T20 WORLDCUP: విండీస్ విజయం.. భారత్ సెమీస్ అవకాశాలు క్లిష్టం

టీ20 ప్రపంచ కప్ 2026లో జింబాబ్వేతో జరిగిన సూపర్-8 మ్యాచ్లో వెస్టిండీస్ 107 పరుగుల తేడాతో ఘన విజయం సాధించింది. తొలుత బ్యాటింగ్ చేసిన విండీస్ 20 ఓవర్లలో 6 వికెట్ల నష్టానికి 254 పరుగులు చేసింది. కొండంత లక్ష్యఛేదనలో జింబాబ్వే 17.4 ఓవర్లలో 147 పరుగులకు ఆలౌటైంది. ఎనిమిదో స్థానంలో వచ్చిన బ్రాడ్ ఇవాన్స్ (43; 21 బంతుల్లో 2 ఫోర్లు, 5 సిక్స్లు) మాత్రమే పోరాడాడు. డియోన్ మైయర్స్ (28), సికిందర్ రజా (27), మరుమాని (14), టోనీ మున్యాంగా (14) పరుగులు చేశారు. ఒక దశలో జింబాబ్వే 103 పరుగులకే 9 వికెట్లు కోల్పోగా ఇవాన్స్ మెరుపులు మెరిపించడంతో స్కోరు 140 దాటింది. కరేబియన్ జట్టు బౌలర్లలో గుడాకేష్ మోటి 4, అకిల్ హోస్సేన్ 3, మాథ్యూ ఫోర్డ్ 2, జేసన్ హోల్డర్ ఒక వికెట్ పడగొట్టారు. విండీస్ బ్యాటర్లలో షిమ్రోన్ హెట్మయెర్ (85; 34 బంతుల్లో 7 ఫోర్లు, 7 సిక్స్లు), రోవ్మన్ పావెల్ (59; 35 బంతుల్లో 4 ఫోర్లు, 4 సిక్స్లు) హాఫ్ సెంచరీలు సాధించారు. ఆఖర్లో షెర్ఫానె రూథర్ఫోర్డ్ (31; 13 బంతుల్లో 2 ఫోర్లు, 1 సిక్స్), రొమారియో షెఫర్డ్ (21: 10 బంతుల్లో 3 సిక్స్లు), జాసన్ హోల్డర్ (13; 4 బంతుల్లో 2 సిక్స్లు) దూకుడుగా ఆడారు. ఓపెనర్లు బ్రాండన్ కింగ్ (9), షై హోప్ (14) విఫలమయ్యారు. జింబాబ్వే బౌలర్లలో ఎన్గరవా 2, ముజరబాని 2, బ్రాడ్ ఇవాన్స్, క్రెమెర్ చెరో వికెట్ తీశారు. 255 పరుగుల లక్ష్యంతో బరిలోకి దిగిన జింబాబ్వే ఆరంభం నుంచే ఒత్తిడిలో పడింది. కీలక బ్యాటర్లు వరుసగా ఔటవడంతో 103 పరుగులకే 9 వికెట్లు కోల్పోయింది. ఎనిమిదో స్థానంలో వచ్చిన బ్రాడ్ ఇవాన్స్ 21 బంతుల్లో 43 పరుగులు (2 ఫోర్లు, 5 సిక్స్లు) చేసి పోరాడినా ఫలితం మారలేదు
విండీస్ ఇన్నింగ్స్లో వచ్చిన ప్రతి బ్యాటరూ దూకుడే మంత్రంగా ఆడారు. సిక్స్ల వర్షం కురిపించారు. విండీస్ బ్యాటర్లు మొత్తంగా 19 సిక్స్లు కొట్టారు. అందులో రెండుసార్లు లైఫ్ దొరికిన హెట్మయెర్వే 7 సిక్స్లు ఉన్నాయి. టీ20 ప్రపంచ కప్లో అత్యంత వేగవంతమైన హాఫ్ సెంచరీ చేసిన బ్యాటర్గా హెట్మయెర్ రికార్డు సృష్టించాడు. మరో 15 పరుగులు చేసి ఉంటే.. టీ20 ప్రపంచ కప్లోనే ఫాస్టెస్ట్ సెంచరీ చేసిన క్రికెటర్గా రికార్డు సృష్టించేవాడు. కానీ, 85 పరుగుల వద్ద పెవిలియన్కు చేరాడు. ఈ వరల్డ్ కప్లో అత్యధిక స్కోరు ఇదే కావడం గమనార్హం.
గేల్ రికార్డుకు హెట్మయెర్ సవాల్
టీ20 ప్రపంచకప్ చరిత్రలో వేగవంతమైన సెంచరీ 47 బంతుల్లో సాధించిన క్రిస్ గేల్ పేరిట ఉంది. ఈ మ్యాచ్లో హెట్మయెర్ అదే దిశగా దూసుకెళ్లినా, 85 పరుగుల వద్ద ఔటవడంతో ఆ చరిత్రాత్మక ఘట్టం దూరమైంది. అయినప్పటికీ అతని 19 బంతుల హాఫ్ సెంచరీ ఈ టోర్నీలోనే కాకుండా విండీస్ తరఫున ప్రపంచకప్లో అత్యంత వేగవంతమైన అర్ధశతకంగా నిలిచింది.
సూపర్-8లో విండీస్ గర్జన
సూపర్-8 దశలో ఇంత భారీ స్కోరు నమోదు చేయడం విండీస్ ఆత్మవిశ్వాసాన్ని తెలియజేస్తోంది. బౌలింగ్, బ్యాటింగ్ రెండింటిలోనూ సమతూక ప్రదర్శనతో 107 పరుగుల ఘన విజయం సాధించారు. ఈ ఫలితంతో సెమీస్ రేసులో తమ స్థానాన్ని బలపరిచారు. మొత్తానికి, “రావడం.. బాదడం.. గెలవడం” అన్న ఫార్ములాతో విండీస్ ఈ మ్యాచ్ను పూర్తిగా ఏకపక్షంగా మార్చింది. హెట్మయెర్ తుఫాన్ ఇన్నింగ్స్, పావెల్ తోడ్పాటు, చివర్లో ఫినిషర్ల దూకుడుతో విండీస్ భారీ స్కోరు చేసింది.
© Copyright 2025 : tv5news.in. All Rights Reserved. Powered by hocalwire.com
