T20 WORLDCUP: బంగ్లాదేశ్ ఆశలపై ఐసీసీ నీళ్లు
టీ20 ప్రపంచకప్ మ్యాచ్ల వేదికల మార్పు అంశంపై చోటుచేసుకున్న పరిణామాలు బంగ్లాదేశ్ క్రికెట్ బోర్డు (బీసీబీ)కి తీవ్ర నిరాశను మిగిల్చాయి. ఈ విషయంలో అంతర్జాతీయ క్రికెట్ మండలి (ఐసీసీ)తో తలపడిన బీసీబీకి వరుసగా ఎదురుదెబ్బలు తగులుతున్నాయి. ఇప్పటికే తమ విజ్ఞప్తిని ఐసీసీ తిరస్కరించగా, తాజాగా దాఖలు చేసిన అప్పీల్ కూడా కొట్టివేయబడటంతో బీసీబీ ముందు దారులు పూర్తిగా మూసుకుపోయినట్లుగా కనిపిస్తోంది. టీ20 ప్రపంచకప్ టోర్నీ సందర్భంగా బంగ్లాదేశ్ జట్టు ఆడాల్సిన మ్యాచ్లను భారత్లోనే నిర్వహించాలని ఐసీసీ నిర్ణయించింది. భద్రతా, లాజిస్టిక్ అంశాలు, టోర్నీ నిర్వహణలో సమన్వయం వంటి కారణాలను పరిగణనలోకి తీసుకుని ఈ నిర్ణయం తీసుకున్నట్లు ఐసీసీ స్పష్టం చేసింది. అయితే ఈ నిర్ణయానికి బంగ్లాదేశ్ క్రికెట్ బోర్డు తీవ్ర అభ్యంతరం వ్యక్తం చేసింది. తమ జట్టు మ్యాచ్లను వేరే వేదికకు మార్చాలని కోరుతూ ఐసీసీకి విజ్ఞప్తి చేసింది. కానీ ఐసీసీ బోర్డు ఆ విజ్ఞప్తిని అంగీకరించలేదు.
ఈ నిర్ణయాన్ని సవాల్ చేస్తూ బీసీబీ ఐసీసీ వివాద పరిష్కార కమిటీ (డీఆర్సీ) వద్ద అప్పీల్ దాఖలు చేసింది. అయితే తాజాగా డీఆర్సీ ఈ అప్పీల్ను విచారణకు కూడా స్వీకరించకుండా తోసిపుచ్చింది. తమ పరిధిలోకి రాని అంశంపై విచారణ జరపడం సాధ్యం కాదని కమిటీ స్పష్టంగా వెల్లడించింది. ఐసీసీ నియమావళి ప్రకారం, అలాగే డీఆర్సీ నిబంధనల ప్రకారం, ఐసీసీ బోర్డ్ ఆఫ్ డైరెక్టర్స్ తీసుకున్న నిర్ణయాలపై అప్పీల్ను విచారించే అధికారం తమకు లేదని కమిటీ తేల్చి చెప్పింది. దీంతో బీసీబీకి మరోసారి భారీ షాక్ తగిలినట్లయ్యింది. ఇదే అంశంపై గతంలో జరిగిన ఓటింగ్లో కూడా బీసీబీకి నిరాశే ఎదురైంది.
ఐసీసీ బోర్డు సభ్యులు నిర్వహించిన ఓటింగ్లో 14-2 మెజారిటీతో బంగ్లాదేశ్ జట్టు మ్యాచ్లు భారత్లోనే కొనసాగాలని తీర్మానించారు. ఈ ఓటింగ్లో ఎక్కువ మంది సభ్యులు ఐసీసీ నిర్ణయానికే మద్దతు ఇవ్వడంతో బీసీబీ వాదనలు బలహీనపడ్డాయి. అప్పటి నుంచే ఈ వివాదం మరింత ముదిరినట్లు క్రీడా వర్గాలు అభిప్రాయపడుతున్నాయి.డీఆర్సీ నిర్ణయం వెలువడిన నేపథ్యంలో బీసీబీ చివరి ప్రయత్నంగా న్యాయపరమైన మార్గాన్ని ఆశ్రయించాలనే ఆలోచనలో ఉన్నట్లు సమాచారం. స్విట్జర్లాండ్లోని **కోర్ట్ ఆఫ్ ఆర్బిట్రేషన్ ఫర్ స్పోర్ట్స్ (సీఏఎస్)ను ఆశ్రయించాలని బీసీబీ భావిస్తున్నట్లు తెలుస్తోంది. అంతర్జాతీయ క్రీడా వివాదాల్లో సీఏఎస్ కీలక పాత్ర పోషిస్తుండటంతో, అక్కడైనా తమకు న్యాయం జరుగుతుందనే ఆశతో బీసీబీ ఈ నిర్ణయం తీసుకున్నట్లు సమాచారం.
బంగ్లా స్థానంలో స్కాట్లాండ్ జట్టును బరిలోకి దించాలనే అంశంపై ఐసీసీ ఒక నిర్ణయానికి వచ్చినట్లు తెలుస్తోంది. ఇప్పటికే ప్రత్యామ్నాయ ప్రణాళికలపై ఐసీసీ చర్చలు పూర్తి చేసినట్లు సమాచారం. ఈ విషయంపై శనివారం అధికారిక ప్రకటన వెలువడే అవకాశముందని క్రీడా వర్గాలు చెబుతున్నాయి. టీ20 ప్రపంచకప్ వేదికల వివాదం బంగ్లాదేశ్ క్రికెట్కు పెద్ద సంక్షోభంగా మారింది. ఐసీసీ తీసుకున్న నిర్ణయాలకు వ్యతిరేకంగా పోరాడిన బీసీబీకి ఇప్పటివరకు ఎక్కడా అనుకూల ఫలితం దక్కలేదు. డీఆర్సీ అప్పీల్ తిరస్కరణతో బీసీబీకి న్యాయపరమైన మార్గాలు కూడా పరిమితమయ్యాయి. సీఏఎస్నే చివరి ఆశగా భావిస్తున్న బీసీబీకి అక్కడ ఎలాంటి ఫలితం దక్కుతుందన్నది ఆసక్తికరంగా మారింది. ఐసీసీ కఠిన నిర్ణయాలు తీసుకునేందుకు సిద్ధంగా ఉండటం ఈ వివాదానికి మరింత ప్రాధాన్యం తీసుకొచ్చింది.