RO-KO: రో-కో ఆరు నెలలు దూరం
స్టార్ క్రికెటర్లు రోహిత్ శర్మ, విరాట్ కోహ్లీ త్వరలో అంతర్జాతీయ క్రికెట్కు దూరంగా ఉండనున్నారు. న్యూజిలాండ్తో ఇండోర్లో జరిగిన చివరి వన్డే మ్యాచ్ అనంతరం ఈ ఇద్దరు దిగ్గజాలు దాదాపు ఆరు నెలల పాటు భారత్ తరఫున అంతర్జాతీయ మ్యాచ్ల్లో కనిపించరన్న సమాచారం అభిమానులను ఆందోళనకు గురిచేస్తోంది. ఫిట్నెస్, పనిభారం నిర్వహణ, భవిష్యత్ టోర్నమెంట్లపై దృష్టి వంటి అంశాల నేపథ్యంలో ఈ నిర్ణయం తీసుకున్నట్లు తెలుస్తోంది.భారత్–న్యూజిలాండ్ వన్డే సిరీస్ ప్రస్తుతం ఉత్కంఠభరితంగా సాగింది. ఈ సిరీస్ ముగిసిన వెంటనే టీమిండియా వరుసగా టీ20 మ్యాచ్లకు సిద్ధం కానుంది. అయితే, ఈ టీ20 సిరీస్లకు రోహిత్ శర్మ, విరాట్ కోహ్లీ ఎంపిక కావడం లేదని స్పష్టత వచ్చింది. దీంతో ఈ ఇద్దరు సీనియర్ ఆటగాళ్లు కొంతకాలం విశ్రాంతి తీసుకోనున్నారు. భారత జట్టు భవిష్యత్ ప్రణాళికల్లో భాగంగా యువ ఆటగాళ్లకు మరిన్ని అవకాశాలు ఇవ్వాలన్న ఆలోచనతో సెలెక్టర్లు ఈ నిర్ణయం తీసుకున్నారని సమాచారం.
ఇండోర్లోని హోల్కర్ క్రికెట్ స్టేడియంలో జరిగిన చివరి వన్డే మ్యాచ్ రోహిత్, కోహ్లీ అభిమానులకు కొంతకాలం పాటు చివరి అంతర్జాతీయ మ్యాచ్లా మారింది. ఈ మ్యాచ్ తర్వాత భారత జట్టు ప్రధానంగా టీ20 ఫార్మాట్పై దృష్టి పెట్టనుంది. వచ్చే నెలల్లో జరిగే టీ20 సిరీస్లలో కొత్త ఆటగాళ్లను పరీక్షించాలన్న ఉద్దేశంతో సీనియర్ ఆటగాళ్లకు విశ్రాంతి ఇవ్వాలని టీమ్ మేనేజ్మెంట్ నిర్ణయించినట్లు తెలుస్తోంది. గత కొన్నేళ్లుగా రోహిత్ శర్మ, విరాట్ కోహ్లీ భారత క్రికెట్కు కీలక సేవలు అందించారు. వన్డే, టెస్ట్ ఫార్మాట్ల్లో అనేక చిరస్మరణీయ విజయాలు అందించారు.
మూడు వన్డేల్లోనూ ఒకేలా..
బ్యాట్ చేతిలో పడితే మ్యాచ్ దిశనే మార్చగల సత్తా రోహిత్ది. అలాంటి ఆటగాడు న్యూజిలాండ్తో జరిగిన సిరీస్లో వరుసగా ఒకే రకంగా ఔటవ్వడం క్రికెట్ వర్గాల్లో చర్చనీయాంశంగా మారింది. “రోహిత్కు పట్టు ఎందుకు తప్పుతోంది?” అనే ప్రశ్న అభిమానులను కలవరపెడుతోంది. న్యూజిలాండ్ సిరీస్కు ముందు వరకూ రోహిత్ శర్మ ఫామ్పై ఎలాంటి సందేహాలూ లేవు. దక్షిణాఫ్రికాతో జరిగిన సిరీస్లో మూడు మ్యాచ్ల్లో 75, 14, 57 పరుగులు చేసి నిలకడ చూపించాడు. అంతకుముందు ఆస్ట్రేలియాతో జరిగిన మ్యాచ్ల్లో అజేయ సెంచరీ (121*)తో పాటు అర్థసెంచరీ (73) నమోదు చేసి తన క్లాస్ ఏంటో మరోసారి నిరూపించాడు. ఈ ప్రదర్శనలతో కివీస్ సిరీస్లో హిట్మ్యాన్ షో చూడాలని అభిమానులు ఆసక్తిగా ఎదురు చూశారు. అయితే, న్యూజిలాండ్తో జరిగిన మూడు మ్యాచ్ల్లో వచ్చిన ఫలితాలు పూర్తిగా భిన్నంగా ఉన్నాయి. ఈ సిరీస్లో రోహిత్ చేసిన పరుగులు వరుసగా 26, 24, 11 మాత్రమే. స్కోర్లు పెద్దగా లేనప్పటికీ, అభిమానులను ఎక్కువగా ఆలోచింపజేసింది అతను ఔటైన తీరు. మూడు మ్యాచ్ల్లో బౌలర్లు వేరైనా, ఫీల్డర్లు మారినా, ఔటైన విధానం మాత్రం ఒకటే. షాట్ ఆడే సమయంలో బ్యాట్ చేతిలో తిరిగిపోవడం, పట్టు సరిగా లేక టైమింగ్ కుదరక క్యాచ్ ఇవ్వడం—ఈ సమస్య మూడు సార్లు పునరావృతమైంది. సాధారణంగా రోహిత్ బ్యాటింగ్లో టైమింగ్ ప్రధాన ఆయుధం. బలంతో పాటు బ్యాట్ ముఖాన్ని సరిగ్గా ఉంచడం అతనికి అలవాటు. కానీ ఈ సిరీస్లో అదే అంశం తడబడింది.