T20: ప్రపంచకప్లో టీమిండియాకు చావోరేవో
సూపర్ 8 దశలో అడుగుపెట్టిన టీ20 ప్రపంచకప్ మరింత ఉత్కంఠభరితంగా మారింది. సెమీఫైనల్ బెర్త్ కోసం జట్లు చావోరేవో పోరాటం సాగిస్తున్న వేళ, భారత క్రికెట్ అభిమానుల దృష్టి మొత్తం కోల్కతాలోని ఈడెన్ గార్డెన్స్ పై నిలిచింది. ఇక్కడే భారత్ నేడు వెస్టిండీస్తో తలపడనుంది. గెలిస్తే సెమీస్కు రెడ్ కార్పెట్ పరచినట్టే; ఓడితే టోర్నీకి గుడ్బై చెప్పాల్సిన పరిస్థితి. ఇలాంటి ఒత్తిడిమయమైన నేపథ్యంలో ఈ మ్యాచ్ క్వార్టర్ ఫైనల్ను తలపిస్తోంది. సూర్యకుమార్ యాదవ్ నాయకత్వంలోని టీమ్ ఇండియా, షాయ్ హోప్ సారథ్యంలోని కరేబియన్ జట్టుతో సమరానికి సిద్ధమైంది. సూపర్ 8లో తొలి మ్యాచ్లో న్యూజిలాండ్ చేతిలో ఓటమి పాలైన భారత్, ఆ తరువాత జింబాబ్వేపై ఘన విజయం సాధించి ఆశలను సజీవంగా ఉంచుకుంది. అయితే ఆ మ్యాచ్లో 256 పరుగులు చేసినప్పటికీ, ప్రత్యర్థిని 148 పరుగులకే కట్టడి చేసి ఉంటే రన్రేట్ మరింత మెరుగ్గా ఉండేదనే విశ్లేషణలు వినిపించాయి. బౌలింగ్ విభాగంలో అర్ష్ దీప్ సింగ్ తప్ప మిగతా బౌలర్లు పరుగులు సమర్పించడం ఆందోళన కలిగించింది. వర్షం కారణంగా ఒక మ్యాచ్లో చెరొక పాయింట్ వచ్చినా, అది భారత్ కంటే వెస్టిండీస్కే లాభించిందని చెప్పాలి. అందుకే ఈ మ్యాచ్లో విజయం తప్ప మరో మార్గం లేదు. టీ20ల్లో భారత్, వెస్టిండీస్ జట్లు ఇప్పటివరకు 30 సార్లు తలపడ్డాయి. అందులో 19 మ్యాచ్ల్లో భారత్ విజయం సాధించగా, వెస్టిండీస్ 10 మ్యాచ్ల్లో గెలిచింది. ఒక మ్యాచ్ ఫలితం లేకుండా ముగిసింది. స్వదేశంలో భారత్ 8 విజయాలు సాధించగా, వెస్టిండీస్ గడ్డపై 5 మ్యాచ్లు గెలిచింది. తటస్థ వేదికలపై భారత్కి మంచి రికార్డు ఉంది.
అయితే టీ20 ప్రపంచకప్ టోర్నీల్లో మాత్రం గణాంకాలు కాస్త భిన్నంగా ఉన్నాయి. ఇప్పటివరకు నాలుగు సార్లు ఎదురెదురైన ఈ రెండు జట్లలో, భారత్ ఒక్కసారి మాత్రమే గెలిచింది. వెస్టిండీస్ మూడు విజయాలు సాధించింది. కరేబియన్ జట్టు భారత జట్టుపై 196 పరుగుల అత్యధిక స్కోరు నమోదు చేయగా, భారత్ వెస్టిండీస్పై 192 పరుగులు సాధించింది. ఈ గణాంకాలు మ్యాచ్ ఉత్కంఠను మరింత పెంచుతున్నాయి.
పిచ్ బ్యాటర్లకే అనుకూలం
ఈ మ్యాచ్కు వేదికైన ఈడెన్ గార్డెన్స్పై పిచ్ బ్యాటర్లకు అనుకూలంగా ఉండే అవకాశముంది. ఈ టోర్నీలో తొలి 200 పరుగుల స్కోరు కూడా ఇక్కడే నమోదైంది. స్కాట్లాండ్ ఇటలీపై 207 పరుగులు చేసింది. అయితే అదే పిచ్పై ఇటలీ లక్ష్య ఛేదనలో 134 పరుగులకే కుప్పకూలింది. స్పిన్నర్లకు టర్న్, పేసర్లకు బౌన్స్ లభించే ఈ పిచ్పై సమతూక ప్రదర్శన అవసరం. బెంగాల్ క్రికెట్ సంఘం అధ్యక్షుడు సౌరభ్ గంగూలీ పిచ్ను పరిశీలించి సంతృప్తి వ్యక్తం చేసినట్లు సమాచారం. మంచు ప్రభావం కూడా ఉండే అవకాశం ఉంది. అందువల్ల టాస్ కీలక పాత్ర పోషించనుంది. భారత్ ఈ ప్రపంచకప్లో ఈడెన్ గార్డెన్స్లో ఆడనుండటం ఇదే తొలిసారి. కానీ వెస్టిండీస్ మాత్రం గ్రూప్ దశలో స్కాట్లాండ్, ఇటలీతో ఇక్కడే మ్యాచ్లు ఆడింది. ఆ అనుభవం వారికి కొంత ప్రయోజనం కలిగించే అవకాశం ఉంది. హెట్ మేయర్ వంటి బ్యాటర్లు ఫామ్లో ఉండడం, బౌలింగ్ విభాగం క్రమబద్ధంగా ఉండడం వెస్టిండీస్ బలం. ఇటు భారత్, అటు వెస్టిండీస్ రెండూ దక్షిణాఫ్రికా చేతిలో ఓడిపోయి, జింబాబ్వేపై గెలిచాయి. కాబట్టి ఇరు జట్లు సమాన స్థాయిలోనే ఉన్నట్లు కనిపిస్తున్నాయి.