KKR: కోల్కత్తా కెప్టెన్గా మళ్లీ రహానే..?
ఇండియన్ ప్రీమియర్ లీగ్ (ఐపీఎల్) 19వ ఎడిషన్ ప్రారంభానికి సమయం దగ్గరపడుతుండటంతో అన్ని ఫ్రాంచైజీలు తమ జట్లను మరింత బలపరచుకునే ప్రయత్నాల్లో నిమగ్నమయ్యాయి. గత సీజన్లో ఆశించిన ఫలితాలు రాకపోవడంతో కొన్ని జట్లు తమ వ్యూహాల్లో మార్పులు చేసేందుకు సిద్ధమవుతున్నాయి. ఈ నేపథ్యంలో కోల్కతా నైట్రైడర్స్ (కేకేఆర్) జట్టు కెప్టెన్సీపై కూడా ఆసక్తికరమైన చర్చ సాగుతోంది. గత సీజన్లో జట్టును నడిపించిన అజింక్య రహానేపైనే ఈసారి కూడా యాజమాన్యం నమ్మకం ఉంచినట్లు క్రికెట్ వర్గాల్లో సమాచారం వినిపిస్తోంది.
గత ఐపీఎల్ సీజన్లో కోల్కతా నైట్రైడర్స్ ఆశించిన స్థాయిలో ప్రదర్శన ఇవ్వలేకపోయింది. అజింక్య రహానే సారథ్యంలో బరిలోకి దిగిన ఆ జట్టు పాయింట్ల పట్టికలో ఎనిమిదో స్థానంతోనే సరిపెట్టుకోవాల్సి వచ్చింది. దీంతో వచ్చే సీజన్కు ముందు జట్టులో పెద్ద మార్పులు జరిగే అవకాశాలపై చర్చ జరిగింది. ముఖ్యంగా కెప్టెన్ మార్పు జరుగుతుందని ప్రచారం కూడా జరిగింది. అయితే రహానే అనుభవం జట్టుకు ఎంతో ఉపయోగపడుతుందని భావించిన యాజమాన్యం అతడినే కొనసాగించే దిశగా ఆలోచిస్తున్నట్లు తెలుస్తోంది. జట్టుకు రహానే నాయకత్వం అవసరమని కేకేఆర్ వర్గాలు పేర్కొన్నాయి. అతడి అనుభవం యువ ఆటగాళ్లకు ఉపయోగపడుతుందని, కీలక సమయంలో సరైన నిర్ణయాలు తీసుకునే సామర్థ్యం అతడిలో ఉందని వారు అభిప్రాయపడ్డారు. ఇప్పటికే ఫ్రాంచైజీ ఈ విషయంపై ఒక స్పష్టమైన నిర్ణయానికి వచ్చినట్లు కూడా సమాచారం. మరోసారి రహానేనే జట్టును ముందుండి నడిపించే అవకాశాలు ఉన్నాయని తెలుస్తోంది.
గత సీజన్లో 37 ఏళ్ల అజింక్య రహానే బ్యాటర్గా కూడా మంచి ప్రదర్శన కనబరిచాడు. మొత్తం 13 మ్యాచుల్లో 390 పరుగులు చేసి కేకేఆర్ తరఫున అత్యధిక పరుగులు చేసిన ఆటగాడిగా నిలిచాడు. జట్టుకు కీలకమైన సమయంలో నిలబడి ఇన్నింగ్స్ను నడిపించిన అతడు ఈసారి కూడా వన్డౌన్లో బ్యాటింగ్కు వచ్చే అవకాశాలు ఉన్నాయి. ఈ సీజన్కు ముందు జరిగిన వేలంలో కోల్కతా నైట్రైడర్స్ తన జట్టును మరింత బలోపేతం చేసుకుంది. న్యూజిలాండ్కు చెందిన దూకుడు బ్యాటర్ ఫిన్ అలెన్తో పాటు టిమ్ సీఫెర్ట్, రచిన్ రవీంద్రలను జట్టులోకి తీసుకుంది. ఆల్రౌండర్ కామెరూన్ గ్రీన్ను కూడా కేకేఆర్ దక్కించుకుంది. ఈ నలుగురు ఆటగాళ్లు టాప్ ఆర్డర్లో బ్యాటింగ్ చేయగల సామర్థ్యం కలిగినవారే కావడం గమనార్హం.
అదే సమయంలో ఇప్పటికే జట్టులో సునీల్ నరైన్, రోవ్మన్ పావెల్, మతీశా పతిరన, బ్లెస్సింగ్ ముజరబాని వంటి విదేశీ స్టార్ ఆటగాళ్లు కూడా ఉన్నారు. ఐపీఎల్ నిబంధనల ప్రకారం తుది జట్టులో కేవలం నలుగురు విదేశీ ఆటగాళ్లకే అవకాశం ఉండటంతో ఎవరికి చోటు దక్కుతుందనే విషయం ఇప్పుడు జట్టు మేనేజ్మెంట్కు సవాల్గా మారింది. ఇదిలా ఉంటే కేకేఆర్ జట్టుకు చెందిన కీలక బౌలర్ హర్షిత్ రాణా గాయం కారణంగా ఈ సీజన్కు దూరమయ్యే అవకాశాలు ఉన్నట్లు వార్తలు వస్తున్నాయి. దీనిపై ఫ్రాంచైజీ నుంచి ఇంకా అధికారిక ప్రకటన రావాల్సి ఉంది. ఒకవేళ అతను ఈ సీజన్కు దూరమైతే అతని స్థానంలో ఎవరిని ఎంపిక చేస్తారన్నది ఆసక్తికరంగా మారింది. మొత్తానికి గత సీజన్లో ఎదురైన నిరాశను మరచి ఈసారి బలమైన జట్టుతో బరిలోకి దిగేందుకు కోల్కతా నైట్రైడర్స్ సిద్ధమవుతోంది. అనుభవజ్ఞుడైన అజింక్య రహానే నాయకత్వంలో జట్టు ఎలా ప్రదర్శన ఇస్తుందో చూడాలి.