్సన్ పాల్గొన్నాడు. పాకిస్థాన్ సూపర్ లీగ్లో వేర్వేరు జట్లకు ఆడుతూ కీలక ఇన్నింగ్స్లు ఆడాడు. బంగ్లాదేశ్ ప్రీమియర్ లీగ్తో పాటు, ఇంగ్లాండ్లో నిర్వహించే ‘ది హండ్రెడ్’ లీగ్లో కూడా అతడి ప్రదర్శన ప్రశంసలు అందుకుంది. 2021 నుంచి పలు సీజన్లపాటు మాంచెస్టర్ ఒరిజినల్స్ తరఫున ఆడిన అతడు, తరువాత లండన్ స్పిరిట్ జట్టుకు ఎంపికయ్యాడు.