IPL: ఉత్కంఠ ఊపేసింది..గుజరాత్ బతికిపోయింది
ఐపీఎల్-19లో బుధవారం జరిగిన మ్యాచ్ అభిమానులకు ఉత్కంఠభరిత అనుభవాన్ని అందించింది. గెలుపు-ఓటముల మధ్య చివరి బంతి వరకు ఊహాగానాలు మారుతూ సాగిన ఈ పోరులో గుజరాత్ టైటాన్స్ అసాధారణ పోరాటంతో ఒక్క పరుగు తేడాతో దిల్లీ క్యాపిటల్స్పై విజయం సాధించింది. భారీ లక్ష్యాన్ని ఛేదించే క్రమంలో దిల్లీ దాదాపు గెలుపు ముంగిట నిలిచినా, కీలక క్షణాల్లో జరిగిన తప్పిదాలు మ్యాచ్ను చేజార్చాయి. 211 పరుగుల లక్ష్యంతో బరిలోకి దిగిన దిల్లీకి ఓపెనర్లు కేఎల్ రాహుల్, నిశాంక అద్భుత ఆరంభం అందించారు. పవర్ప్లే ముగిసే సరికి వికెట్ కోల్పోకుండా 63 పరుగులు చేయడం ద్వారా జట్టుకు బలమైన పునాది వేశారు. నిశాంక దూకుడుగా ఆడుతూ బౌలర్లపై ఒత్తిడి పెంచగా, రాహుల్ ప్రారంభంలో నెమ్మదిగా ఆడి తర్వాత గేర్ మార్చాడు. 10 ఓవర్లు పూర్తికాకముందే 100 పరుగుల మార్క్ను దాటిన దిల్లీ, లక్ష్యం వైపు దూసుకెళ్తున్నట్లే కనిపించింది.
మలుపు తిప్పిన రషీద్ ఖాన్
అయితే ఈ దశలో మ్యాచ్ మలుపు తిరిగింది. రషీద్ ఖాన్ తన మాయాజాలంతో వరుసగా కీలక వికెట్లు తీసి దిల్లీని కుదేలు చేశాడు. ముందుగా నితీశ్ రాణాను ఔట్ చేసిన అతను, వెంటనే సమీర్ రిజ్విని తొలి బంతికే బౌల్డ్ చేసి షాక్ ఇచ్చాడు. ఆపై కెప్టెన్ అక్షర్ పటేల్ వికెట్ను కూడా దక్కించుకుని దిల్లీని 134/4తో ఒత్తిడిలోకి నెట్టాడు. ఇదే సమయంలో డేవిడ్ మిల్లర్ గాయంతో రిటైర్డ్ హర్ట్గా వెళ్లిపోవడం దిల్లీ పరిస్థితిని మరింత క్లిష్టం చేసింది. రాహుల్ మాత్రం పోరాటాన్ని కొనసాగించాడు. అర్ధశతకం దాటిన తర్వాత వేగం పెంచి జట్టును గెలుపు దిశగా తీసుకెళ్లే ప్రయత్నం చేశాడు. కానీ స్టబ్స్ రనౌటయ్యాడు. తర్వాత రాహుల్ కూడా ఔటవడంతో మ్యాచ్ గుజరాత్ వైపు మొగ్గింది. ఈ దశలో మళ్లీ క్రీజులోకి వచ్చిన మిల్లర్ మ్యాచ్ను మరోసారి తారుమారు చేశాడు.
19వ ఓవర్లో సిరాజ్పై రెండు సిక్సర్లు, ఒక ఫోర్ బాదుతూ సమీకరణాన్ని ఒక్కసారిగా తగ్గించాడు. చివరి ఓవర్లో దిల్లీకి గెలుపు చాలా దగ్గరగా కనిపించింది. ప్రసిద్ధ్ కృష్ణ వేసిన ఆ ఓవర్లో తొలి బంతికే ఫోర్ రావడంతో ఒత్తిడి గుజరాత్పై పడింది. అయితే తర్వాతి క్షణాల్లో జరిగిన పరిణామాలు మ్యాచ్ దిశను పూర్తిగా మార్చేశాయి. కీలక సమయాల్లో సింగిల్స్ తీసుకోకుండా ఉండటం, చివరి బంతికి సరైన షాట్ ఆడలేకపోవడం దిల్లీకి చేటు చేసింది. చివరికి బై కోసం ప్రయత్నించగా కుల్దీప్ రనౌటవడంతో గుజరాత్ ఒక్క పరుగు తేడాతో విజయం సాధించింది.బ్యాటింగ్ చేసిన గుజరాత్కు ప్రారంభంలోనే సాయి సుదర్శన్ వికెట్ కోల్పోయినా, తర్వాత జోస్ బట్లర్ దూకుడుగా ఆడి జట్టును గాడిలో పెట్టాడు. తక్కువ బంతుల్లోనే అర్ధశతకం సాధించిన బట్లర్ స్కోరు వేగంగా పెంచాడు. అతనికి తోడుగా శుభ్మన్ గిల్ నెమ్మదిగా ఆడి ఇన్నింగ్స్ను నిలబెట్టాడు. బట్లర్ ఔటైన తర్వాత గిల్, వాషింగ్టన్ సుందర్ కలిసి అద్భుత భాగస్వామ్యాన్ని నెలకొల్పారు. ఈ జోడీ మూడో వికెట్కు వేగంగా పరుగులు జోడిస్తూ దిల్లీ బౌలర్లను ఇబ్బందులకు గురిచేసింది. ముఖ్యంగా సుందర్ దూకుడుగా ఆడుతూ కీలక షాట్లు ఆడగా, గిల్ స్థిరంగా నిలబడి ఇన్నింగ్స్ను నిర్మించాడు. మధ్య ఓవర్లలో ఈ భాగస్వామ్యం మ్యాచ్ను గుజరాత్ వైపు మళ్లించింది. చివరి ఓవర్లలో కూడా కొంత వేగం పెంచడంతో గుజరాత్ 4 వికెట్లకు 210 పరుగుల భారీ స్కోరు నమోదు చేసింది. ఈ మ్యాచ్లో బ్యాటింగ్లో గిల్, బట్లర్, సుందర్ మెరిపించగా.. రషీద్ కీలక పాత్ర పోషించాడు.