TRISHA: తెలంగాణ అమ్మాయి కొత్త చరిత్ర
మలేషియా వేదికగా జరుగుతున్నఐసీసీ అండర్-19 మహిళల టీ20 ప్రపంచకప్‌లో తెలంగాణ తేజం గొంగడి త్రిష చరిత్ర సృష్టించింది. ఈ మెగా టోర్నీలో వరుసగా నాలుగు మ్యాచ్‌లు గెలిచిన భారత్.. స్కాంట్లాండ్‌తో జరిగిన మ్యాచ్‌లోనూ ఘన విజయం సాధించింది. ఈ మ్యాచ్‌లో తెలుగమ్మాయి గొంగడి త్రిష రికార్డు సృష్టించింది. అండర్ 19 మహిళల టీ20 ప్రపంచకప్ చరిత్రలో తొలి సెంచరీ సాధించింది. అండర్-19 మహిళల టీ20 ప్రపంచకప్‌లో విశేషంగా రాణిస్తున్న ఈ తెలంగాణ అమ్మాయి.. సూపర్‌-6లో భాగంగా స్కాట్లాండ్‌తో పోరులో సంచలనం సృష్టించింది. స్కాట్లాండ్‌తో మ్యాచ్‌లో ఓపెనర్‌గా బరిలోకి దిగిన గొంగడి త్రిష ఆకాశమే హద్దుగా చెలరేగిపోయింది. 53 బంతుల్లోనే సెంచరీ కొట్టింది. ఇన్నింగ్స్‌ ఆసాంతం సాధికారికంగా బ్యాటింగ్ చేసిన ఈ ప్లేయర్.. నాటౌట్‌గా నిలిచింది. జట్టు స్కోరును 200 పరుగుల మార్కును దాటించింది. ఈ ఇన్నింగ్స్‌తో మహిళల అండర్-19 టీ20ల్లో తొలి సెంచరీ నమోదు చేసిన బ్యాటర్‌గా త్రిష రికార్డు సృష్టించింది.
త్రిష బ్యాటింగ్ హోరు..
త్రిష కేవలం 53 బంతుల్లోనే మెరుపు సెంచరీ సాధించింది. తద్వారా అండర్ 19 మహిళల టీ20 వరల్డ్ కప్ లో సెంచరీ సాధించిన తొలి ప్లేయర్ గా రికార్డు పుటలకెక్కింది. ఈ మ్యాచ్‌లో త్రిష 53 బంతుల్లో 12 ఫోర్లు, 4 సిక్సర్ల సాయంతో సెంచరీ పూర్తి చేసుకుంది. ఈ మ్యాచ్‌లో మొత్తంగా 59 బంతులు ఎదుర్కొన్న త్రిష 13 ఫోర్లు, 4 సిక్సర్ల సాయంతో 110 పరుగులు చేసి అజేయంగా నిలిచింది. త్రిష విధ్వంసంతో మొదట బ్యాటింగ్ చేసిన భారత్ నిర్ణీత 20 ఓవర్లలో వికెట్‌ నష్టానికి 208 పరుగుల రికార్డు స్కోర్‌ చేసింది. భద్రాద్రి కొత్తగూడెం జిల్లా కి చెందిన త్రిష ఈ టోర్నీలో టాప్ స్కోరర్‌గా కొనసాగుతోంది. ఐసీసీ అండర్-19 మహిళల టీ20 ప్రపంచకప్ ప్రస్తుత సీజన్‌లో త్రిష స్కోరు 230 పరుగులకు చేరుకుంది.
దేశవాళీలోనూ...
త్రిష తెలంగాణలోని భద్రాచలంలో 2005 డిసెంబర్ 15న పుట్టింది. రైట్‌ హ్యాండ్‌ బ్యాటింగ్‌తో పాటు రైట్‌ ఆర్మ్‌ లెగ్‌ బ్రేక్‌ బౌలింగ్‌ కూడా వేసే త్రిష దేశవాళి.. క్రికెట్‌లో హైదరాబాద్‌కు ప్రాతినిథ్యం వహించింది. ఇప్పుడు మలేషియా వేదికగా జరుగుతోన్న ఐసీసీ అండర్ 19 మహిళల టీ20 ప్రపంచకప్ లో భారీగా పరుగులు సాధిస్తూ అందరి దృష్టిని ఆకర్షిస్తోంది. అండర్ 19 టీ 20 మ్యాచుల్లో సెంచరీ చేసిన తొలి బ్యాటర్ గా ఆమె రికార్డు సృష్టించారు. అండర్ 16 జట్టులో ఆడి ఉమెన్ ఆఫ్ ది సిరీస్‌గా ఆమె ఎంపికయ్యారు. అండర్ 19 జట్లకు ఆమె 12 ఏళ్ల వయస్సులో ఆడారు.