IPL: శాంసన్ శతకనాదం.. చెన్నై విజయనాదం
ఐపీఎల్ 2026 సీజన్లో వరుస పరాజయాలతో ఒత్తిడిలో ఉన్న చెన్నై సూపర్కింగ్స్ ఎట్టకేలకు తమ అసలు శక్తిని ప్రదర్శించింది. చెపాక్ మైదానం మరోసారి పసుపు జెర్సీలకు అదృష్టాన్ని తీసుకువచ్చింది. విమర్శల నడుమ నిలిచిన సంజు శాంసన్ ఒక్క మ్యాచ్తోనే కథను మలుపు తిప్పాడు. అతడి అద్భుత శతకం, యువ ఆటగాడు ఆయుష్ మాత్రే దూకుడు, చివర్లో బౌలర్ల కట్టుదిట్టమైన ప్రదర్శన ఇలా అన్నీ కలిసి చెన్నైకి ఈ సీజన్లో తొలి విజయాన్ని అందించాయి. ఢిల్లీ క్యాపిటల్స్పై 23 పరుగుల తేడాతో గెలిచిన ఈ మ్యాచ్ ద్వారా సీఎస్కే తిరిగి పోటీలోకి వచ్చిందనే సంకేతాలు ఇచ్చింది. టాస్ ఓడి ముందుగా బ్యాటింగ్కు దిగిన చెన్నై ఆరంభం నుంచే దూకుడు ప్రదర్శించింది. తొలి మూడు మ్యాచ్ల్లో నిరాశపరిచిన సంజు శాంసన్ ఈసారి పూర్తి భిన్నంగా కనిపించాడు. బౌలర్లపై ఎటువంటి ఒత్తిడి లేకుండా ఆడుతూ, కంటి-చేతి సమన్వయంతో అద్భుతమైన షాట్లు ఆడాడు. మరో ఓపెనర్ రుతురాజ్ త్వరగా ఔటైనా, శాంసన్ మాత్రం తన రిథమ్ను కోల్పోలేదు. పవర్ప్లే నుంచే బౌండరీల వర్షం కురిపిస్తూ స్కోర్బోర్డును వేగంగా నడిపించాడు. ముకేశ్, అక్షర్, నటరాజన్ వంటి బౌలర్లపై వరుస ఫోర్లు, సిక్సర్లు బాదుతూ మ్యాచ్ను పూర్తిగా తన నియంత్రణలోకి తీసుకున్నాడు.
26 బంతుల్లోనే అర్ధశతకం పూర్తి చేసిన శాంసన్, తర్వాత మరింత వేగం పెంచాడు. అతడికి మరో వైపు యువ బ్యాటర్ ఆయుష్ మాత్రే అద్భుతంగా సహకరించాడు. ఒత్తిడిని లెక్కచేయకుండా ఆడిన మాత్రే, కీలక సమయాల్లో భారీ షాట్లు ఆడుతూ జట్టుకు బలమైన స్థితి తీసుకువచ్చాడు. ఇద్దరి మధ్య భాగస్వామ్యం మ్యాచ్కు టర్నింగ్ పాయింట్గా నిలిచింది. 17 ఓవర్లకు చెన్నై 170 దాటేసింది అంటే వారి దూకుడు ఏ స్థాయిలో ఉందో అర్థమవుతుంది. చివరి ఓవర్లలో శివమ్ దూబె వేగంగా పరుగులు జోడించడంతో స్కోరు మరింత పెరిగింది. మరోవైపు శాంసన్ తన శతకాన్ని స్టైలిష్గా పూర్తి చేశాడు. ఒక ఫోర్తో సెంచరీ మార్క్ను అందుకున్న అతడు, ఈ సీజన్లో తొలి శతకం నమోదు చేసిన ఆటగాడిగా నిలిచాడు. మొత్తం మీద 20 ఓవర్లలో చెన్నై 212 పరుగుల భారీ స్కోరు చేసింది. 213 పరుగుల లక్ష్యంతో బరిలోకి దిగిన ఢిల్లీ క్యాపిటల్స్ ఆరంభంలోనే గట్టిగా పోరాడింది. ఓపెనర్లు నిశాంక, రాహుల్ వేగంగా పరుగులు చేస్తూ మ్యాచ్ను సమాన స్థాయిలో ఉంచారు. ఐదు ఓవర్లలోనే 60 పైచిలుకు స్కోరు సాధించడం ఢిల్లీకి మంచి ఆరంభం ఇచ్చింది. అయితే ఆ తర్వాత మ్యాచ్ పూర్తిగా మలుపు తిరిగింది. చెన్నై బౌలర్లు వరుసగా వికెట్లు తీస్తూ ఢిల్లీపై ఒత్తిడి పెంచారు.
కొద్ది వ్యవధిలోనే మూడు కీలక వికెట్లు కోల్పోయిన ఢిల్లీ కష్టాల్లో పడింది. సమీర్ రిజ్వి కూడా త్వరగా ఔటవడంతో పరిస్థితి మరింత క్లిష్టమైంది. ఒక వైపు ట్రిస్టన్ స్టబ్స్ మాత్రం ధైర్యంగా ఆడుతూ జట్టును నిలబెట్టేందుకు ప్రయత్నించాడు. అతడికి నిశాంక మంచి సహకారం అందించినప్పటికీ, ఇతర బ్యాటర్లు విఫలమవడంతో ఛేదన క్రమంగా కష్టమైంది. చెన్నై బౌలింగ్లో జెమీ ఓవర్టన్ అద్భుత ప్రదర్శన చేశాడు. కీలక సమయాల్లో వికెట్లు తీసి మ్యాచ్ను సీఎస్కే వైపు తిప్పాడు. ముఖ్యంగా చివరి ఓవర్లలో అతడి కట్టుదిట్టమైన బౌలింగ్ ఢిల్లీ ఆశలను పూర్తిగా చంపేసింది. స్టబ్స్ చివరివరకు పోరాడినా, 19వ ఓవర్లో అతడు ఔటవడంతో మ్యాచ్ పూర్తిగా చెన్నై చేతుల్లోకి వెళ్లిపోయింది. సీఎస్కేకు రెండు పాయింట్లకే పరిమితం కాదు. వరుస పరాజయాల తర్వాత జట్టులో నమ్మకాన్ని తిరిగి తీసుకువచ్చింది. సంజు శాంసన్ ఫామ్లోకి రావడం, యువ ఆటగాళ్లు బాధ్యత తీసుకోవడం ఊపిరినిచ్చాయి.