KARNATAKA: అప్పుడు.. ఇప్పుడు..ఎప్పుడూ.. కలిసే..
కర్ణాటక రాజకీయాల్లో ఆసక్తిగా ఎదురుచూస్తున్న అధికార మార్పిడికి సంబంధించిన చర్చలకు శుభం కార్డు పడింది. కర్ణాటకలో క్యాంపు రాజకీయాలు లేవని.. తనకూ, సీఎం సిద్ధరామయ్యకు మధ్య విబేధాలు లేవన్నారు డిప్యూటీ సీఎం డీకే శివకుమార్. ఇద్దరం కలిసి పనిచేస్తామని చెప్పారు. శనివారం ఉదయం సీఎం సిద్ధరామయ్య ఇంట్లో ఇరువురు నేతలు బ్రేక్ ఫాస్ట్ మీటింగ్ లో పాల్గొన్నారు. దాదాపు 40 నిమిషాల పాటు బ్రేక్ ఫాస్ట్ మీటింగ్ సాగింది. ఈ సందర్భంగా ఇద్దరు నేతలు ప్రెస్ మీట్ నిర్వహించారు.
ఎప్పటికీ విభేదాలు లేవ్
తమ ఇద్దరి మధ్య ఎలాంటి భేదాభిప్రాయాలు అప్పుడు, ఇప్పుడు, ఎప్పుడూ లేవన్నారు సీఎం సిద్ధరామయ్య. తాము హైకమాండ్ నిర్ణయాన్ని గౌరవిస్తామని చెప్పారు. డీకేతో బ్రేక్ ఫాస్ట్ చేయాలని కేసీ వేణుగోపాల్ చెప్పారని.. అందులో భాగంగా బ్రేక్ ఫాస్ట్ మీటింగ్ ఏర్పాటు చేసినట్లు తెలిపారు. గందరగోళానికి ఫుల్ స్టాప్ పెట్టాలనే బ్రేక్ ఫాస్ట్ మీటింగ్ ఏర్పాటు చేసినట్లు తెలిపారు. మీటింగ్ లో 2028 ఎన్నికల స్ట్రాటజీపై చర్చించినట్లు తెలిపారు. 2028లోగెలవడమే తమకు ముఖ్యమని అన్నారు. తామిద్దరం కలిసి కట్టుగా బీజేపీ, జేడీఎస్‌పై పోరాటం చేస్తున్నామని అన్నారు. కాంగ్రెస్ ప్రభుత్వంపై బీజేపీ అవిశ్వాస తీర్మానం పెట్టడం అసాధ్యమని ఈ సందర్భంగా ఉద్ఘాటించారు సీఎం సిద్ధరామయ్య.
హైకమాండ్ నిర్ణయాన్ని శిరసావహిస్తాం
కాంగ్రెస్ హైకమాండ్ నిర్ణయాన్ని శిరసావహిస్తామని ఈ సందర్భంగా డీకే శివకుమార్ చెప్పారు. అందుకు విరుద్ధంగా ఒక్క మాట కూడా మాట్లాడమని అన్నారు. బ్రేక్ ఫాస్ట్ మీటింగ్‌లో కర్ణాటక ప్రధాన్యాలపై చర్చించినట్లు చెప్పారు. ఈ మీటింగ్ ద్వారా తామిద్దరం కలిసికట్టుగా ఉన్నామనే సందేశం ఇస్తున్నామని తెలిపారు. కర్ణాటక ప్రజలు తమపై సంపూర్ణ విశ్వాసంతో ఉన్నారని.. ప్రజలకు ఇచ్చిన హామీలు నెరవేర్చడమే లక్ష్యమని అన్నారు డీకే. పార్టీని పటిష్టం చేయడమే అత్యంత ప్రాధాన్యమని చెప్పారు. త్వరలో సీఎం సిద్ధరామయ్య తమ ఇంటికి డిన్నర్ కు వస్తారని తెలిపారు. ఇది ఇలా ఉండగా, 2023లో కర్ణాటకలో కాంగ్రెస్ పార్టీ అధికారంలోకి వచ్చిన తర్వాత, ఎవరు రాష్ట్రానికి సీఎం కావాలన్న ప్రశ్న ఉదయించింది. అయితే, అధిష్టానం సూచన మేరకు ఇరువురు నేతలు రొటేషనల్ ఒప్పందం ప్రకారం ముఖ్యమంత్రిగా వ్యవహరించలన్న ఒప్పందం జరిగింది. దీంతో సిద్ధారామయ్య CMగా, శివకుమార్ డిప్యూటీగా నియమితులయ్యారు. ఇప్పుడు, ఆయా కాలం పూర్తయ్యే సమయంలో, ఈ ఒప్పందం మళ్లీ తెరమీదకి వచ్చింది. ప్రజల ఎన్నికల తీర్పు ప్రకారం 2028 వరకు పూర్తి కాలంపాటు సీఎంగా వ్యవహరిస్తానని సీఎం సిద్ధరామయ్య పలు సందర్భాల్లో వ్యాఖ్యనించారు. అయితే, అదే సమయంలో పార్టీ హై కమాండ్ నిర్ణయానికి కట్టుబడి ఉంటానని చెప్పుకొస్తున్నారు. దీంతో ఈ ఇప్పుడు ఈ అంశం మీద అందరి దృష్టీ పడింది. ఢిల్లీలో సోనియా, మల్లికార్జున్ ఖర్గే, రాహుల్ గాంధీలతో స్ట్రాటజీ గ్రూప్ సమావేశం జరగనుంది. ఈ సమావేశానికి ఇరువురు నేతలు హాజరయ్యే అవకాశం ఉంది. ఈ సమావేశంలో పార్టీ అధిష్టానం తీసుకునే నిర్ణయం కర్ణాటక రాజకీయాల్ని కొత్త మలుపు తిప్పొచ్చు. రాబోయే పార్లమెంట్ ఎన్నికలలో డీకే శివకుమార్ ఎలక్షన్ మేనేజ్‌మెంట్ నైపుణ్యం చాలా కీలకమని హైకమాండ్ భావిస్తున్నట్లు సమాచారం. ఇద్దరు ముఖ్య నాయకులను సంతృప్తి పరచడానికి, పార్టీని బలహీనపరచకుండా ఉండటానికి అధిష్టానం రాజీ ఫార్ములా అమలు చేసే అవకాశం ఉంది.