Cristiano Ronaldo: హెడర్ గోల్ అద్భుతః; రికార్డుల మోతెక్కిస్తోన్న రొనాల్డో
క్రిస్టియానో రొనాల్డో ప్రాతినిధ్యం వహిస్తున్న సౌదీ లీగ్ జట్టు అల్ నాజర్ జట్టు వరుస ఓటముల తర్వాత విజయం సాధించింది. మంగళవారం వారం జరిగిన అరబ్ క్లబ్ ఛాంపియన్స్ కప్‌లో 4-1 గోల్స్ తేడాతో యూఎస్ మొనాస్టిర్‌పై విజయం సాధించింది. క్రిస్టియానో రొనాల్డో కూడా ఒక హెడర్ గోల్ కొట్టి విజయంలో పాలు పంచుకున్నాడు.
తనకు అలవాటైన స్టైల్‌లో ఓ హెడర్ ద్వారా గోల్ కొట్టి ఆధిక్యంలోకి తీసుకెళ్లాడు. దీంతో పాటు పలు రికార్డులూ నమోదు చేశాడు. 145 హెడర్ గోల్స్‌తో ఫుట్‌బాల్ చరిత్రలోనే అత్యధిక హెడర్ గోల్స్ చేసిన ఆటగాడిగా రికార్డ్ సృష్టించాడు. ఇంతకు ముందు ఈ రికార్డ్ 144 హెడర్ గోల్స్‌తో గెరార్డ్ ముల్లర్ పేరు మీద ఉండేది. అలాగే తన కెరీర్‌లో ఇది 839వ గోల్ నమోదు చేశాడు.
Ronaldooooooo pic.twitter.com/rab2wPkZAQ
— AlNassr FC (@AlNassrFC_EN) July 31, 2023
యూరోపియన్ క్లబ్‌లైన బెనిఫీసియా, సెల్టా విగోలోతో ఓటముల తర్వాత ఆ జట్టుకు ఈ సీజన్‌లో ఇదే మొదటి విజయం. 42వ నిమిషంలో ఆ జట్టు తరపున తాలిస్కా మొదటి గోల్ చేశాడు. అనంతరం అల్ నాజర్ జట్టు డిఫెండర్ తప్పిదం చేయడంతో వారి గోల్‌లోకే బంతిని పంపి ప్రత్యర్థికి 1 గోల్ సమర్పించుకున్నారు. దీంతో స్కోర్ 1-1తో సమం అయింది. దూకుడుగా ఆడిన అల్ నాజర్ జట్టుకి క్రిస్టియానో రొనాల్డో 74వ నిమిషంలో ఓ అద్భుతమైన హెడర్‌తో గోల్ సాధించిపెట్టాడు.
ఆ తర్వాత ఆట మొత్తం అల్ నాజర్ వైపు మళ్లింది. ఆట చివరి 2 నిమిషాల్లో అబ్ధుల్లా అల్ అమ్రి(88'), అబ్ధులాజిజ్ సౌద్ అల్ ఇల్వాయిలు(90') గోల్స్ కొట్టడంతో 4-1 తో తిరుగులేని విజయాన్ని సొంతం చేసుకుంది.